Tjakultjurinkunytja 19:9-18

⁹Paluru tjana palumpa wangka kulilwiyangku wantirra Yiitjukuṉu wangka panypurangu, yaṉangu kutjupa tjuṯa tjungu nyinanytjala. Palulanguru Puulalu tjananya Yiitjuku walytjarringutja tjuṯa watjaṉu ngurra kutjupangka tjungurringkunytjaku. Tjana yanu waaḻa tiṉa kutjupangka tjungurringkula nyinakitja. Waaḻa palumpa wati Taranatjanya mayutju nyinangu. Waaḻa palula yaṉangu tjuṯa tjungurringkupayi yara kulilkitja. Waaḻa palula tjiṉṯu tjuṯangka Puulalu Yiitjuku walytja tjuṯa, yaṉangu kutjupa tjuṯaṯarra tjananya nintiṉangi. Yalatji paluru nintintjala tjana puṯu kulira tjapilpayi tjukarurru nintirrikitjangku.

¹⁰Yiiya kutjarrangka Puulalu tjananya waaḻa palula nintiṉangi. Palulanguru Yiitjukuṉu wangka Tjuwu tjuṯangku, Kiriki wangkatjarra tjuṯangkuṯarra kuliṉu.

¹¹Palulanguru Puulalu Yiitjukuṉu ngangkaritjarrangku kutjupa kutjupa palyalpayi.

¹²Palulanguru yaṉangu tjuṯangkuya rayikitjarrangku Puulanya pampura rayiki katipayi, yaṉangu miiṉṯakutu. Miiṉṯangka rayiki tjunkunytjala, palyarringkupayi. Alatji mamutjarra tjuṯa palyarringkupayi rayikitjarrangku pampuntjala.

¹³Palulanguru Tjuwu kutjupa tjuṯaya ngangkaritjarra nyinapayi. Paluru tjana ngurra tjuṯawana parra yankupayi mamutjarra tjuṯa palyantjaku. Paluru tjana Yiitjula yiningka watjara mamu payira iyalpayi. Tjana wiya Yiitjuku walytja nyinapayi. Wangka yalatjiya mamutjarra tjuṯangka watjalpayi, “Puulalu tjananya yaṉangu tjuṯa wangka Yiitjunyatjarra nintilpayi. Yiitjukuṉu ngangkaritjarrangku ngayulu nyuntula mamu ngaatjanya payira wantirriyaṉi.”

¹⁴Palunya tjuṯa nguwanpa Kiipaku katja tjapanpala nyinangu. Kiipa paluru tuḻkuku mayutju nyinangu. Katja paluru tjana mamutjarra tjuṯangka wangka palunya Yiitjunyatjarra watjalpayi mamu iyalkitjangku. Paluru tjana mamutjarraku waaḻakutu yanu mamu payira wantirriyantjaku. Paluru tjana mamu payiṉingka,

¹⁵mamungku tjananya watjaṉu, “Ngayulu ninti Yiitjuku, Puulaku. Nyurrangarrimpa ngayulu ngurrpa.”

¹⁶Wati paluru mamutjarrangku tjananya pungkula wantirriyaṉu, waaḻa palula. Mantarra tjanampa paluru yarrara wintarrpungkula payira iyaṉu. Paluru tjana mikintjarralpiya tjalkaḻungu.

¹⁷Yalatji wati paluru mamutjarrangku tjananya pungkula wantirriyaṉutjangka Yipitjanya ngurrara tjuṯangku, Tjuwu tjuṯangku, Tjuwuwiya tjuṯangkuṯarraya yalatji kuliṉu, “Katja paluru tjana wiya Yiitjuku walytja nyinanyi, tjana yini Yiitjunya watjalwiyangku wantimara mamu payilkitjangku. Paluru tjana wiyawanangku palyaṉingka mamutjarra palunya Yiitjulu nintiṉu tjananya payira pungkula iyantjaku. Yiitjunya yilta mayutju tiṉa nyinanyi.”

¹⁸Palunya ngurrara tjuṯa Yiitjuku walytjarringkula miitingingka tjungurringkupayi. Tjana Katutjala tjakultjunkupayi, yurrunpaya kuya palyaṉutjangku.