Tinavete 18:7-25

⁷Meke taluarae se Paula pa sinaqoqi, meke la koa nana pa vetu tana keke tie Zenitailo, pozana si e Taitiusi Zasitasi. Taitiusi si hoke vahesia sa sa Tamasa, meke sa nana vetu si kapae pa sinaqoqi tadi na tie Ziu.

⁸Se Kirisipasi sa ṉati koimata pa sinaqoqi sana, meke sari nana tamatina si va hinokaria sa Baṉara. Meke soku pule tie pa Koriniti si avosia sa tinarae te Paula meke va hinokara, meke ta papitaiso si arini.

⁹Keke boṉi si zama sa Baṉara koe Paula pa keke dinogodogorae, “Mu lopu matagutu, ba mamu tarae nono la tu. Lopu noso.

¹⁰Ura Arau si korapa koa somana koa goi. Loke tie si kote raza igo na va sigitigo, sina soku arini pa vasileana nomana hie si na Qua tie Arau,” gua si Asa.

¹¹Ke keke vuaheni kukuruna si koa se Paula vasina, meke variva tumatumae nia sa sa zinama te Tamasa koa rini.

¹²Meke sipu tava turu se Qalio koari na tie Roma, pude na qavuna pa pinaqaha popoa Akaia, sari na tie Ziu vasina si varigara meke tuqe vagia rini se Paula, meke turaṉa la nia pa vinaripitui.

¹³Zama si arini, “Sa tie hie si korapa ososo ni sa sari na tinoni pude vahesia sa Tamasa pa keke siraṉa sapu sea pa mami Tinarae,” gua si arini.

¹⁴Ke sipu korapa va namanama pude zama mo gua se Paula, si zama la mo se Qalio koari na tie Ziu, “Be guana zutu nia gamu na tie Ziu sa tie hie, koa keke tinavete kaleana, hitekena, babe nomana pu tavetia sa, si kote toṉoto mo pude avoso gamu rau.

¹⁵Ba sina sa ginugua la gua mo pa kaiqa zinama, na pozapoza sapu sosoto la gua mo pa mia Tinarae telemia pa mia linotu, ke telemia mo gamu kote va toṉotia. Arau si lopu kaqu varipitui ni sari na ginugua gugua arini,” gua si asa.

¹⁶Meke hitu vura ni sa si arini pa vetu varipitui.

¹⁷Ego, gua ke tuqe vagia ri doduru se Sositenesi, sa ṉati koimata koa sa sinaqoqi vasina, meke seke va kalekaleana ia rini pa kenuna sa vasina varivaripituina. Ba se Qalio si lopu hite hiva galagala nia gua sapu evaṉia rini.

¹⁸Soku rane si koa koari na tie te Karisito pa Koriniti se Paula, meke tiqe toka taluarae la pa Siria si asa. Somana luli koa sa sari Akuila e Pirisila. Meke sipu lopu ele toka rini pa Seniserea, si koto golu si asa, sina hokoto sa nana vina tatara sapu tavetia sa koe Tamasa.

¹⁹Totoso la hogoto rini pa Episasi, si luara vekoi sa sari Akuila e Pirisila, meke la mo pa sinaqoqi si asa, meke la vari vivinei koari na tie Ziu.

²⁰Tepa ia rini si asa, pude koa seunae paki kaiqa rane, ba lopu va egoi Paula si arini.

²¹Tozini sa si arini, “Be pa hiniva te Tamasa, si kote pule mae koa gamu si rau,” gua si asa. Meke tiqe suraṉa pa vaka, meke toka la pa Episasi si asa.

²²Totoso hogoto sa pa Sizaria, si sage la si asa pa Zerusalema, meke la zama qetuqetu koasa ekelesia vasina, meke tiqe hola la pa Anitioki.

²³Mudina sapu la koa seunae hite vasina si asa, si taluarae si asa, meke ene gua pa pinaqaha popoa pa Qalesia, meke pa Pirizia si asa. Meke sovutu va ṉiṉirai sa sari doduru tie te Karisito vasina.

²⁴Koanana pa totoso asa si keke tie sapu podona pa Alekezadaria, pozana si e Apolosi; meke mae si asa pa Episasi. Keke tie bokabokana si asa pa zama, meke pa ginilanadi ri na Kinubekubere Hope.

²⁵Ele tava tumatumae nia sa sa siraṉa tanisa Baṉara, meke na tie tarae maṉinina tugo si asa, meke koba gotogoto sari nana vina tumatumae koasa guguana sa Baṉara Zisu. Ba sa pinapitaiso te Zone mo si gilania sa.