Tingtoeng 37:17-40

¹⁷Halang rhoek kah a ban te khaem vetih hlang dueng te BOEIPA loh a talong ni.

¹⁸Cuemthuek rhoek kah khohnin te BOEIPA loh a ming pah dongah, a rho khaw kumhal duela om ni.

¹⁹Yoethaenah tue vaengah yak uh pawt vetih lamlum tue vaengah hah uh ni.

²⁰Tedae halang rhoek te milh uh vetih BOEIPA kah thunkha thunhling te rhamtlim paithen bangla hmata ni. Hmaikhu bangla khumpael ni.

²¹Halang loh a pu vaengah thuung pawt dae hlang dueng long tah a rhen tih a paek.

²²Amah kah yoethen a paek rhoek loh khohmuen a pang uh tih a tap rhoek te moeng uh ni.

²³BOEIPA loh hlang kah khokan a cikngae sak tih a longpuei khaw a ngaih pah.

²⁴BOEIPA loh a kut a talong pah dongah, cungku cakhaw hlah mahpawh.

²⁵Camoe la ka om tih ka patong coeng dae hlang dueng a hnoo dongah a tiingan loh buh a bih te ka hmuh noek moenih.

²⁶Hnin takuem a moeihoeih tih cang pu a hlah dongah a tiingan kah yoethennah la poeh.

²⁷A thae te nong tak lamtah a then saii lah. Te daengah ni kumhal duela kho na sak eh.

²⁸BOEIPA loh tiktamnah a ngaih dongah a hlangcim rhoek a hnoo mueh la kumhal due a ngaithuen. Tedae halang kah tiingan te a khoe.

²⁹Hlang dueng loh khohmuen a pang vetih a khuiah yoeyah la kho a sak ni.

³⁰Hlang dueng kah a ka loh cueihnah a thuep tih a lai loh tiktamnah a thui.

³¹A Pathen kah olkhueng loh a lungbuei ah hing tih a khokan khaw paloe pawh.

³²Halang loh hlang dueng te a tawt tih ngawn ham a tlap.

³³BOEIPA loh hlang dueng te halang kut ah hnoo pawt vetih laitloek vaengah anih te boe sak mahpawh.

³⁴BOEIPA te lamtawn lamtah a long te vai. Te vaengah khohmuen pang sak ham nang n'pomsang vetih halang rhoek a phae te na hmuh ni.

³⁵Halang hlanghaeng ka hmuh vaengah thinghing mupoe bangla daih.

³⁶Tedae a khumpael vanneh anih te vik om voelpawh. Anih te ka tlap van dae ka hmu voelpawh.

³⁷Ngaimong hlang ham khohmai a om pueng dongah a cuemthuek ke dawn lamtah a thuem ke hmu lah.

³⁸Tedae boekoek rhoek te mitmoeng uh vetih halang rhoek kah hmailong khaw boeih a khat ni.

³⁹Te dongah hlang dueng rhoek kah loeihnah he BOEIPA taengkah la om tih citcai tue vaengah amih ham lunghim la om.

⁴⁰Te dongah BOEIPA loh amih te a bom tih a hlawt. BOEIPA ah a ying uh dongah halang kut lamkah amih te a hlawt tih a khang.