Tjakultjurinkunytja 16:4-18

⁴Palulanguru Tawunu tjuṯawana tjana yankula Yiitjuku walytja tjuṯangka tjanala luwu panyapa tjuṯa nintirinangi. Paluru tjana ngurra tjuṯawana tjanala watjaṉu luwu panyapa maṉkurrpawana tjana tjukarurru nyinanytjaku. Luwu panyapa maṉkurrpa Yiitjuku waarrkana tjuṯangku, mayutju tjuṯangkuṯarra Tjarutjalumala wakara tjunu.

⁵Palulanguruya Yiitjuku walytja tjuṯa ngurra palunya tjuṯawana, Yiitjuku rapa nyinangi. Yaṉangu kutjupa tjuṯangku Yiitjuku wangka kulira walytjarringu. Paluru tjana tjuṯalingkulpiya nyinangu.

⁶Puulalungarri manta Puritjiyalawana yankula, manta Kilitjiyalawanangku Yiitjukuṉu wangka tjana tjakultjurinangi. Manta Yayitjalawanaṯarra tjana tjakultjurinkukitjangku kuliṉu. Katutjaku kurrunpangku tjananya nintiṉu, manta palulawana wiya tjana tjakultjurinkunytjaku.

⁷Manta Matjiyalakutu tjana yankula kuliṉu manta Pitjiniyalakutu yankukitjangku. Yiitjuku kurrunpangku tjananya marrkuṉu wiya manta palula tjarrpanytjaku.

⁸Palulanguru tjana ngurra palulamarra kutu manta Matjiyalawana yankula tawunu Taruwatjalalpi tjarrpangu.

⁹Mungangka Puulalu tjukurrpa nyangu, wati paluru ngaranytjala, panya manta Matjatuniyanya ngurrara. Wati paluru Puulalakutu yalatji wangkangu, “Nganampa ngurrakutu ngalya yarra!, manta Matjatuniyalakutu, nganaṉanya nintintjaku.”

¹⁰Puulalu panyapa tjukurrpa nyangutjangku tjakultjunanyingka, tjungungku nganaṉa kuliṉingi manta Matjatuniyalakutu yankukitjangku. Ngayulu Luukanyaṯarra riirrirringu, yalatji kulira, “Katutjalu iltalanya watjaṉu manta Matjatuniyalawana Yiitjuku wangka tjakultjurinkunytjaku.”

¹¹Puutangkalatju kaḻpakatirra yanu manta Tjamutjaritjalakutu. Palulanguru tjiṉṯu kutjupangkalatju piyuku puutangka kaḻparra yanu tawunu Niyapulatjalakutu.

¹²Palulangurulatju tawunu Pilipayilakutu tjina yanu. Yurrunpa tawunu palunya tjuulytji tjuṯangku palyaṉingi, Ruumanya ngurrara tjuṯangku. Pilipayinya tawunu puntu ngarangu, tawunu kutjupa tjuṯa wiima nguwanpa ngarangu. Tawunu palulalatju rawa nyinangi, tjiṉṯu maṉkurrpa.

¹³Tawunu palula ila karru ngarringi. Tjarritiyilatju karru palulakutu yankula nyangu Tjuwu tjuṯaya tjungurringkunytjala. Paluru tjana rawa karru palula tjungurringkupayi, Katutjala wangkanytjaku. Nganaṉa minyma tjuṯangka tjungurringkula nyinarra wangkangi.

¹⁴Minyma paluru tjanala minyma yini Litiyanya nyinangu, Tjayataranya ngurrara, Katutjaku walytja. Paluru mantarra palya waarrkana tjuṯangka mantjira tjalamilalpayi. Minyma paluru Puulaku wangka kulira Yiitjuku walytjarringu, Katutjaluṯarra palunya nintintjala.

¹⁵Paluru tjana Puulalungarri Litiyanya palumpa ngulytju tjuṯaṯarra kapingka papatatjimilaṉu. Litiyalu Puulanyangarri tjananya tjapiṉu, “Nyurrangarri ngayuku ngurrakutu ngalyarra!, nyinanytjaku.” Tjana kulira wiya wangkangu. Litiyalu tjananya piyuku watjaṉu, “Kuwarri ngayulu yilta Yiitjuku walytjarringu. Palulanguru nyurrangarri ngayuku waaḻakutu ngalyarra!, nyinanytjaku.” Yalatji paluru nganaṉanya tjuṯangara watjantjala, yanulpilatju palumpa ngurrangka nyinangi.

¹⁶Litiyaku ngurrangkalatju nyinarra karru palulakutulatju yanangi, Katutjanya tjapintjaku. Ngururrpalatju yankunytjala, kungka yukarra paluru mamutjarra ngalyankula tjungurringu. Yaṉangu tjuṯangku kungka palunya nyakula kulilpayi, “Yukarra paluru ninti nyinanyi, ngula yaalytjiyaalytji ngaranytjaku. Mamungku nintintjala paluru tjukarurru watjalpayi.” Yaṉangungku tjapintjala kungka paluru mani tiṉaku tjapilpayi. Yukarra paluru mani mantjira yalatji watjalpayi, “Ngulanu nyinaku yalatji.” Yukarra paluru mani palunya mantjira palumpa mayutju maṉkurrpaku yungkupayi. Yalatji yukarra paluru wati mayutju maṉkurrpaku waarrkarringkupayi. Palulanguru mayutju paluru tjana mani tiṉatjarra nyinangi.

¹⁷Yukarra paluru nganaṉanya Puulanyangarri wanara yalatji rapangku watjalpayi, “Ngaa tjuṯaya mayutju Katutjaku waarrkana tjuṯa ngaranyi. Ngaa tjuṯangku nyurrangarrinya tjakultjunkupayi kana kutunyurra nyinanytjaku Katutjaku ngurrangka.”

¹⁸Yalatji tjananya rawangku wanara watjarinkupayi, tjiṉṯu maṉkurrpa. Palulanguru Puulalu kuliṉu, “Mamungku kungka ngaatja kuyantjala paluru nganaṉanya ramaṉi.” Paluru ngaṉṯikutu taaṉarringkula mamu palunya payiṉu alatji, “Yiitju Kurayitjakuṉu ngangkari tiṉatjarrangkuṉanta watjaṉi. Yukarra ngaangkamarra wantirra yarra!” Ilta mamu paluru yukarra palunya wantirra yanu.