Tjaanakuṉu 3:3-18

³Yiitjulu palunya watjaṉu, “Wangka ngaatjanya kulila! Yaṉangu piyuku yutitjarrirra kutju, Katutjaku walytja tjuṯangka tjungurringkula nyinaku. Katutjalu palunya tjananya ngulytjura yaṉṯayaṉṯanmalpa.”

⁴Nikatimatjalu watjaṉu, “Yaalytjiyaalytji wati tjiḻpi piyuku yutitjarringanyi? Wiya maamangka wiḻangkarringkula piyuku yutitjarriku.”

⁵Yiitjulu palunya watjaṉu, “Wangka ngaatjanya kulila!, maṯupurra. Yaṉangu papatatjirringkula piyuku yutitjarringanyi, Katutjaku kurrunpa tjarrpanytjala. Yalatji piyuku yutitjarrinytjala Katutjalu yaṉangu palunya ngulytjulku palumpa walytja tjuṯawana nyinanytjaku.

⁶Nganaṉa paapanguru maamanguru yutitjarringkula mantangka kana nyinanyi. Katutjaku kurrunpa nganaṉala tjarrpangutjangka nganaṉa piyuku yutitjarriku palumpa walytja tjuṯa kana kutu nyinanytjaku, palumpa katja tjuṯa, yuṉṯalpa tjuṯaṯarra.

⁷Nyuntu piyuku yutitjarringkula nyinanytjaku. Wangka yalatji ngayuluṉanta watjaṉutjangka wiya nyuntu puṯu kulintjaku.

⁸Katutjaku kurrunpa nyuntula tjarrpangutjangka kutju nyuntu piyuku yutitjarringkula kana kutu nyinaku. Nyuntu waḻpa warri wangkanytjala kulira puṯu kulilpayi, ‘Tjinguru waṉmatjanu waḻpa warri wangkanyi, tjinguru yilatjanu. Yaalytjingka wiyarringanyi?’ Waḻpa palunya nguwanpa Katutjaku kurrunpa nganaṉala tjarrpanytjala nganaṉa nyakunytjawiya, paluru walytjangku kulira yaṉangungka tjarrpanyi. Katutjalu palumpa kurrunpangkuṯarra yaṉangungka tjarrparra ngulytjuṉi, kana kutu nyinanytjaku.”

⁹Nikatimatjalu watjaṉu, “Yaalytjiyaalytji Katutjaku kurrunpangku yalatji palyaṉi?”

¹⁰Yiitjulu Nikatimatjanya watjaṉu, “Tjuwu tjuṯa tjananyan nyuntu nintilpayi, nintingkun tjukarurrungku ngayuku wangka kulinmara.

¹¹Wangka tjukarurruṉanta watjaṉi. Nintingkulitjunta wangka panyapa nintiṉi, paapa Katutjaluṯarra. Yaṉangu tjuṯangkunyurra ngalimpaṉu wangka kulira wantipayi.

¹²Mantangka yaṉangu tjuṯangku kuliṉi wangka kapitjarra, wangka waḻpatjarra, wangka pipirri yutitjarrinytjatjarra. Wangka palunya tjuṯa nyuntu puṯu kuliṉingi. Ngayulu puṯu kuliṉi wangka kutjupa yilkaritjatjarra nintilkitjangku, nyuntu wangka panyapa puṯu kuliṉutjangka.

¹³Yaṉangu wiya ilkarikutu Katutjaku ngurrakutu kaḻpangu, palumpa ngurraku yaṉangu ngurrpa. Kutju wiya kutju ninti nyinanyi, ngayuluṉa yaṉanguku katja. Ilkaringuruṉa ngalya tjarukatingu.

¹⁴Mayutju Muutjalu ngurra kapiwiyangka waralytjunu piḻkaṯi nguwanpa yayina. Palunya nguwanpa ngayunyaṉiya, yaṉanguku katjaṉi waralytjunku.

¹⁵Ngayulu waralyngarangitjangka, ngaṉṯi yaṉangu tjuṯangku ngayuku wangka kulilku. Kulira walytjarringkula tjana kana kutu nyinamalpa.”

¹⁶Ngayulu Tjaanalu piipa ngaatjanya wakaṉi, wangka yalatjiṯarra, “Katutjanyalampa yaṉangu yuwankarraku yunytju nyinarra palumpa katja kutjulampa mantakutu wantirriyaṉu, waralyngarala mirrirrinytjaku. Katutjalu wantirriyalkitjangku kuliṉu yaṉangu tjuṯangku palunya Katutjaku katjanya kulira kana kutuya nyinanytjaku, kutu mirri ngarrirra wiyarrinytjawiya.

¹⁷Katutjalu katja palunya mantakutu ngalya wantirriyaṉu yaṉangu yuwankarraku kuya waṉinytjaku, nganaṉa palumpa ngurrangka kana kutu nyinaku, wiya palunya wantirriyaṉu nganaṉanya yalatji watjantjaku, ‘Nyurrangarri kutu kuya palyantjala, ngula kuutawutjungka Katutjalu nyurrangarrinya watjalku warungka waṉikitjangku.’ Wiya yalatji watjantjaku palumpa katja ngalya wantirriyaṉu. Palunya wantirriyaṉu aṉangu tjuṯangku palumpa wangka kulira kana kutuya nyinanytjaku.

¹⁸Yaṉangungku palumpa wangka kulintjala wiya Katutjalu kuutawutjungka watjalku warungka waṉikitjangku. Yaṉangu tjuṯangku Katutjaku katjakuṉu wangka kulira wantinyingka Katutjalu kuwarri kuliṉi yaṉangu palunya tjuṯa warungka waṉikitjangku.