Tingtoeng 55:5-22

⁵Kai taengah rhihnah neh thuennah halo tih, tuennah loh kai n'thing.

⁶Te vaengah, “U long nim kai ham vahui bangla ka phae han khueh koinih ka ding vetih kho ka sak sue,” ka ti.

⁷Yaoe A hla la ka cet sui tih, khosoek ah ka rhaehba mai lah sue. Selah

⁸Kai taengkah khohli khui lamloh, hlipuei a tloh khui lamloh kuepkolnah la ka tawn uh sue.

⁹Ka Boeipa aw amih ol te haeh saeh lamtah dolh saeh, khopuei ah kuthlahnah neh tuituknah ni ka hmuh.

¹⁰Khoyin khothaih vongtung taengah vikvuek uh tih a ko khuiah boethae neh thakthaenah om.

¹¹Talnah loh a ko khuiah om tih, hnaephnapnah neh thailatnah loh toltung lamkah nong voelpawh.

¹²Kai aka veet he ka thunkha moenih, anih koinih ka phueih pawn ni. Kai taengah aka pomsang uh te ka lunguet moenih. Te koinih anih taeng lamloh ka thuh tak ni.

¹³Tedae ka boeihlum neh ka thanat la ka hmaiben hlanghing khaw namah ni.

¹⁴Baecenol neh tun ka tui uh tih, rhoihui neh Pathen im la ka cet uh coeng.

¹⁵Anmih ko khuiah khaw, a lampahnah ah khaw thae uh. Te dongah amih te dueknah loh dueknah neh phae saeh lamtah, a hingnah te saelkhui la suntla uh saeh.

¹⁶Pathen te kai loh ka khue tih BOEIPA loh kai n'khang.

¹⁷Hlaem, mincang neh khothun ah ka lolmang tih ka ko vaengah ka ol han yaak.

¹⁸Kai taengkah aka om rhoek he a yet dongah ka hinglu he caemrhal lamkah sading la n'lat.

¹⁹Hlamat lamkah kho aka sa Pathen loh a yaak vetih amih te a phaep ni. Selah. Amih taengah thovaelnah a om pawt bangla Pathen khaw rhih uh pawh.

²⁰A ngaimongnah taengah a kut a hlah tih, a paipi a poeih.

²¹A ka te maehtha bangla hnal dae a lungbuei tah caemrhal la om. A olka te situi lakah yaai dae tumca a muk uh.

²²Na thinrhih te BOEIPA taengah hal lamtah amah loh nang n'cangbam bitni. Aka dueng te kumhal ah bung sak mahpawh.