Tingtoeng 94:1-17

¹Tawnlohnah Pathen BOEIPA aw, tawnlohnah Pathen nang ha sae lah.

²Diklai laitloek nang thoo lamtah thinthah rhoek ke a tiing la thuung lah.

³Me hil nim a halang uh ve? BOEIPA aw halang rhoek loh me hil nim a sundaep uh ve?

⁴Boethae aka saii boeih loh a cal uh vaengah mangkhak la hoem ol a thaa uh.

⁵BOEIPA namah kah pilnam te a phop uh tih na rho khaw a phaep uh.

⁶Nuhmai neh yinlai te a ngawn uh tih cadah rhoek te a sah uh.

⁷Tedae, “BOEIPA loh hmuh pawt tih Jakob Pathen loh a yakming moenih,” a ti uh.

⁸Pilnam khuikah ngukngak rhoek loh yakming uh laeh. Aka ang rhoek loh n'cangbam venim?

⁹Hna aka buen loh ya pawt vetih mik aka hlinsai loh paelki mapawt nim?

¹⁰Namtom rhoek aka toel tih mingnah neh hlang aka cang puei loh tluung het mahpawt nim?

¹¹Hlang kah a kopoek he a honghi ni tila BOEIPA loh a ming.

¹²BOEIPA loh na toel tih na olkhueng neh na tuk na kil hlang tah a yoethen tih,

¹³halang ham vaam a vueh pah vaengah pataeng yoethae tue khui lamkah anih te na mong sak.

¹⁴BOEIPA loh a pilnam te phap sut pawt tih a rho khaw hnoo mahpawh.

¹⁵Duengnah dongah laitloeknah a khoep vetih lungbuei aka thuem boeih tah a hnukah bang uh ni.

¹⁶Thaehuet rhoek te kai taengah u long lae a tlai thil eh? Boethae aka saii te kai taengah ulonglae a pai thil eh?

¹⁷BOEIPA kah bomnah kai taengah om pawt koinih ka hinglu he mikpalap ah tuihoeng la om sut ni.