Tingtoeng 22:2-24

²Aw ka Boeipa Pathen khothaih ah ka pang dae nan doo pawt tih khoyin ah khaw ka duemnah om pawh.

³Tedae nang tah Israel kah koehnah dongah a cim la na ngol coeng.

⁴A pa rhoek loh nang dongah pangtung uh. A pangtung uh dongah amih te na hlawt.

⁵Nang taengah pang uh tih a poeng a hal uh coeng. Nang dongah pangtung uh tih yak uh pawh.

⁶Tedae kai he talam ni, hlang moenih. Hlang kah kokhahnah neh pilnam kah a hnaep hlang ni.

⁷Kai aka hmu boeih loh, kai taengah a hmui te a saibaeh uh phoeiah lu a hinghuen uh tih,

⁸” BOEIPA dongah a hmae dongah BOEIPA amah dongah hangdang saeh anih te hlawt saeh lamtah huul saeh,” tila n'tamdaeng uh.

⁹Tedae namah loh bung khui lamkah kai nan poh tih, a nu kah rhangsuk dongah kai nan pangtung sak.

¹⁰Bung khui lamkah ka om paek vaengah nang dongah ka voei uh. A nu bung khui lamkah mah nang he kai kah Pathen ni.

¹¹Citcai loh ha yoei tih aka bom khaw a om pawt dongah kai taeng lamkah n'lakhla tak boeh.

¹²Kai he vaitotal rhoek loh muep m'vael uh tih Bashan vaito aka lueng rhoek loh kai n'dum uh.

¹³Sa aka nget tih aka kawk sathueng bangla kai taengah a ka a ang uh.

¹⁴Tui bangla n'hawk uh tih ka rhuh khaw boeih phit coeng. Ka lungbuei he khoirhat bangla om tih ka ko khui ah paci coeng.

¹⁵Ka thadueng he paikaek bangla rhae tih, ka lai khaw ka dang la kap coeng. Te dongah dueknah laipi khuila kai nan tloeng.

¹⁶Ui rhoek loh kai m'hil uh tih, thaehuet hlangboel kai m'vael. Ka kut ka kho han toeh uh.

¹⁷Ka rhuh boeih ka tae thai. Amih loh kai he m'paelki uh tih m'hmuh uh.

¹⁸Ka himbai te amamih tael uh thae tih kai kah, pueinak ham hmulung a naan uh.

¹⁹Tedae BOEIPA nang loh n'lakhla tak boeh. Ka thayung aw kai bomnah ham ha tawn uh laeh.

²⁰Ka hinglu he cunghang lamkah, ka oingaih cangloeng te ui kut lamkah han huul lah.

²¹Sathueng ka lamkah kai n'khang lamtah cung ki dong lamkah kai he n'doo lah.

²²Ka manuca taengah na ming ka doek vetih namah te hlangping lakli ah kan thangthen eh.

²³BOEIPA aka rhih rhoek loh amah te thangthen uh. Jakob kah tiingan boeih loh amah te oep uh lamtah Israel tiingan boeih loh amah taengah bakuep uh.

²⁴Mangdaeng te hnaep pawt tih citcai khaw tuei pawh. A maelhmai te anih taeng lamloh thuh pawt tih, amah taengla a pang vaengah a yaak pah.