Tjakultjurinkunytja 7:3-25

³Katutjalu Yipuramanya watjaṉu, ‘Nyuntupa ngurra, walytja tjuṯaṯarra wantirra, manta kutjupakutu maa yarra! Nyuntu yananyingkaṉanta nintilku ngurra palulakutu tjukarurru yankunytjaku.’

⁴Palulanguru Yipuramalu ngurra walytja wantirra tawunu Yaranalakutu yanu. Ngurra palula nyinarra paluru yapuntarringu. Palulanguru Katutjalu watjara palunya iyaṉu, manta ngaakutu, nganampa ngurra walytjakutu.

⁵Paluru yankula nyinanytjala wiya Katutjalu watjaṉu, ‘Ngaatja nyuntupa ngurra, kutun nyinanytjaku.’ Yalatji wiya Katutjalu palula watjaṉu, paluru ngurra miyaḻangka nyinangi. Katutjalu Yipuramanya yalatji watjaṉu, ‘Manta tjuṯaku mayutju tiṉangkuṉanta tjukarurru watjaṉi. Manta ngaatjanya nyuntupa walytja ngaṉṯitja tjuṯangkulpi kanyilku, ngurra walytja tjanampalpi ngaraku.’ Wangka yalatji Katutjalu Yipuramanya watjaṉu paluru pipirriwiya nyinanytjala.

⁶Yipuramanya Katutjalu piyuku watjaṉu, ‘Nyuntupa walytja ngaṉṯitja tjuṯaya kutu manta kutjupangka nyinamalpa, yiiya antaṯa puupala. Manta palunya ngurrara tjuṯangku tjananya pungkula kanyinmalpa, tjana kutu waarrkarriyanytjaku. Waarrkana tjuṯaya nyinaku wiitjimani mantjintjawiya.

⁷Palunya ngurrara pungkupayi tjuṯa ngayulu tjananya ngaparrtjingku pungku tjana nyuntupa walytja tjuṯa ngurra kutjupakutu iyantjaku, kanyilwiyangku. Palulanguruya nyuntupa walytja ngaṉṯitja tjuṯa ngalyankula ngurra ngaakutu nyinarra ngayunyaṉiya waḻkunmalpalpi.’

⁸Palulanguru Katutjalu Yipuramanya watjaṉu, ‘Nyuntupa katja tjuṯa, nyuntu tjananya watintjaku. Nyuntupa walytja ngaṉṯitja tjuṯangku, tjanaṯarra katja watintjaku. Yalatji tjana watirrinytjala nyurrangarri kulilku, “Yuwa, ngaa tjuṯa Katutjaku walytja tjuṯa nyinanyi.” ’ Palulanguru Yipuramalu palumpa katja Yatjikanya watiṉu, pipirri wiima, tjiṉṯu tjapanpalangka ngarrinyingka. Yatjikalu tiṉarrirra palumpa katja Tjikupanya pipirri wiima watiṉu. Palulanguru Tjikupalu tiṉarrirra palumpa katja tjuṯalpi tjananya pipirri wiima watiṉu. Tjikupaku katjapiṯi, tuwalpala nyinangi nganampa walytja yurruntitja tjuṯa.”

⁹Tiipanalu tjananya piyuku watjaṉu, “Tjikupakuṉu katja tjuṯa mulyarrarringu maḻanypa Tjutjupaku. Mulyarrarringkulaya palunya witira tjalamilaṉu tjanala kamulatjarra tjuṯangku manta Yitjipilakutu katinytjaku. Ngurra palula Tjutjupanya waarrkarringangi payirrinytjawiya mungutja.

¹⁰Katutjalu palunya kutu yaṉṯayaṉṯaṉangi wantiwiyangku, kutjupa tjuṯangkuya panypurangkunytjala. Paluru Tjutjupanya nintiṉingi paluru ninti puntungku wangkanytjaku. Manta Yitjipiku mayutju tiṉangku Tjutjupanya yaḻṯingu, ngalya yankula ngaranytjaku. Paluru Tjutjupaku yunyparringkula waarrkana tjuṯangka watjaṉu, ‘Tjutjupanyalpi mayutju tiṉa nampa tuu nyinaku, Yitjipinya ngurrara tjuṯaku, ngayuku waaḻa kanyilpayi tjuṯakuṯarra.’

¹¹“Palulanguru kapi wiya punkaṉu manta Yitjipilawana, manta Kayinanalawanaṯarra, mangarri tjanampa wiyarringu. Kutjupa tjuṯa tjana paḻtjatjirratja wiyarringu. Nganampa yurruntitja tjuṯangku Tjikupalungarri puṯu nyakuyinangi mangarriku,

¹²kanya Yitjipingka tjana mangarri puntuya waaḻa tjuṯangka kanyiṉingi. Tjiḻpi Tjikupalu tjakulpa kuliṉu manta Yitjipingka mangarri kutu ngarrinyingka. Alatji kulira paluru tjananya katjapiṯi ngurra palulakutu wantirriyaṉu mangarri payimilara ngalya katinytjaku. Manta Yitjipilakutu tjana yankula mangarri payimilaṉu.

