Tjaanakuṉu 2:5-18

⁵Miirilu tjananya waarrkana tjuṯa watjaṉu, “Yiitjulu nyurrangarrinya watjaṉingka yalatjiya palyala!”

⁶Turaama tiṉa tjikitjipala puḻitjanu palyaṉutja ngarangi, kapiwiya. Waarrkana tjuṯangku turaamangka kapi kaṯira yaṉangu tjuṯa tjananya mara tjinaṯarra paltjilpayi. Tjuwu tjuṯangkuya kututja yalatji paltjilpayi. Paltjiraya kapi wiyaṉu. Turaama paluru tjana kapiwiya yuḻṯu ngarangi.

⁷Yiitjululpi tjananya waarrkana tjuṯa watjaṉu, “Turaama panyapa tjuṯangka yintira pilimapamilala kapingka!” Kapiya kaṯira katirra tjutira ngarangi, turaama tjikitjipala panyapangka.

⁸Piyuku Yiitjulu tjananya watjaṉu, “Kaṯiraya katirra yuwa!, nyurrangarrimpa mayutju.” Kaṯiraya katirra palunya yungu.

⁹Mayutju paluru tjikira yarrkaṉu wayinarringutjalpi. Paluru ngurrpa nyinangu kapitjanu wayinarringutjangka. Waarrkana tjuṯaya ninti nyinangi, kapitjanu wayina palyaṉutjatjanungka.

¹⁰Yarrkara mayutju paluru yaḻṯingu, wati palunya miiṯatjarralpi nyinanyingka. Paluru watjaṉu, “Nyuntu wayina palyalingku ngaatjanya kuwarri yungu nganaṉa tjikintjaku. Ngurra kutjupa tjuṯangka tjana wayina palya yurrunpa yungkupayi tjikintjaku. Yaṉangu tjuṯangkuya tjikira paḻtjarringanyingka, wayina kuyalpi tjananya yungkupayi. Kuwarrilpilanyatjun wayina palyalingku yungu, kuyawiya.”

¹¹Yuwa, tawunu Kayinala yuru Kaliliyila wilurarra Yiitjulu yalatji kapitjanu wayina palyaṉu, ngangkari tiṉatjarrangku, wiya palunya nguwanpa yurrunpa Yiitjulu Katutjakuṉu ngangkaritjarrangku palyaṉu, wiya. Palumpa kutunguḻu tjuṯangku nyakula kuliṉu, “Katutjakuṉu ngangkari tiṉatjarrangku paluru wayina kapitjanu palyaṉu.”

¹²Palulanguru Yiitjunya tjanalawana tjungu tawunu Kapaniyamalakutu yanu. Yalatjiya tjungu yanangi palumpa maama, palumpa maḻanypa tjuṯaṯarra, palumpa kutunguḻu tjuṯaṯarra. Ngurra palulaya nyinangi tjiṉṯu maṉkurrpa.

¹³Tuḻku yini Patjuwupanya kuwarripa ngarangitjangka, Yiitjunya palumpa kutunguḻu tjuṯaṯarra tawunu Tjarutjalumalakutuwarri yanu.

¹⁴Tjana Tjarutjalumala tjarrparra Tjuwuku tjaatji tiṉakutu yanu. Yilarringkula Yiitjulu tjananya nyangu tjaatji tjayiṯi, yaaṯangka yunngu, tjiipiya, puluka, paaḻkara tjalamilaṉingitjangka. Tjaatji palula mani ngurrara tjuṯa, tiipula tjuṯangka nyinarra waṉingi.

¹⁵Wiipa ruupatjarrangku palyara Yiitjulu tjananya rungkara wantirriyaṉu, tjaatji palulanguru. Wati, tjiipi, pulukaṯarra rungkara wantirriyaṉu. Mani ngurrara tjuṯaku tjanampa tiipula tjuṯa manitjarra katura waṉiwaṉingu.

¹⁶Yiitjulu tjananya paaḻkara tjalamilalpayiṯarra watjaṉu, “Maa katiya! Ngayuku paapaku tjaatjingka wiya tjalamilantjaku.”

¹⁷Nyakula palumpa kutunguḻu tjuṯangkuya kuliṉu, mayutju Tapitalu irriṯi wakaṉutja, yalatji, “Nyuntupa tjaatjiku ngayulu puntura yunytjurringanyi tjukarurru kanyilkitjangku.”

¹⁸Tjuwu tjuṯaku mayutju tjuṯangku nyakula kuliṉingi, “Ngaangku wiya nganampa tjaatjingka tjananya payira iyantjaku, mayutju Kurayitjalu kutju yalatji payira iyantjaku, Katutjalu watjara wantirriyaṉutjangku kutju. Ngaatja wiya Kurayitjanya.” Yalatji kulira tjana Yiitjunya watjaṉu yalatji, “Tjinguru nyuntu mayutju tiṉa Kurayitjanya tjinguru wiya. Nyuntu Katutjakuṉu ngangkaritjarrangku kutjupa kutjupa palyala! Nganaṉatju nyakula yalatji kulilku, ‘Ngaatjanya Katutjakuṉu. Katutjalu palunya watjaṉu tjaatjingka tjananya rungkara wantirriyantjaku.’”