Tjakultjurinkunytja 1:2-17

²Piipa panyapa wangka tiṉa ngarrinyi, Yiitjulu tjananya ngurra kutjupa ngurra kutjupawana nintira ilkarikutu kaḻpangu. Katutjalu palunya ilkarikutu katinyingka yurrunpa Yiitjulu tjananya nintiṉingi palumpa kutunguḻu tuwalpala, waarrka palumpa tjana palyarinkunytjaku ngurra tjuṯawanangku. Yilta paluru tjana palumpa waarrkana tjuṯa nyinangi. Katutjaku kurrunpangkuṯarra tjananya nintiṉingi, yilta.

³Palumpa kutunguḻu tjuṯangka palumpa walytja kutjupa tjuṯangkaṯarra tjanala Yiitjunya mirringuru kanarringkula yutitjarringangi. Tjuṯangara tjanala yutitjarringkula tjiṉṯu puutiyipalarringu. Yiitjunyaya rawa yutitjarringutja nyangangi. Nyakulaya kulilpayi, “Mirringuru ilta Yiitjunya kanarringkula nyinanyi.” Yiitjulu tjananya yutitjarringkula nintilpayi, Katutjalu yaṉangu tjuṯa ngulytjura yaṉṯayaṉṯantjaku.

⁴Paluru palumpa kutunguḻu tjuṯangka yalatji watjaṉu, “Wiyanyurra kuwarri yankula Tjarutjalumanya wantikatinytjaku, paṯalaya!, Katutjalu nyurrangarrila palumpa kurrunpa nyurrampa ngalya wantirriyara tjarrpatjunku. Panyapa ngayulu nyurrangarrinya yurrunpa watjaṉu, Katutjalu palunya wantirriyalkitjangku watjaṉutjangka.

⁵Tjaanalu tjananya yaṉangu tjuṯa kapingka tjarrpatjunkula papatatjimilalpayi, tjana Katutjaku tjukarurru nyinanytjaku. Tjiṉṯu maṉkurrpa Katutjalulpi nyurrangarrila palumpa kurrunpa tjarrpatjunku nyurrangarri palumpa tjukarurru nyinanytjaku.”

⁶Yiitjuku waarrkana tjuṯangkuya Yiitjula tjungurringkula tjapiṉu, “Mayutju, nyuntu kuwarri mayutjurriku nganampa Yitjurilaku walytja ngaṉṯitja tjuṯaku, yilta?”

⁷Yiitjulu tjananya watjaṉu, “Ngayuku paapangku kutju kuliṉi, ngayulu nyurrangarrimpa mayutjurrinytjaku.

⁸Yilta, Katutjaku kurrunpangku nyurrangarrinya tjarrparra rapalku. Palulanguru nyurrangarri ngayuku wangka ngurra kutjupa kutjupawana tjakultjurinamalpa, Tjarutjalumalawana, manta Tjuutiyalawana, manta Tjamiriyalawanaṯarra, manta kutjupa tjuṯawanaṯarra.”

⁹Wangka yalatji watjara Yiitjunya katu kaḻpangu ilkarikutu, palumpa waarrkana tjuṯangkuya yirra nyanganyingka. Yutuwariwana paluru kaḻpangu ilkarikutu.

¹⁰Kutuya yirra nyangangi, puṯu. Wati kutjarra tjanala yutitjarringu. Mantarra tjulkuratjarrapula tjungurringkula ngarangi.

¹¹Paluru kutjarra tjananya watjaṉu, “Kaliliyinya ngurrara tjuṯangkunyurra wiya yirra nyakunytjaku. Yiitju paluru katu kaḻparra, ngula piyuku ngalyanku. Yutuwariwana paluru kaḻpangu, yutuwariwana paluru piyuku ngalyanku.”

¹²Puḻi Yalipatjalaya ngarala, Yiitjuku waarrkana tjuṯa tawunu Tjarutjalumalakutu yarurringu. Puḻi Yalipatjala Tjarutjalumanya yila ngaranyi.

¹³Tjarutjalumalaya tjarrparra waaḻa panyapakutu tjana yankula, katu kaḻparra nyinangu. Yini yalatji tjana nyinangu, Piitanya, Tjaananya, Tjayimitjanya, Yanturunya, Pilipanya, Tamatjanya, Patjalamanya, Maatjuwunya, Tjayimitjanya kutjupa Yalpiyatjaku katja, Tjaamananya. Paluru Ruumanya ngurrara tjuṯaku tuunlayiki nyinangu. Tjuutatja kutjupaṯarra nyinangu, Tjayimitjaku katja.

¹⁴Paluru tjana tjungurringkula Katutjala wangkapayi, minyma tjuṯaṯarra. Miirinya Yiitjuku maama, Yiitjuku maḻanypa tjuṯaṯarra palunya tjuṯawana tjungurringkupayi.

¹⁵Paluru tjana kututja tjungurringkula Katutjanya tjapiraya waḻkulpayi, Yiitjuku walytja kutjupa tjuṯangkuṯarra. Tjana tjuṯalingku tjungurringu waan antaṯan tuuntiyipala. Paluru tjana Katutjanya wangkarra Piitalu tjananya yalatji watjaṉu,

¹⁶“Walytja tjuṯangkuya kulila! Yurrunpa, Katutjaku kurrunpangku mayutju Tapitanya nintintjala, Tapitalu wakaṉu yara Tjuutatjanyatjarra. Palulanguru wangka palunya iltarringu Tjuutatjanya Yiitjuku waarrkana ilungu. Tjuutatja paluru tjananya nintiṉu, pika pungkupayi tjuṯangkuya Yiitjunya witintjaku.

¹⁷Tjuutatja paluru tjungula Yiitjuku waarrkana nyinangi. Yiitjulu nganaṉanya ngurrtjara nyinatjunu. Paluru pika pungkupayi tjuṯangka nintiṉutjangku mani mantjiṉu. Mani palunyatjarrangku paluru manta payimilaṉu. Manta palula Tjuutatjanya mantakutu punkara mirrirringu. Watiyangka waralyngarala katu punkara mirrirringu, puḻingku yatuntjala ngurrka taara tjarru pakaṉu.