Tinavete 10:37-47

³⁷Meke ele gilania mia gamu sapu gua ta evaṉa pa popoa tadi na tie Ziu, podalae pa Qaleli pa mudina sapu tarae nia e Zone Papitaiso sa pinapitaiso.

³⁸Meke ele gilania mia tugo gamu se Zisu pa Nazareti, sapu ele va siṉi nia Maqomaqo Hope, meke ṉiniraṉira sa Tamasa. Meke sapu ene la mae si Asa, meke taveti Sa sari na tinavete leadi, meke salaṉi Sa saripu ta ṉoṉovala koari na tomate kaleadi, sina koa koa Sa sa Tamasa.

³⁹Gami si na tie pu dogoro soti sari doduru tiṉitoṉa pu evaṉi Sa pa Zerusalema meke koari doduru vasina pule pa popoa tadi na tie Ziu, osolae poka nia na va matea rini si Asa pa korosi.

⁴⁰Ba pa vina ṉeta rane si va turu pulea Tamasa si Asa pa minate, meke vata dogoro pulea Tamasa si Asa koa gami.

⁴¹Lopu pa doduru tie si vura Sa, ba koa gami mo pu ele vizata gami sa Tamasa, pude na tie va sosode. Gami si hena na napo turaṉia si Asa, sipu toa pule si Asa pa minate.

⁴²Meke garunu gami Sa si gami, pude la tarae koari na tie, meke pude tozi vura nia koa rini sapu Asa tugo sapu ele vizatia sa Tamasa, pude na tie varipitui koari na tie toadi meke matedi.

⁴³Sari doduru poropita si huhukia mo si Asa pa dia zinama, sapu sari doduru pu va hinokaria si Asa, si kaqu taleosae sari na dia sinea pa korapa ṉiniraṉira tanisa pozana Sa,” gua se Pita.

⁴⁴Sipu korapa zama se Pita, si ta kamoe nia ri doduru pu avavoso koasa tinarae sa Maqomaqo Hope.

⁴⁵Meke magasa hola sari na tie Ziu pu va hinokaria se Zisu, saripu lulidi mae koe Pita pa Zopa, sina dogoria rini sapu koari na Zenitailo, ba variponi nia tugo Tamasa sa Maqomaqo Hope.

⁴⁶Ura avosi rini sari na tie Zenitailo sapu zama pa votiki vinekala, meke vahesia rini sa Tamasa. Ke zama se Pita,

⁴⁷“Sari kasa tie hire si vagia rini sa Maqomaqo Hope, gua putaputa tugo mo sapu ta evaṉa koa gita. Ke vegua? Sei kote boka hukati si arini pude ta papitaiso?” gua si asa.