¹³Mangarriya payimilara piyukuya kuḻpangu ngurra walytjakutu. Paluru tjana mangarri palunya ngalkura piyuku yanu manta Yitjipilakutu mangarriku. Palulanguru Tjutjupalu tjananya kaaka tjuṯanya watjaṉu, ‘Ngayulu Tjutjupanya, nyurrangarrimpa maḻanypa.’ Palulanguru mayutju Piirulu kuliṉu Tjutjupaku walytja tjuṯa ngalyanutjangka.

¹⁴Tjutjupalu palumpa kaaka tjuṯa iyaṉu, paapa Tjikupanya, walytja kutjupa tjuṯaṯarra, yaḻṯirra ngalya katinytjaku, manta Yitjipilakutu. Tjikupanyangarriya tjuṯa nyinangi yaṉangu tjapantiyi payipala.

¹⁵Tjikupanyangarriya Yitjipilakutu yankula palyaya nyinangi mangarritjarralpi. Manta Yitjipilaya nyinarra mirrirringu, Tjikupanya palumpa katja tjuṯaṯarra.

¹⁶Walytja ngaṉṯitja tjuṯangku tjananya mirri tarrka tjuṯa maḻaku katingu manta Kayinanalakutu. Kapi Tjikimalaya mirri tarrka tjuṯa tjunutjunu. Kapi Tjikimanya Yipuramalu yurrunpa maningka payimilaṉu, palumpa walytja ngaṉṯitja tjuṯa, mirri tjunutjunkunytjaku. Yamaku walytja tjuṯangka manta panyapa payimilaṉu.

¹⁷“Yitjurilaku ngaṉṯitja tjuṯaya ngurra Yitjipila nyinarra tjuṯalingkulpiya nyinangi. Katutjalu kuliṉu, ‘Ngayulu Yipuramanya yirriṯi watjaṉu palumpa walytja ngaṉṯitja tjuṯa ngurra Kayinanala katirra nyinatjunkukitjangku. Wangka palumpa wiyaṉa ramarringu, kutuṉa kuliṉi ngula tjananya katirra ngurra palula nyinatjunkukitjangku.’

¹⁸Palulanguru mayutju tiṉa kutjupalpi Yitjipinya ngurrara tjuṯaku tjanampa nyinangu. Mayutju paluru Tjutjupaku ngurrpa nyinangu.

¹⁹Mayutju paluru nganampa walytja yurruntitja tjuṯaku aḻṯururrinytjawiyangku watjaṉu tjuulytji tjuṯangku pipirri wiima tjuṯa tjanampa tjulyara katirra urilta waṉinytjaku, tjana ngarrirra ilunytjaku.

²⁰Palulanguru Muutjanya pipirri wiima yutirringu. Pipirri wiima palya ngarringi. Kiṉara tjirripalangka maamangku ngurrangka yampura kanyiṉingi.

²¹Paluru pipirri wiima palunya karrukutu katirra ngarritjunu kaṉilpangka nguwanpa, kapingka katuwana ngaralinkunytjaku. Kaṉilpa palula ngarrinyingka, mayutju Piiruku yuṉṯalpangku yankula nyakula mantjiṉu kaṉilpa palunya. Pipirri wiima Muutjanya mantjira kanyira tiṉaṉungku, maama walytjangku nguwanpa.

²²Paluru tiṉarringkula nyinanyingka Yitjipinya ngurrara kuultitji tjuṯangku nintiṉingi. Kuula tiṉangkaṯarra paluru nyinarra ninti puntulingku nyinangi. Paluru yaṉangu punturringkula tjukarurru kutu wangkapayi. Paluru waarrka tjukarurru palyalpayi, aṉangu manpaṯangku.”

²³Tiipanalu tjananya piyuku watjaṉu, “Muutjanya wati punturringkula paluru kuliṉingi palumpa walytja tjuṯa yankula nyakukitja.

²⁴Yankula Muutjalu nyangu Yitjurilaku walytja ngaṉṯitja kutju Yitjipinya ngurrarangku pikangku punganyingka. Nyakulara patjurirringu. Muutjalulpi Yitjipinya ngurrara palunya pungkula iluntanu.

²⁵Muutjalu yalatji kuliṉingi, ‘Ngayuku walytja tjuṯangkuya yalatji nintingku kuliṉi, Katutjaluṉi ngayunya wantirriyaṉu patjuriṉa tjanampa wangkanytjaku mayutju tjuṯangku tjananya kutu yitjipungkula kanyiltjipingka.’ Muutjaku walytja tjuṯangku wiya yalatji kuliṉu, wiya.