Tjakultjurinkunytja 5:11-40

¹¹Yiitjuku walytja yuwankarrangkuya yaṉangu kutjupa tjuṯangkuṯarraya kulira puntura nguḻurringu, “Katutjalu pulanya pungu.”

¹²Palulanguru Yiitjuku waarrkana tjuṯangku Yiitjukuṉu ngangkaritjarrangku miiṉṯa tjuṯa palyaṉangi, mamutjarra tjuṯaṯarra. Yiitjuku walytja tjuṯaya rawa tjungurripayi, Tjuwuku tjaatji tiṉangka ila, puringka. Tjana puri palunya watjalpayi, “Tjalamunaku puri.”

¹³Palula tjanalamarra Tjarutjalumanya ngurrara tjuṯa nguḻurringkula wiya tjungurripayi. Paluru tjana kulira nyinangi, “Yiitjuku walytja tjuṯaya palya nyinanyi. Nganaṉa wiya tjanala tjungurriku, Katutjalulanya pungkutjipingka.”

¹⁴Palulanguru kutjupa tjuṯangku mayutju Yiitjuku wangka kulira palumpa walytjarringu. Yalatji kutjupa tjuṯa tjanala tjungurringkula Yiitjuku walytjarringu. Yalatji yaṉangu tjuṯalingku Yiitjuku walytjarringu.

¹⁵Palulanguruya kutjupa tjuṯangku miiṉṯa tjuṯa katirra pulangkitingka yiwarrangka tjayiṯingka ngarritjunkupayi, Piitalu palyantjaku. Yalatji tjana kulilpayi, “Piitalu wiya miiṉṯa tjuṯa marangku pampuntjaku, paluru yiwarrawana yankula puri Piitakuṉungku miiṉṯa tjuṯa palyalku.”

¹⁶Yaṉangu tjuṯalingkungkuya, Tjarutjalumala yila nyinanytja tjuṯangku, miiṉṯa tjuṯa katingi, mamutjarra tjuṯaṯarra, palyarrinytjaku. Paluru tjana yuwankarra palyarringu.

¹⁷Tuḻkuku mayutju tiṉa paluru, Tjuwuku mayutju tjuṯaṯarraya mulyarrarringu tjanampa Yiitjuku waarrkana tjuṯaku. Yalatjiya watjaṉangi, “Yaṉangu tjuṯangkuya wangka tjanampa kulira yunyparringanyi, nganampa wangka wiyaya kuliṉi.”

¹⁸Paluru tjana yankula Yiitjuku waarrkana tjuṯa witira katirra tjiilangka tjarrpatjunu.

¹⁹Mungangka Katutjalu wantirriyaṉu palumpa ilkari ngurrara tjiila palulakutu. Paluru tjanampa kiiṯa alytjurankula yaḻṯirra tjananya katirra yurilpangka ngaratjunu. Ngaratjunkula tjananya watjaṉu,

²⁰“Tjaatji tiṉa palulakutu nyurrangarri yankula tjungurrirra yaṉangu tjuṯa tjananya nintinma!, tjana Yiitjuku wangka kulira palumpa walytjarrinytjaku.”

²¹Kuliraya tjaatji palulakutu yanu, tjiṉṯukutu tjiṉṯukutu nguwanpa. Paluru tjana yankula yaṉangu tjuṯa nintiṉingi. Tuḻkuku mayutju paluru, palumpa walytja tjuṯaṯarra Yiitjuku waarrkana tjuṯa tjiilanguru pakaṉutjangka ngurrpaya nyinangu. Paluru tjana mayutju kutjupa tjuṯa tjananya yaḻṯingu tjungurrinytjaku. Tjunguya nyinarra watjaṉu yurrkunytji tjuṯangku tjiilakutu yankula Yiitjuku waarrkana tjuṯa witira ngalya katinytjaku.

