Tinavete 27:7-33

⁷Toka hitehite la si gami koari kaiqa rane. Tasuna hola sa mami inene, meke osolae la kamo pa kalina sa vasileana Sinidasi. Lopu boka hola la si gami vasina hiva la gua gami, sina ṉiṉira hola sa givusu, ke kekere la gua mo pa kali paerena koasa nusa Kiriti, hola nia sa miho Salamone.

⁸Rarata lulia mo gami sa popoa, sina tasuna hola meke tiqe kamoa gami si keke vasina, pozana “Koqu Aqoroana”, sapu lopu seu pa vasileana Lasea.

⁹Koa soku rane si gami vasina osolae kamo mo sa totoso sapu tasuna pude ene sari na vaka, ke sa rane vina vukivukihi tinaleosae tana sinea, ba ele hola tugo, ke zamai Paula sarini,

¹⁰“Kasa turaṉaqu, gilania rau sapu kote tasuna sa nada inene podalae tani. Kote ta ṉovala hokara sari na vinasuraṉa pa vaka, meke sa vaka tugo, meke kamo koa gita na tie,” gua si asa.

¹¹Ba sa koimata tadi na tie varipera si lopu va hinokaria sapu gua zama nia Paula, ba lulia tu sa sapu zama nia sa palabatuna sa vaka, meke saripu tagona sa vaka.

¹²Sa koqu hie si lopu vasina leana pude va hola ia sa totoso ibu. Gua asa ke sokudi rina tie si valeania pude luaria sa vasina asa, meke toka la pa Ponikisi be guana boka, pude la koa va hola ia sa totoso ibu vasina, gua. Ponikisi si keke koqu sigotoana pa Kiriti, sapu tia la pa kali gedena, meke pa kali mataona sa lodu rimata sapu kalalasa meke hiru toṉoto la ia sa givusu.

¹³Totoso podalae nebe hitehite mae sa givusu pa kali saoti, si balabala sarini sapu gina kote boka toka la mo si gami, gua. Ke kave sigoto sarini, meke ene kapae gua pa raratana pa Kiriti.

¹⁴Ba lopu seunae hoi, si raza mae gana mo sa givusu ṉiburuna, sapu raza mae guana koasa nusa pa kali gedena sa gasa rimata.

¹⁵Mae raza koasa vaka si asa; meke sipu lopu boka varipera la si gami koasa givusu kemua, si va luli nia mo gami pa givusu sa vaka.

¹⁶Totoso la gua gami pa keke nusa hite, pozana “Kauda,” si paere vasina hite si gami. Vasina si boka va suraṉia gami sa diqina sa vaka pude lopu kaleana, ba na vinoriti meke bokaia gami.

¹⁷Kave va suraṉia rini sa diqi, meke dikuru nia iku rini sa tinina sa vaka. Mala nia rini sapu meke la pararavae pa bolebole onone pa Libia, gua. Ke va gorea rini sa tepe nomana, meke va luli nia mo rini pa givusu sa vaka.

¹⁸Ṉiṉira lala nana tu sa raneboṉi, ke pa koivugona si podalae okipani rini pa kolo si kaiqa vina suraṉa pa vaka.

¹⁹Meke pa rane luli mae pule, si okipani pule rini si kaiqa tiṉitoṉana sa vaka.

²⁰Meke totoso ele hola soku rane, ba lopu hite ta dogoro sa rimata pana rane, meke sari na pinopino pana boṉi, ba keke pada mo sa ṉiṉirana sa givusu, si duta mo sari doduru mami rinovena sa tinaharupu koasa raneboṉi.

²¹Sipu ele hola soku rane lopu henahena gua sari na tie, si turu se Paula pa kenudi rini meke zama, “Kasa turaṉaqu, be va avosau gamu, meke be lopu taluarae si gita pa nusa Kiriti, si lopu kaqu va kamoa gita sa tinahuara gua hie, meke lopu kaqu ta okipalae sari na tiṉitoṉa.

²²Ba kamahire si tepa gamu rau pude mi koa varane pa bulomia; ura loke tie si kote mate, ba sa vaka mo si kote ta huara.

²³Ura pa boṉi tugo, si mae turu tata koa rau si keke mateana tanisa Tamasa sapu nabulu nia na vahesia rau,

²⁴meke zama, ‘Paula! mu lopu matagutu, kote la turu si goi pa kenuna sa baṉara pa Roma. Meke dotu, pa Nana tataru variharupi sa Tamasa, si kote va sarei Sa sari doduru pu luli koa goi koasa vaka hie,’ gua sa mateana.

²⁵Ke gua asa, si mi koa varane, sina raṉea rau sa Tamasa, ke gua puta tugo sapu tozi nau Sa si kote ta evaṉa.

²⁶Ba kote la hake mo si gita koa ke nusa,” gua si asa.

²⁷Meke pa korapa boṉi, koasa boṉi vina manege made, sipu korapa ta paleke lamae si gami koasa kolo Meditareniani, si roverovea ri na tie tavetavete koasa vaka sapu gina ele tata pararavae pa popoa si gami, gua.

²⁸Ke va gorea rini pa lamana si keke taili, sapu koa ia na mamamata pude pada ia sa lamana, meke gilania rini sapu ka made ṉavulu mita mo lamanana sa vasina asa. Lopu seunae, si pada pulea tugo rini, meke ka toloṉavulu mita mo sa lamanana sa.

²⁹Matagutu nia rini sapu, meke la hake pa patu sa vaka, gua. Ke va gorei rini si ka made sigoto pa tatavana sa vaka, meke varavara la si arini koari na dia tamasa pude va kamo valeani pana rane, gua.

³⁰Beto asa si va gorea rina tie tavetavete pa vaka sa diqi, pude govete taloa dia koasa vaka, gua. Sekesekei nia rini sapu pude la va gorei sari kaiqa sigoto pa kemuana sa vaka, gua.

³¹Ba zama se Paula koasa koimata tadi na tie varipera, meke koari na solodia, “Be taloa sari na tie tavetavete koasa vaka, si lopu kaqu boka ta harupu si gamu,” gua si asa.

³²Gua asa ke, seke kumatia rina solodia sa iku pusina sa diqi, meke va hoqa pania rini si asa pa kolo.

³³Meke sipu tata sa vaqavaqasa, si tozi ni Paula sari doduru pude henahena paki, “Ka manege made rane si ele koa ia gamu, meke lopu hite henahena.