Tjakultjurinkunytja 13:32-46

³²Yirriṯi Katutjalu nganampa walytja yurruntitja tjuṯa tjananya watjaṉu, ngula Kurayitjanya mirringuru pakaltjingalkitjangku. Wangka palunya iltarringu. Katutjalu Yiitjunya mirringuru pakaltjingaṉu, yalatjilatju nyurrangarrinya tjakultjunanyi. Yalatji mayutju Tapitalu Katutjaku wangka wakaṉu, yini tuḻku nampa tuu. Tuḻku palunya yalatji ngarrinyi, ‘Nyuntu ngayuku katja nyinanyi. Ngayulu kuwarri tjananya nintiṉu, nyuntu ngayuku katja nyinanyingka.’”

³⁴Puulalu tjananya piyuku nintiṉu yalatji, “Piyuku Katutjalu watjaṉu Yiitjunya mirringuru pakaltjingalkitjangku, mirri kutu ngarrirra yuṉarritjipingka. Yalatji palumpa wangka piipangka ngarrinyi, ‘Ngayulu mayutju Tapitala yirriṯi watjaṉu palumpa walytja ngaṉṯitja kana kutu nyinanytjaku.’

³⁵Tapitaku tuḻku kutjupa ngarrinyi yalatji, ‘Katutjalu wiya palumpa waarrkana nyinatjunutja wantiku mirri ngarrirra yuṉarrinytjaku.’

³⁶Mayutju Tapita paluru Katutjaku wangka kulira tjukarurru nyinapayi. Katutjalu yiltangku palunya watjaṉu mayutju nyinanytjaku. Yalatji palya nyinarra palurulpi mirrirringu. Mirrirringanyingka palumpa walytja tjuṯangku tjimitiringka tjunu, walytja kutjupa tjuṯangka. Paluru ilta ngarrirra yuṉarringu. Wangka palunya yalatji ngarrinyi, ‘Katutjalu wiya palumpa nyinatjunutja wantiku yuṉarrinytjaku.’ Katutjalu nyinatjunutja waarrkana palunya wiya nganaṉa mayutju Tapitanya kulintjaku, paluru mirri ngarrirra yuṉarringu.

³⁷Katutjalu nyinatjunutja waarrkana palunya, ngananya?, Yiitjunya. Katutjalu palunya mirritjanu pakaltjingantjala, wiya paluru mirri ngarrirra yuṉarringu.

³⁸“Walytja tjuṯa, wangka ngaatjanya nyurrangarri kulintjaku. Yiitjulu kutju nyurrangarrimpa kuya waṉiku, nyurrangarri palumpa wangka kulira walytjarrinytjala, palunyatjanu nyurrangarri Katutjaku kalyparriku. Muutjakuṉu luwuwananyurra nyinanytjala Katutjalu nyurrangarrimpa kuya wiya waṉirra kalyparriku.

⁴⁰Wangka palunya Yiitjunyatjarra nyurrangarri kulintjaku. Tjingurunyurra kulira wantinytjala Katutjalu nyurrangarrinya ngula payira iyalpayingka. Katutjaku wangka watjalpayi tjuṯangku watjaṉu Katutjaku wangka kulira wantipayi tjuṯa ngula payira iyalku. Yalatji tjana watjaṉu,

⁴¹‘Nyurrangarri kulira wantipayi tjuṯa nyinanyi. Katutjalu ngula kutjupa kutjupa palyalku. Paluru yalatji palyantjala nyakulanyurra nguḻurringkula mirrirriku. Katutjalu yalatji palyantjala yurrunpa tjinguru yaṉangungku tjakultjunku. Tjakultjunkunytja palunyanyurra kulira wantiku.’ Yalatji Puulalu tjananya tjakultjunkula wantingu.”

⁴²Piipa wiyarringanyingka, Puulanya Panapatjanya Tjuwuku tjaatjinguru pakaṉu ngurrakutu yankukitja. Tjaatji palunya ngurrara tjuṯangku pulanya watjaṉu Tjarritiyi kutjupangka wangka palulawana piyuku nintintjaku.

⁴³Paluru tjana ngurrakutu kutjupa kutjupakutu yanu. Kutjupa tjuṯangku Puulaku wangka tjaatjingka kulira palunya kutjarra wanaṉu, wangka pulampa kulilkitjangku, Tjuwu tjuṯangku, Tjuwuwiya tjuṯangkuṯarra. Tjuwuwiya paluru tjana Tjuwu nguwanpangku Katutjanya waḻkulpayi. Paluru kutjarra tjananya wangkarra wantirriyalkitjangku watjaṉu, “Yiitjuku nyurrangarri kutu tjukarurru nyinanytjaku.”

⁴⁴Palulanguru Tjarritiyi kutjupangka yaṉangu tjuṯalingkuya tjaatji panyapangka tjungurringu, wangka Kurayitjanyatjarra kulilkitja.

⁴⁵Yaṉangu tjuṯalingku tjungurrinytjala Tjuwuku tjaatji ngurrara tjuṯangkuya nyakula Puulaku Panapatjaku mulyarrarringkula kuliṉingi, “Ngaa kutjarra wiya ingkaṯa tiṉa. Yaṉangu tjuṯa wiya ngaa kutjarraku wangkaku yunyparringkunytjaku. Nganampa wangkaku kutju tjana yunyparrinytjaku.” Yalatji kulira paluru tjana Puulanya wangkanyingka panypurangangi.

⁴⁶Puulalu Panapatjalu tjananya raparringkula watjaṉu yalatji, “Tjuwu tjuṯa, kulilalinyatju! Katutjalulinyatju nintiṉu ngalitju Katutjaku wangka nyurrangarrinya yurrunpa nintintjaku. Nyurrangarri kulira wantingutjangka, kala ngalitju Tjuwuwiya tjuṯangkalpi yankula nintilku tawunu ngaangka. Yalatjinyurra wangka Kurayitjanyatjarra kulira wantirra wiyanyurra kana nyinamalpa Katutjaku ngurrangka.