²²Paluru tjana ankula tjiilangka tjarrparra puṯu tjanampa Yiitjuku waarrkana tjuṯaku nyangu. Tjana puṯu nyakula yankula tjanampa mayutju tjuṯangka tjakultjunu yalatji,

²³“Tjiilakutulatju yankula kiiṯa pati nyangu, tjuulytji tjuṯaya kutu ngaranyingka. Kiiṯalatju tjanampa alytjurara puṯu nyangu. Paluru tjana wiya nyinangu, yanuya.”

²⁴Yurrkunytji tjuṯaku mayutju, tuḻkuku mayutju tjuṯaṯarra tjuḻurrtjuḻurrmanuya tjakulpa kulira. Tjana puṯu kulira parra wangkarra waṉingu, “Yaalytjiyaalytji tjana pakaṉu!”

²⁵Wati kutjupangku yankula tjanala watjaṉu, “Kulilaya! Nyurrangarri watjantjala yurrkunytji tjuṯangku ilta tjananya witira katirra tjiilangka tjarrpatjunu. Tjarrpatjunutja tjuṯa tjaatji tiṉangkalpiya kuwarri ngarala waṉinyi. Paluru tjana yaṉangu tjuṯa tjananya nintiṉi.”

²⁶Yurrkunytji tjuṯaku mayutjungku, yurrkunytji tjuṯa katingu Yiitjuku waarrkana tjuṯa witintjaku. Tjana yankula palunya tjananya purinypangku witira katingu. Wiya tjana raapangku tjananya witira katingu, wiya. Purinypangkuya tjananya witira katingu yaṉangu tjuṯangku ngurrkurringkula tjananya puḻingka rungkaltjipingkamarra.

²⁷Tjana katirra tjananya ngaratjunu mayutju panyapa tjuṯangka kaantjaḻa tjuṯangka. Tuḻkuku mayutju tiṉangku tjananya yalatji payiṉu,

²⁸“Yurrunpalatju nyurrangarrinya watjaṉu, wiya Yiitjuku wangka nintintjaku. Nganaṉanyanyurra kulilwiyangku wantingu. Kutu nyurrangarri tjananya yaṉangu tjuṯa Tjarutjalumalawana nintirinangi. Nyurrangarri tjananya wiyawana yalatji watjalpayi, ‘Yiitjunya Payilatangka ngaranytjala tuḻkuku mayutju tjuṯangku yaṉangu tjuṯa tjingapungu tjana yalatji watjantjaku, “Yiitjunya watiyangka iluntarra!” ’”

²⁹Piitalu, Yiitjuku waarrkana kutjupa tjuṯangkuṯarraya watjaṉu, “Nganaṉa Katutjaku wangka kutju kulintjaku, yaṉangukuṉu wangka wiya.

³⁰Nganampa walytja yirriṯi nyinanytja tjuṯangku Katutjanya waḻkura nyinangi. Katutja paluru Yiitjuku yunyparringkula palunya mirritjanu pakaltjingaṉu. Nyurrangarri watjaṉu tjana Yiitjunya watiyangka nyiiḻamilara waralytjunkula yiluntankunytjaku.

³¹Katutjalu palunya pakaltjingara mayutju tiṉa ngaratjunu. Tjungupula Yiitjunya Katutjanya mayutju kutjarra nyinanyi. Katutjalu yurrunpa wangka ngaa palunya kuliṉingi, ‘Yiitjulu tjanampa Yitjurilaku walytja ngaṉṯitja tjuṯaku kuya waṉirra kana tjananya kanyilku. Yuwa, paluru tjanampa kuya waṉiku, tjana palumpa wangka kulira tjukarurru nyinanytjala.’”

³²Piyuku Piitalulpi tjananya watjaṉu, “Nganaṉatju Katutjaku kurrunpatjarra ngaangka ngaranyi nyurrangarrinya wangka palunya Yiitjunyatjarra tjakultjunkunytjaku. Yaṉangungku Katutjaku wangka kulira tjukarurru nyinanytjala Katutjalu palumpa kurrunpa palula tjarrpatjunkuku.”

