Tjakultjurinkunytja 11:19-29

¹⁹Yiitjuku yunytjuwiya tjuṯangku yirriṯi Tiipananya iluntara, Yiitjuku walytja kutjupa tjuṯakulpiya ngurririnangi mirri pungkukitjangku. Palulanguruya Yiitjuku walytja tjuṯa nguḻu yankula waṉingu manta tjuṯawana. Kutjupa tjuṯa tjana manta Panitjiyalakutu yankula nyinangi, kutjupa tjuṯa manta Tjapurritjalakutu, anta tawunu Yantiyukalakutuṯarra yankula nyinangi. Paluru tjana Tjuwu tjuṯangka kutju tjanala, Yiitjukuṉu wangka tjakultjurinangi. Tjuwuwiya tjuṯa tjana nyakula wantipayi Yiitjukuṉu wangka tjakultjunkunytjawiyangku.

²⁰Yiitjuku walytja tjaampalangkuya, manta Tjapurritjanya ngurrara tjuṯangku, manta Tjayirininya ngurrara tjuṯangkuṯarra yankula wangka Yiitjunyatjarra tjakultjunu Tjuwuwiya tjuṯangka, tawunu Yantiyukala.

²¹Katutjalu tjakultjunkupayi palunya tjananya rapaṉu tjukarurru Yiitjukuṉu wangka nintintjaku. Yantiyukanya ngurrara tjuṯalingkungkuya Yiitjukuṉu wangka kulira palumpa walytjarringu.

²²Yiitjuku walytja Tjarutjalumanya ngurrara tjuṯangkuya tjakulpa kuliṉu, Yantiyukanya ngurrara tjuṯaya Yiitjuku walytjarringkula nyinangutjangka. Tjakulpa kulira tjana Panapatjanya wantirriyaṉu tawunu Yantiyukalakutu.

²³Tawunu palula Panapatjanya tjarrparra Yiitjuku walytja Tjuwuwiya tjuṯa nyakula yunyparringu, Katutjalu tjananya yunypalingku palyaṉutjangka. Panapatjalu tjananya tjungura nintiṉingi tjukarurru kutu Yiitjuku nyinanytjaku.

²⁴Katutjaku kurrunpangku rapara kanyintjala Panapatjalu palumpa wangka tjukarurru kulira tjananya nintiṉingi. Palulanguru Yantiyukanya ngurrara kutjupa tjuṯangku Yiitjukuṉu wangka kulira palumpa walytjarringu.

²⁵Palulanguru Panapatjanya tawunu Taatjatjalakutu yanu, wati Tjuulaku ngurrilkitja.

²⁶Tjuulanya nyakula wangkangu tawunu Yantiyukalakutu yaḻṯirra katikitjangku. Panapatjalu Tjuulanya katingu, tawunu palulakutu. Paluru kutjarrapula Yiitjuku walytja tjuṯa nintiṉingi, rawangku, yiiya kutju. Yiitjuku walytja paluru tjana tjungurrinytjala yaṉangu Yantiyukanya ngurrara tjuṯangku wangka yalatji watjalpayi, “Kurayitjaku walytja tjuṯaya tjungurrinyi.” Yurrunpa Yiitjuku walytja tjuṯa nyakula kutjupa tjuṯangku wiya wangka yalatji, “Kurayitjaku walytja tjuṯa” watjalpayi, Yantiyukanya ngurrara tjuṯangku kutju. Yaṉangu ngaṉṯitja tjuṯangku wangka yalatji, “Kurayitjaku walytja tjuṯa” watjalpayi.

²⁷Palulanguruya Katutjaku wangka watjalpayi tjuṯaya Tjarutjalumalanguru tawunu Yantiyukalakutu yanu.

²⁸Katutjaku wangka watjalpayi palunya tjuṯawana kutju yini Yakapatjanya nyinangi. Paluru tjana Yiitjuku walytja tjuṯangka tjungurringkula Yakapatjalu ngarala tjananya watjaṉu, “Katutjaku kurrunpangku ngayunya nintiṉu yalatji. Ngurra tjuṯawana ngula mangarri yaṉangu tjuṯaku wiyarriku. Yaṉangu tjuṯangku, nganaṉaṯarra puṯu kulilku mangarriku.” Wangka palumpaṉu ngula yiltarringu, mayutju Kulutiyatjanya tawunu Ruumala nyinanytjala.

²⁹Yakapatjaku wangka tjana kulira wangkangu, “Nganaṉa uwankarrangku mani tiṉa waṉinytjaku. Mani waṉingutja maṉkurrpangku Tjarutjalumalakutu katirra Yiitjuku walytja tjuṯa yungkunytjaku. Mangarri tjanampa manta Tjuutiyanya ngurrara tjuṯaku pakantjawiyangka, mani palunyatjarrangkuya mangarri payimilantjaku.”