Tingtoeng 69:16-36

¹⁶Na sitlohnah a then dongah kai n'doo lah BOEIPA. Na haidamnah cungkuem neh kai taengla ha mael lah.

¹⁷Te dongah na maelhmai te na sal taeng lamkah thuh boel mai. Ka taengah n'daengdaeh dongah a loe la kai n'doo dae.

¹⁸Ka hinglu taengla ha yoei lamtah n'tlan dae. Ka thunkha rhoek kongah kai n'lat dae.

¹⁹Namah loh kai kah kokhahnah, yahpohnah, ka mingthae neh na hmaikah kai aka daengdaeh boeih khaw na ming.

²⁰Kokhahnah dongah ka lungbuei rhek tih ka mangoeng sut. Te dongah aka suem ham ka lamtawn dae om pawt tih, aka hloep ham khaw ka hmu pawh.

²¹Ka buh dongah anrhat han hlum uh tih ka tuihalh vaengkah ham a thuui n'tul uh.

²²Amih kah caboei te amih mikhmuh ah pael la, rhoepnah te hlaeh la om pah saeh.

²³Amih kah mik te a tueng khui lamkah hmuep saeh lamtah a cinghen khaw khun yoeyah saeh.

²⁴Amih te na kosi lun thil lamtah na thintoek thinsa loh amih te doom saeh.

²⁵Amih kah lumim te kho pong la om saeh lamtah a dap ah khosa hlang om boel saeh.

²⁶Na ngawn te a hloem uh tih na rhok kah nganboh te a tae uh.

²⁷Thaesainah te amamih kah thaesainah neh a koei dongah nang kah duengnah te bawn uh boel saeh.

²⁸Hingnah cabu khui lamkah phae lamtah hlang dueng rhoek neh hmaih daek boeh.

²⁹Tedae kai mangdaeng thakkhoeih he, Pathen namah kah khangnah neh n'hoeptlang lah.

³⁰Lumlaa neh Pathen ming te ka thangthen vetih amah te uemonah neh ka pomsang puei ni.

³¹Te daengah ni BOEIPA ham vaito vaitotal ki cawn neh khomae aka rhak lakah a uemo eh.

³²Kodo rhoek loh a hmuh vetih a kohoe uh ni. Pathen aka tlap rhoek, nangmih thinko ah hing van saeh.

³³BOEIPA loh khodaeng rhoek te a yaak tih a thongtla rhoek khaw a hnoel moenih.

³⁴Vaan rhoek neh diklai loh, tuitunli rhoek neh a khuiah aka yuel boeih loh BOEIPA amah te thangthen uh saeh.

³⁵Pathen loh Zion a khang ni. Judah khopuei rhoek te a sak vaengah kho a sak vetih pahoi a pang uh ni.

³⁶A sal rhoek kah a tiingan long khaw a pang uh vetih a ming aka lungnah rhoek loh a khuiah kho a sak uh.