Tingtoeng 38:1-15

¹David kah ngaidamnah Tingtoenglung Aw BOEIPA, na thinhul neh kai n'tluung boel lamtah na kosi neh kai n'toel boeh.

²Na thaltang loh kai dongah sap ha tlaeh tih na kut loh kai n'nan.

³Nang kah kosi dongah ka pum he hlang la om voelpawh. Ka tholh dongah ka rhuh a sading pawh.

⁴Kai kah thaesainah loh ka lu hang khuk tih, kai ham hnophueih bangla a rhih loh n'nan.

⁵Ka anglat dongah, ka boengha rhong tih rhim coeng.

⁶Ka ngam paihaeh tangkik hil khohnin yungah kopang neh ka van.

⁷Ka uen khaw boeih duih tih, ka pum he hlang la om voelpawh.

⁸Ka lungmit tih ka paep dongah, lungbuei phoenanah neh mat ka kawk.

⁹Ka ngaihlihnah boeih he, ka Boeipa namah taengah ka hal tih, ka hueinah he namah taeng lamloh a thuh moenih.

¹⁰Ka lungbuei a thimpom tih ka thadueng hnoeng. Te dongah ka mik khaw tueng pawh.

¹¹Ka tlohtat dongah ka lungnah ka paya rhoek loh saisai m'pai tak tih ka huiko khaw a hla lam ni a pai uh coeng.

¹²Ka hinglu aka mae rhoek loh n'hlaeh tih, kai yoethae puei ham aka tlap rhoek loh a talnah te a thui uh. Te dongah hlangthai palat rhoek loh hnin at puet n'taeng uh.

¹³Tedae kai tah hnapang bangla ka ya voelpawt tih olmueh loh a ka a ang pawt bangla ka om.

¹⁴Te dongah aka ya thai pawt tih a ka ah toelthamnah aka om pawt hlang bangla ka om.

¹⁵BOEIPA nang dongah ka hangdang tih nang loh nan doo bitni ka Boeipa ka Pathen aw.