Tjakultjurinkunytja 10:6-22

⁶Tjaamana kutjupangka paluru nyinanyi, laatja palyalpayingka. Palumpa waaḻa, yurungka tjayiṯi ngaranyi.”

⁷Ilkari ngurrara paluru wangka panyapa wangkarra Kuuniliyatjanya wantikatirra yanu. Palulanguru Kuuniliyatjalu tjananya yaḻṯingu, palumpa waarrkana kutjarra tjuulytji kutjuṯarra. Tjuulytji paluru maḻpangku Kuuniliyatjanya yaṉṯayaṉṯalpayi, paluru Katutjaku tjukarurru nyinapayi.

⁸Ilkari ngurrarangku watjaṉutjangka tjakultjunkula Kuuniliyatjalu tjananya iyaṉu, tawunu Tjuupalakutu.

⁹Wati panyapa maṉkurrpaya yankula mungarringu. Kutuya yankula tjiṉṯurringkula tjana yankula aaa tawunu Tjuupala ilarringu, kaḻaḻa. Piitanya waaḻangka katu kaḻpangu, Katutjala wangkakitja.

¹⁰Kaḻparra paluru tjapira paḻtjatjirratjarringu, mangarri waaḻa ngurrarangku kuwarripa kutjantjala.

¹¹Paluru paṯara tjukurrpalpi nyangu, ilkari alytjurankunytjala, kaliki tiṉa ilkaringuru ngalya tjarutjunutjangka. Kaliki kuuna puupala ruupa nguwanpatjarra karrpira tjarutjunutjangka nyangu.

¹²Kaliki palula aṉangungku ngaa tjuṯa wiya ngalkupayi. Ngarangiya kukawiya tjuṯa tuungkiyi kamula, tjuḻpu yalatji, piḻkaṯiṯarra ngarringi. Kukawiya palunya tjananya Tjuwu tjuṯangku ngalkuwiyangku wantipayi, luwu tjanampa yalatji ngarapayi.

¹³Ilkari katunguru Piitanya watjaṉu, “Piita, pakara kukawiya ngaa tjuṯanya pungkula ngalkula!”

¹⁴Piitalu watjaṉu, “Mayutju. Luwu yalatji ngaranyilampatju, nganaṉa ngalkuwiyangku wantipayi. Ngayuluṉa pala tjuṯa ngalkuwiyangku wantinyi, ngayulu luwu palunya wiya kilytjuntankunytjaku.”

¹⁵Ilkari katunguru Piitanya piyuku watjaṉu, “Wiya. Katutjalu watjaṉu pala tjuṯa palya nyuntu ngalkuntjaku. Nyuntu ngalkura wiya palumpa luwu kilytjuntankuku.”

¹⁶Yalatji ilkari katunguru watjaṉu maṉkurrngara. Palunyatjanu wangkarra wiyarringutjangka, kaliki paluru piyuku katukutu kaḻpangu.

¹⁷Yalatji nyakula Piitalu puṯu kuliṉingi, “Nyaa ngayunya nintilkitjangku tjukurrpa nintiṉu?” Yalatji kulintjala paluru wati panyapa maṉkurrpaya yankula kiiṯangka wirrkara ngarangu, Kuuniliyatjalu wantirriyaṉutja tjuṯanya.

¹⁸Kiiṯangkaya ngarala tjapiṉu yalatji, “Tjinguru Tjaamana Piitanya waaḻa ngaangka nyinanyi?”

¹⁹Piitalu tjukurrpa panyapa nyakula kutu puṯu kulintjala, Katutjaku kurrunpangkulpi palunya watjaṉu, “Kulila! Wati maṉkurrpangku nyuntunyaya wati Tjuwuwiya maṉkurrpangku tjapiṉu kiiṯangka aatjayiṯinguru ngarala.

²⁰Pakara tjarukatirra palula tjanalawana nyuntu kuwarri palya yankunytjaku. Luwu nyurrangarrimpaṉu puntura kulintjawiya nyuntu tjanalawana yankunytjaku. Ngayulu watjaṉu tjana nyuntunya ngurrira mantjira maḻaku katinytjaku.” Tjuwu tjuṯaku luwu ngarangi, tjana wiya Tjuwuwiya tjuṯawana tjungu yankunytjaku.

²¹Piitalu tjarukatirra tjananya tjapiṉu, “Nyurrangarri ngayuku tjapiṉu? Nyaakitjanyurra ngalyanu?”

²²Tjana Piitanya watjaṉu, “Nganampa mayutju Kuuniliyatjalu nganaṉanya iyaṉulanyatju. Paluru tjuulytji tjuṯaku mayutju nyinanyi, Katutjaku walytja. Tjuwu tjuṯangkuya watjalpayi yalatji, ‘Kuuniliyatjanyakunyu palya nyinanyi, nganampa ngulytju.’” Paluru tjana piyuku watjaṉu yalatji, “Ilkari ngurrarangku Kuuniliyatjanya watjaṉu, nyuntu kuwarri palumpa ngurrakutu yankula wangka tjakultjunkunytjaku.”