Tinata Valavalar 6:4-35

⁴Koko ra matam na pula ma ra va mat, Ma koko ra pilpil na matam na mata vava;

⁵Una pila ka da ra king na me i vilau kan ra tena nirovoi, Ma da ra beo i lop kan ra tena kapi beo.

⁶U ra tabauma, una vana tadav ra rumi; Una nuk pa kana mangamangana, ma una minana tana.

⁷A dovotina, pa kana ta luluai, Ba ta monamono, ba ta tena varkurai,

⁸Ma i vaninare ke ra ana magit ta ra kilala na keake, Ma i varurue ra ana magit ta ra e na varuruai.

⁹Aivia ra bung una va boko, u a tabauma? Vingai una ga tut kan kaum nidiop?

¹⁰Ta ik a mata vava, ta ik a nidiop, Da likun ra lima ta ik upi da ngo,

¹¹Ma ra kini na luveana na tadav u da ra tena limlibur vakuku, Ma ra niiba da ra tena kap vargal.

¹²A tutana vakuku, a tena varpiam, I vanavana ma i rara ra ngiene,

¹³I pitu mata, i gege ra kakene, I tutu ma ra kaka na limana,

¹⁴A nuknukina i gegagege, i nuknuk upi ra kaina vatikai, I vaume ra varngangar;

¹⁵Kari ra ana vinirua na tadav vakaian ia, Na tagigi vakaian, ma pa da valaun ia.

¹⁶Laptikai na magit ra Luluai i milmilikuane diat, Lavurua dia da ra bilak na magit pirana:

¹⁷A mara i kolakolo, a karameme i vaongo, A lima ba i ubu doko ra tena takodo,

¹⁸A bala ba i nuk upi ra varpiam, A keke i vutvut upi ra kaina,

¹⁹A tena varvai ba i vatang ra vaongo, Ma nina ba i vaume ra varngangar pire diat dia barturana.

²⁰Natugu, una mur ra vartuluai tamam i tul tar ia tam, Ma koko una vana irai kan ra vartovo kai tinam.

²¹Una vung vake ta ra nuknukim, Una kurkurua me.

²²Ba u vanavana na rap lue u; Ba u vava na balaure u; Ma ba u tavangun amur a pirpir me.

²³Tago ra vartuluai i da ra lamp, ma ra tinata na vartovo i da ra kapa, Ma ra varpit ta ra varvateten i da ra nga na nilaun,

²⁴Upi na balaure bat u kan ra kaina vavina, Kan ra varmananai vavaongo ba ra enana i pait ia.

²⁵Koko ra balam na kaina upi ia tago a metekina, Ma koko na valam pa u ma ra pilpil na matana;

²⁶Tago ra paiga na vavina i mainge ke ra ana nian, Ma ga ra tena nipo, a vavina, i rovoi upi ra ngatngat na nilaun.

²⁷Dave, ta tikai na kap ra iap ta ra bongobongono, Ma pa na birao bar kana mal?

²⁸Ma dave, ta tikai na rua taun ra lakit, Ma pa na rang ra kauna bar?

²⁹Damana nina i vana tadav ra taulai kai talaina; Nina i bili ia pa na langalanga.

³⁰A tarai pa dia manga milikuane ra tena nilong, ba i long Upi na maur tago i mulmulum;

³¹Ma ba di babare, na valavurua ma ra balbali; Na bali ia ma ra lavur magit ta ra kubana.

³²Nina dir po ma ta vavina i tabobo; Nina i pait ia i vakaina ra tulungeana iat.

³³Na kinkin ma na vavirvir, Ma pa da pun vue kana niruva.

³⁴Tago ra tutana na ngangal ma ra varvapir, Ma ta ra bung na varobo pa na varmari.

³⁵Na vue ke ra varkul; Ma ba ra vartabar i ngala kakit, pa na maram tana.