³³Wangka palunya mayutju tjuṯangku kulira puntura tjanampa mulyarrarringu. Tjungungkuya kuliṉu Yiitjuku waarrkana tjuṯa tjananya iluntankunytjaku.

³⁴Wati kutjungku ngarala watjaṉu Yiitjuku waarrkana tjuṯa, katirra yurilpangka ngaratjunkunytjaku. Yurrkunytji tjuṯangku tjananya katirra yurilpangka ngaratjunu, mayutju tjuṯa wangkanytjala tjana kuliltjipingkamarra. Wati paluru yini Kamaliyalanya Paratji nyinangi. Paluru Muutjaku luwu yaṉangu tjuṯangka nintilpayi. Yaṉangu tjuṯaraya mayutju palumpa yunypa nyinangi.

³⁵Mayutju paluru Kamaliyalalu tjananya kaantjaḻa tjuṯangka watjaṉu, “Kulilaya! Nganaṉa Yitjurilaku walytja ngaṉṯitja tjuṯa nyinanyi. Nganaṉa wiya parrpaṯu parrpaṯungku watjantjaku, palunya tjuṯa iluntankunytjaku, nganaṉa purinypangku kulintjaku.

³⁶Yirriṯi wati Tjuyitatjalu yaṉangu tjuṯangka watjalpayi yalatji, ‘Ngayulu nyurrangarrimpa mayutju tiṉa nyinanyi, ngayuku wangka nyurrangarri kulira ngayulawana nyinanytjaku.’ Wati tjuṯangku yantaṯa puupalangku palumpa wangka kulira ngulytjurringu. Palulanguru kutjupangku Tjuyitatjanya iluntananyingka, palumpa ngulytju tjuṯa tjungurringkunytjawiya tjana yankula pilapilarringu ngurra kutjupakutu.

³⁷Palunya nguwanpa wati kutjupa Tjuutatjanya Kaliliyinya ngurrara mayutju tiṉarringu. Kamanta ngurrara tjuṯangkuya yini tjunanyingka, palunya tayimi Tjuutatjanya mayutju tiṉarringu. Yaṉangu tjuṯangku palumpa wangka kulira ngulytjurringu. Tjana palulawana tjungu nyinangi. Panyapa nguwanpa, wati kutjupangku iluntananyingka ngulytju palumpa tjuṯa tjungurringkunytjawiya tjana yankula pilapilarringu ngurra kutjupakutu.

³⁸Mayutju panyapa kutjarra nguwanpa mayutju tjanampa Yiitjuku waarrkana tjuṯaku Yiitjunya mirrirringu. Tjinguru palumpa ngulytju tjuṯa tjungurringkunytjawiyalpi yankula pilapilarriku ngurra kutjupakutu. Nganaṉa wiya watjantjaku tjana Yiitjuku waarrkana tjuṯa mirri pungkunytjaku, nganaṉa tjananya wantirriyantjaku. Tjinguru wangka tjanampa yaṉangukuṉu kutju. Tjinguru yaṉangu tjuṯangku kulira wantiku. Tjinguru tjana tjungurringkunytjawiyalpi yankula pilapilarriku ngurra kutjupakutu.

³⁹Tjinguru wangka tjanampa Katutjakuṉu, paluru yunypa tjanampa nyinanyi. Paluru yunypa tjanampa nyinanyingka nganaṉa wiya Katutjanya panypurangkula tjananya mirri pungkunytjaku.” Kamaliyalaku wangkaya kulira yunyparringu.

⁴⁰Yiitjuku waarrkana tjuṯa tjana ngalya katirra ngaratjunu. Tjana watjaṉu yurrkunytji tjuṯangku tjananya wiipatjarrangku pungkunytjaku. Tjana piyuku tjananya marrkuṉu wiya wangka Yiitjunyatjarra tjakultjunkunytjaku. Yalatji tjananya marrkura iyaṉu.