Tingtoeng 18:4-47

⁴Dueknah rhuihet loh kai n'yen tih aka muen soklong loh kai n'let sak.

⁵Saelkhui kah rhuihet loh kai m'ven tih dueknah hlaeh loh kai m'mah.

⁶Ka kho a bing vaengah BOEIPA te ka khue tih ka Pathen taengah ka pang. A bawkim lamloh ka ol a yaak tih ka pang ol loh amah hmai neh a hna khuila a pha.

⁷Te vaengah diklai tuen tih hinghuen. Amah taengah a sai dongah tlang yung rhoek khaw tlai uh tih tuen uh.

⁸A hnarhong lamkah hmaikhu thoeng tih a ka lamkah hmai loh a laeh vaengah hmai-alh khaw tak.

⁹Te phoeiah vaan te a koiloep tih a suntlak vaengah yinnah tah a kho hmui la pawk.

¹⁰Cherub dongah ngol bal tih a ding vaengah khohli phae soah ding hang.

¹¹Khohmuep te a kaepvai kah a hlipyingnah la, khomong khomai kah tamyin tui te a dungtlungim la a khueh.

¹²Amah hmai kah a aa te a khomai khui lamkah rhael neh hmai alh la coe.

¹³Te phoeiah BOEIPA tah vaan lamkah loh ha kawk tih Khohni loh a ol a huel vaengah rhael neh hmai alh la thoeng.

¹⁴A thaltang a kah tih amih te a taek a yaak. Rhaek neh a daeh tih amih te khawkkhek.

¹⁵Na thintoek kah na hiil yilh neh BOEIPA nang kah tluungnah dongah sokca kah tui phoe tih lunglai khaw a yung hoep.

¹⁶A sang lamloh yueng uh tih tui dueng khui kah kai he n'tuuk tih n'doek.

¹⁷Kai ham tah tlung uh coeng dae ka thunkha hlangtlung taeng lamkah neh ka lunguet taeng lamloh kai n'huul.

¹⁸Ka rhainah khohnin ah amih loh kai m'mah uh cakhaw kai ham tukcawt longkhawn la BOEIPA om.

¹⁹Tedae ka khuiah a naep dongah kai he a hoengpoeknah la n'thak tih kai n'pumcum sak.

²⁰Ka duengnah bangla BOEIPA loh kai n'thuung tih ka kut kah cimcaihnah vanbangla kai taengah ha mael.

²¹BOEIPA kah longpuei ka ngaithuen tih ka Pathen taeng lamkah ka poehlip van pawh.

²²Te dongah a laitloeknah boeih te kamah hmai ah ka khueh tih a khosing te kamah taeng lamkah ka phaelh pawh.

²³Amah hmaiah cuemthuek la ka om tih kamah kah thaesainah lamloh ka cue uh.

²⁴Te dongah ka duengnah neh amah mikhmuh ah ka kut kah cimcaihnah vanbangla kai taengah BOEIPA loh n'thuung coeng.

²⁵Hingcim taengah uepom la na om tih, cuemthuek hlang taengah na cungkuem coeng.

²⁶Aka meet uh taengah na meet uh tih, voeldak te tah na hnueih.

²⁷Namah loh pilnam mangdaeng te na khang tih mikhmuh kah aka pomsang rhoek khaw na kunyun sak.

²⁸Ka BOEIPA Pathen namah loh ka hmaithoi nan tok tih ka hmaisuep khaw a tue.

²⁹Namah neh caem ka poeng tih ka Pathen nen tah pangbueng khaw ka poe thai.

³⁰Pathen tah a longpuei khangmai tih BOEIPA tah olthui a cimcaih dongah anih khuiah aka ying boeih ham tah photling la a om pah.

³¹BOEIPA phoeiah Pathen te unim? Mamih kah Pathen phoeiah tah unim lungpang bal?

³²Pathen loh kai he khuehtawn m'vah sak tih, ka longpuei khangmai la a khueh.

³³Ka kho he sayuk bangla han sai tih, ka hmuensang ah kai m'pai sak.

³⁴Ka kut he caemtloek ham a cang tih, ka ban loh rhohum lii khaw a phuk thai.

³⁵Namah kah khangnah photling te kai taengah nan paek tih, na bantang kut loh kai n'duel. Te dongah na kodonah neh kai nan rhoeng sak.

³⁶Ka kungdak kah ka kholaeh khaw na aeh dongah ka kho paloe pawh.

³⁷Ka thunkha rhoek te ka hloem tih amih te ka kae phoeiah amih ka khah hlanah ka balkhong moenih.

³⁸Amih te ka phop sak daengah ni thoo uh thai pawt tih ka kho tangah a bakop uh.

³⁹Caemtloek ham khaw kai he thadueng nan vah sak tih kai aka tlai thil rhoek te kamah hmuila na koisu.

⁴⁰Te dongah ka thunkha rhoek kah a rhawn te kai taengah na duen sak tih ka lunguet te ka biit.

⁴¹BOEIPA taengah pang uh coeng dae khang voel pawt tih amih te doo voel pawh.

⁴²Te dongah amih te khohli hman kah laipi bangla ka neet tih long kah tangnong bangla ka hawk.

⁴³Pilnam kah tuituknah khui lamkah kai nan hlawt. Namtom kah a lu la kai nan khueh te aka ming pawh pilnam loh kai taengah tho a thueng.

⁴⁴Ka ol te a hna dongah olthang la a yaak uh vaengah kholong ca rhoek loh kai taengah mai a tum uh.

⁴⁵Kholong ca rhoek loh tahah uh tih a vongtung khui lamkah samoe uh.

⁴⁶BOEIPA he hingnah la a om dongah ka lungpang tah a yoethen pai tih ka daemnah Pathen tah pomsang pai saeh.

⁴⁷Pathen loh kai hamla tawnlohnah a paek dongah kai dangah ni pilnam a voek.