Tingtoeng 22:15-28

¹⁵Ka thadueng he paikaek bangla rhae tih, ka lai khaw ka dang la kap coeng. Te dongah dueknah laipi khuila kai nan tloeng.

¹⁶Ui rhoek loh kai m'hil uh tih, thaehuet hlangboel kai m'vael. Ka kut ka kho han toeh uh.

¹⁷Ka rhuh boeih ka tae thai. Amih loh kai he m'paelki uh tih m'hmuh uh.

¹⁸Ka himbai te amamih tael uh thae tih kai kah, pueinak ham hmulung a naan uh.

¹⁹Tedae BOEIPA nang loh n'lakhla tak boeh. Ka thayung aw kai bomnah ham ha tawn uh laeh.

²⁰Ka hinglu he cunghang lamkah, ka oingaih cangloeng te ui kut lamkah han huul lah.

²¹Sathueng ka lamkah kai n'khang lamtah cung ki dong lamkah kai he n'doo lah.

²²Ka manuca taengah na ming ka doek vetih namah te hlangping lakli ah kan thangthen eh.

²³BOEIPA aka rhih rhoek loh amah te thangthen uh. Jakob kah tiingan boeih loh amah te oep uh lamtah Israel tiingan boeih loh amah taengah bakuep uh.

²⁴Mangdaeng te hnaep pawt tih citcai khaw tuei pawh. A maelhmai te anih taeng lamloh thuh pawt tih, amah taengla a pang vaengah a yaak pah.

²⁵Nang lamloh hlangping pasae taengah koehnah ka khueh vetih BOEIPA aka rhih rhoek taengah ka olcaeng ka thuung ni.

²⁶Kodo buh a caak uh vetih hah uh ni. Amah aka toem rhoek loh BOEIPA a thangthen uh ni. Nangmih kah thinko te a yoeyah la hing ni.

²⁷Kho bawt kho le boeih loh a poek uh vaengah BOEIPA taengla ha bal uh vetih namtom huiko boeih loh namah hmai ah bakop uh bitni.

²⁸Mangpa neh namtom taemrhai he BOEIPA hut ni.