Tingtoeng 135:2-19

²Te rhoek tah mamih Pathen im vongup kah BOEIPA im ah pai uh.

³BOEIPA tah a then dongah BOEIPA mah thangthen uh. A ming te a naepnoi la tingtoeng uh.

⁴Jakob te BOEIPA amah ham, Israel khaw a lungthen la a coelh.

⁵Kai loh YAHWEH neh mamih Boeipa tah Pathen boeih lakah len tila ka ming.

⁶BOEIPA loh a ngaih boeih te tah vaan ah khaw, diklai ah khaw, tuitunli neh tuidung khui boeih ah khaw a saii.

⁷Diklai khobawt lamkah khomong aka caeh sak loh rhaek neh khotlan khaw a saii tih a thakvoh khui lamkah khohli te a poh.

⁸Amah loh Egypt hlang neh rhamsa caming rhoek te a ngawn.

⁹Miknoek neh kopoekrhai te namah Egypt khui ah khaw, Pharaoh taeng neh a sal rhoek boeih taengah khaw a tueih.

¹⁰Amah loh namtom rhoek te muep a ngawn tih manghai boei rhoek khaw a ngawn.

¹¹Amori manghai Sihon, Bashan manghai Oga neh Kanaan ram boeih te khaw a thup.

¹²Te dongah amih kah khohmuen rho te a pilnam Israel taengah rho la a paek.

¹³BOEIPA namah ming tah kumhal duela, BOEIPA namah poekkoepnah te cadilcahma phoeikah cadilcahma duela om pai saeh.

¹⁴BOEIPA loh a pilnam a tang sak vetih a sal rhoek te a hloep ni.

¹⁵Namtom rhoek kah ngun neh sui muei he hlang kut bibi ni.

¹⁶Amih kah a ka om dae cal uh thai pawh. A mik om uh dae hmu uh thai pawh.

¹⁷A hna te om uh dae hnakaeng uh thai pawh. A ka khuiah khaw a hil om pawh.

¹⁸Mueirhol aka saii neh amih dongah aka pangtung boeih tah mueirhol bangla om uh ni.

¹⁹Israel imkhui loh BOEIPA te yoethen pae lah. Aaron imkhui loh BOEIPA te yoethen pae lah.