Tinavete 5:14-36

¹⁴Ba soku lala dia sari na tie na barikaleqe si va hinokaria sa Baṉara meke somana la koa rina tie te Karisito.

¹⁵Hoke ta salaṉa sari na tie koari na apositolo, gua asa ke paleke lani rina tinoni sari dia tie mohodi, meke ivara ni rini pa sisiraṉa sari na teqe, meke va ekoi rini, pude pana ene hola se Pita si kote va aqori sa maqomaqona sa meke ta salaṉa.

¹⁶Soku puku tinoni saripu maedi gua koari na vasivasileana pa vari likohaena Zerusalema, si paleke mae ni sari dia tie mohodi, meke saripu ta higorae tomate kaleadi, meke ta salaṉa beto sari doduru.

¹⁷Meke sa ṉati hiama kenukenue meke rina Sadusi pu koa turaṉia, si konokono sisigiti ni sari na apositolo.

¹⁸Ke tuqe vagi i rini sarini, meke vekoi rini pa vetu varipusi.

¹⁹Ba pana boṉi asa, si la si keke mateana te Tamasa, meke tukelia sa sa sasadana sa vetu varipusi, meke turaṉa vura ni sa sari na apositolo, meke zama,

²⁰“Mi la koasa Zelepade, mi la va tumatumae nia koari na tie sa doduru guguana sa tinoa vaqura hie,” gua si asa.

²¹Ke pana vaqavaqasa, si nuquru la pa varivarigarana pa Zelepade sarini, meke podalae la variva tumatumae koari na tinoni. Sipu kamo sa ṉati hiama kenukenue, meke sari na tie pu koa turaṉia, si tioko varigara ni rini sari na koimata tadi na tie Ziu, meke sari doduru koasa Sanihiderini, sa puku tie varipitui tadi na tie Ziu pude vivinei, gua. Ke garunu lani rini pa vetu varipusi sari kaiqa dia tie kopu pa Zelepade, pude la turaṉa mae ni sari kasa apositolo, gua.

²²Ba sipu la kamo pa vetu varipusi si arini, si lopu koa vasina sari na apositolo. Ke pule la totozi sarini koa ri kasa koimata pu korapa varigara.

²³Zama si arini, “Sipu la kamo gami, si dogoria gami sa vetu varipusi korapa ta loka eko nana, meke sari na tie kopu si korapa turu dia pa kapa sasada. Ba sipu tukelia gami, si loke tiena sa korapana!” gua si arini.

²⁴Sipu avosia sa koimata tadi na tie kopu pa Zelepade, meke ri na ṉati hiama sapu gua asa, si nunala dia si arini. Lopu gilania rini sapu gua ta evaṉa koari na apositolo, meke na sa pule si kote ta evaṉa.

²⁵Korapa gua asa, si nuquru mae gana si keke tie meke zama, “Kasa palabatu, avoso mae, sari kasa tie pu vekoi gamu pa vetu varipusi, si hiroi; korapa va tumatumae pa varivarigarana koasa Zelepade eko la sara!” gua si asa.

²⁶Ke tiqe topue la sa koimata tadi na tie kopu Zelepade, meke sari nana tie, meke la turaṉa pule ni sari na apositolo. Ba lopu la raza pude tuqe vagi rini sarini, sina matagutu ta gona patu koari na tie si arini.

²⁷Turaṉa nuquru ni rini sari na apositolo, meke va turui rini pa kenuna sa Sanihiderini d, meke nanasi sa ṉati hiama kenukenue si arini,

²⁸“Vegua, nake ele tozini gamu tu gami pude lopu kaqu variva tumatumae pule nia gamu koari na tie sa pozana e Zisu, gua? Ba korapa urahae nia tugo gamu pa doduruna Zerusalema sa mia vina tumatumae, beto meke hiva vata zutu nia gamu koa gami sa vina matena Sa!” gua si asa.

²⁹Meke olaṉa la se Pita, meke sari apositolo, “Sa Tamasa mo si kote va tabea gami, lopu sari na tie!

³⁰Sa Tamasa tadi na tiatamada pukerane, si va turu pulea pa minate se Zisu sapu poka nia gamu pa korosi, meke va matea.

³¹Meke va lavatia sa Tamasa pa kali mataona se Zisu pa Maṉauru, pude koa Baṉara, meke na Hinarupu; pude boka kekere sari tie Izireli koari na dia sinea, pude madi taleosae.

³²Ke gami hire, meke sa Maqomaqo Hope, sapu poni ni sa Tamasa koa rini pu va tabea, si na tie va sosode koari na ginugua arini,” gua si arini.

³³Sipu avosia ri kasa koasa Sanihiderini sapu gua asa, si ta ṉaziri sisigiti, meke hiva va matei rini sari na apositolo.

³⁴Ba gasa turu si keke rina Parese d pozana si e Qamalieli. Keke titisa arilaena pa Tinarae te Mosese si asa, meke keke tie ta pamaṉaena tugo koari doduru tie. Tozi ni sa sari na tie kopu Zelepade pude va vura paki i sari na apositolo.

³⁵Beto asa, si tiqe zamai sa si arini, “Kasa tinoni pa Izireli, mi balabala valeana, na sa si leana pude tavete lani gamu koari kasa tie hire.

³⁶Mi balabala ia sapu gua ta evaṉa koe Teudasi sapu turu vura mae visoroihe, meke balabala pule nia sapu keke tie arilaena si asa, gua; meke padana made gogoto tie si lulina sa. Ba sipu tava mate sa, meke ta hurakatae sari nana tie, si mate taloa mo sa tinavete tanisa.