Tjakultjurinkunytja 10:19-33

¹⁹Piitalu tjukurrpa panyapa nyakula kutu puṯu kulintjala, Katutjaku kurrunpangkulpi palunya watjaṉu, “Kulila! Wati maṉkurrpangku nyuntunyaya wati Tjuwuwiya maṉkurrpangku tjapiṉu kiiṯangka aatjayiṯinguru ngarala.

²⁰Pakara tjarukatirra palula tjanalawana nyuntu kuwarri palya yankunytjaku. Luwu nyurrangarrimpaṉu puntura kulintjawiya nyuntu tjanalawana yankunytjaku. Ngayulu watjaṉu tjana nyuntunya ngurrira mantjira maḻaku katinytjaku.” Tjuwu tjuṯaku luwu ngarangi, tjana wiya Tjuwuwiya tjuṯawana tjungu yankunytjaku.

²¹Piitalu tjarukatirra tjananya tjapiṉu, “Nyurrangarri ngayuku tjapiṉu? Nyaakitjanyurra ngalyanu?”

²²Tjana Piitanya watjaṉu, “Nganampa mayutju Kuuniliyatjalu nganaṉanya iyaṉulanyatju. Paluru tjuulytji tjuṯaku mayutju nyinanyi, Katutjaku walytja. Tjuwu tjuṯangkuya watjalpayi yalatji, ‘Kuuniliyatjanyakunyu palya nyinanyi, nganampa ngulytju.’” Paluru tjana piyuku watjaṉu yalatji, “Ilkari ngurrarangku Kuuniliyatjanya watjaṉu, nyuntu kuwarri palumpa ngurrakutu yankula wangka tjakultjunkunytjaku.”

²³Palulanguru Piitalu tjananya watjaṉu, “Palya nyurrangarri waaḻa ngaangka tjarrparra ngalkura ngarrinytjaku, aaḻi yankukitja.” Tjiṉṯurringkula pakara tjana tjungu yanu tawunu Tjiitjarriyalakutu, Yiitjuku walytja tawunu Tjuupanya ngurrara tjuṯaṯarra.

²⁴Ngururrpa tjana ngarrirra aaḻi tawunu Tjiitjarriyalaya tjarrpangu. Kuuniliyatjalu yurrun yurrunpangku kulira tjunguṉu tjananya, palumpa walytja tjuṯa, walytja yilatja tjuṯaṯarra.

²⁵Kuuniliyatjaku waaḻa yurilpangka Piitanyapula Kuuniliyatjanya tjungurringu. Tjungurringkula Piitala pupakatirra palunya waḻkuṉu.

²⁶Piitalu witira palunya ngaratjunkula watjaṉu, “Ngayulu wiyaṉa mayutju tiṉa nyinanyi, nyuntu wiya ngayunya waḻkuntjaku.”

²⁷Wangkarrapula waaḻangkalpi maa tjarrpangu. Tjarrparra tjananya Piitalu nyangu yaṉangu tjuṯa nyinanyingka.

²⁸Piitalu tjananya Tjuwuwiya tjuṯa watjaṉu yalatji, “Nganaṉatju Tjuwu tjuṯangku yaṉangu Tjuwuwiya tjuṯa nyakula wantipayi tjungurrinytjawiyangku, nganampatju luwu yalatji ngaranytjala. Yalatjikunyurra ninti nyinanyi. Katutjalulpiṉi nintiṉu luwu nganampa wantirra nyurrangarrilawana tjungurrinytjaku.

²⁹Katutjaluṉi yalatji nintintjala luwu palunya wantirra ngayulu nyurrangarrimpa walytja tjuṯawana tjungurringkula ngalyanu. Nyurrangarri nyaakitjangku ngayunya watjaṉu ngalya yankunytjaku?”

³⁰Kuuniliyatjalu watjaṉu, “Mungaṯu ngayulu mungarrtji yalatjipuru Katutjala wangkangi, ngurra ngaangka, kanya ilkari ngurrara ila ngarakatingu, mantarra palumpa yirrnyaṉingi.

³¹Paluruṉi watjaṉu, ‘Kuuniliyatja. Katutjanya nyuntupa yunyparringangi nyuntu maralpa tjuṯa yaṉṯayaṉṯaṉingitjangka. Nyuntu palunya tjapintjala palurunta kulilpayi rawangku.’

³²Piyukuṉi watjaṉu ilkari ngurrarangku, ‘Waarrkana maṉkurrpa tjananya wantirriyala!, tawunu Tjuupalakutu wati kutju yaḻṯirra ngalya katinytjaku, yini Tjaaman Piitanya. Tjaamana kutjupangka paluru nyinanyi, laatja palyalpayingka.’

³³Ilkari ngurrarangku panyapa watjaṉutjangka, ngayulu waarrkana tjuṯa parrpaṯu yaḻṯirra iyaṉu nyuntunya yaḻṯirra ngalya katinytjaku. Palya nyuntu kulira ngalya yanu. Katutjanya nganaṉalawana kuwarri nyinanyi. Kala, nyuntu palumpa wangkalanyatju tjakultjurra!”