Tinavete 4:9-37

⁹Be sa tinavete leana sapu gua ta evaṉa koasa tie mate nenena hie, meke ta salaṉa si gunia gamu pa mia ninanasa,

¹⁰si mi tumae nia si hie, gamu meke ari doduru tie Izireli: Sa tie hie pu turu pa kenumia gamu, si ta salaṉa pa korapa ṉiniraṉira koasa pozana e Zisu Karisito pa Nazareti, Asa sapu ele va matea gamu pa korosi, ba sapu ele va turu pulea Tamasa pa minate.

¹¹Se Zisu tugo hie sapu tozia sa Kinubekubere Hope sapu zama guahe: ‘Sa patu sapu kilua rina tie kuri vetu, si asa tugo si arilaena hola koari doduru patu,’ gua.

¹²Sa hinarupu si lopu koa pule pa keke tie, ura loke pozapoza pule, sapu ta poni nia na tie pa kauruna sa maṉauru, si boka ta harupu nia gita,” gua se Pita.

¹³Sipu dogoria ri kasa koimata tadi na tie Ziu sa minataqara tadi Pita e Zone, meke gilania rini sapu na tie pa vasileana mo, meke lopu tie sikuludi sari kara, si magasa hola si arini. Meke doṉo gilania rini sapu na tie sapu lululidi koe Zisu sari kara.

¹⁴Ba loketoṉa si boka zama nia rini, sina dogoro sotia dia mo sa tie sapu ta salaṉa, turu somanae nana koari Pita e Zone.

¹⁵Ke va vura paki rini sari kara, meke vari vivinei teledia si arini.

¹⁶Vari nananasi sarini, “Na sa kote tavete ni gita sari tie hire? Sina lopu boka tomea gita sa tinavete variva magasana sapu evaṉia ri kara, sina doduru tie pa Zerusalema si ele gilana betoa.

¹⁷Ba mada va balau i mo, pude madi lopu zama pule hokahokara nia sa pozana e Zisu koari na tinoni, pude lopu kaqu ta tozi urahae la pa doduru vasina sa ginugua hie,” gua si arini.

¹⁸Beto si tioko va nuquru pulei rini sari kara, meke tozi ni rini pude lopu zama nia ba be va tumatumae hokara pa korapa pozana Zisu.

¹⁹Ba olaṉa la sari Pita e Zone, “Ego, mi pitu ia telemia be toṉoto sia pa kenuna sa Tamasa pude va tabe gamu si gamu babe pude va tabe ia sa Tamasa.

²⁰Ura gami kara si lopu boka beto tozi helahelae ni, gua saripu ele dogori, na avosi gami,” gua sari kara.

²¹Beto asa si va nabu valeana pulea ri kasa koimata sa dia vina balau koari kara, meke tiqe va vura taloa i rini. Lopu boka vizatia rini gua pude va kilasi sari kara, sina sari doduru tie si vahesia ri sa Tamasa koasa tinavete variva magasana pu ta evaṉa.

²²Ura sa tie pu ta salaṉa si ele hola made ṉavulu puta vuahenina.

²³Sipu vata rupahi tugo rini, si topue la mo sari Pita e Zone, meke la tozi ri kara koari kasa tie pu va hinokaria se Zisu, gua saripu zama ni rina ṉati hiama, na koimata.

²⁴Totoso avosia tugo ri kasa tie te Karisito sapu gua tozia ri Pita e Zone, si koa keke pa vinaravara, meke zama guahe si arini: “Baṉara sapu tavetena sa Maṉauru, sa pepeso, meke sa kolo lamana, meke sari doduru likakalae pu koa koa rini.

²⁵Ura guahe si zama nia Goi koasa Maqomaqo Hope, sapu tozia sa Mua nabulu Devita sa tamamami: ‘Na vegua ke hiva veko pania rina butubutu huporodi sa binaṉara te Zihova? Meke vegua ke balabala vekoa rini si pude luara pania sa Nana tinolitolie?

²⁶Sari na baṉara pa popoa pepeso si ele varigara, meke va namanama pude varipera la koasa Tamasa meke sa Nana Karisito sapu vizatia Sa,’ gua.

²⁷Meke ele tava gorevura si hie sipu varigara sari Herodi e Ponitiasi Paelati tani, pa popoa Zerusalema. Meke somana tugo sari na butubutu Zenitailo, meke sari na tie Izireli, meke raza la ia rini se Zisu sa Mua nabulu hopena, pu ele vizatia Goi pude sa Karisito.

²⁸Tavete va gorevura i rini gua saripu ele vizata veko kenui Goi, pude taveti rini koe Zisu.

²⁹Gua asa ke, Baṉara, Mu doṉo gilania sapu va matamatagutu gami rini; mamu va mataqara gami si gami na Mua nabulu, pude zama ni sari Mua inavoso.

³⁰Mu vata dogoro nia sa Mua ṉiniraṉira pude salaṉi saripu moho, mamu vata evaṉi sari na tinavete variva magasadi pa korapa pozana e Zisu sa Mua nabulu hopena,” gua si arini.

³¹Meke sipu beto tugo varavara rini, si niu mo sa lose vasina varigara rini, meke ta siṉie nia rini sa ṉiniraṉira tanisa Maqomaqo Hope, ke podalae la tarae va mataqara nia rini sa Inavoso Leana te Tamasa.

³²Sari na tie te Karisito si koa keke pa hiniva, meke keke pa dia binalabala. Loke tie si puhi nia si keketoṉa, ba varitago ni mo rini sari na dia likakalae.

³³Meke pa korapa ṉiniraṉira lavata si tarae nia rina apositolo sa tinuru pule te Zisu Karisito pa minate, meke sa minana nomana te Tamasa si koa koa rini.

³⁴Loke tie koa rini si ehaka nia ke toṉa. Sarini pu ari dia pepeso, babe na vetu, si holuholu ni rini,

³⁵meke vala ni rini koari na apositolo sari na poatadi, meke tava hia sari na poata koari hopeke tie pu loke dia.

³⁶Ke gua tugo asa si tavetia e Zosepa. Keke tie pa butubutu Livae d si asa pu ta podona pa Nusa Saeparasi. Hoke poza nia Banabasi rina apositolo si asa, (sa ginuana sa pozana si na tie pu sovutu va ṉiṉirai sari na tie).

³⁷Holuholu nia sa si keke nana vasi pepeso, meke paleke la luaria sa sari poatana koari na apositolo.