Tinata Valavalar 4:2-27

²Tago iau tul tar a bo na minatoto ta vavat; Koko avat a vana irai kan kaugu tinata na vartovo.

³Tago lua iau ga bul, ma iau ga ki pire tamagu, Iau a gobolina ma ra kavakake ta ra luaina mat i nagu.

⁴Ma i ga tovo iau, ma i ga biti tagu dari: Boina ba ra balam na kodop vake kaugu tinata; Una mur kaugu lavur vartuluai, ma una laun;

⁵Koko una valubane ra tinata na ngiegu, ma koko una tapgaga kan ia. Una ongor upi ra kabinana, una ongor upi ra kapa na ninunuk;

⁶Koko una vana kan ia, ma na vaale bat u; Una manane, ma na balaure bat u.

⁷A kabinana i lia; io, una ongor upi ra kabinana; Maia, una tul tar kaum lavur tabarikik par upi kaum ra kapa na ninunuk.

⁸Una pite vangala pa ia. ma na vatavua u; Ba u kapupi ia, na vuna ta ra variru piram.

⁹Na vatoke tar ra mari na vipuar ta ra ulum, Ma na mar u ma ra potar na kere.

¹⁰Ea, natugu, una valongore, ma una kapupi kaugu lavur tinata, Upi na peal kaum kilakilala na nilaun.

¹¹Iau tar tovo u ta ra nga na kabinana; Iau tar agure pa u ta ra dovot na nga.

¹²Ma ba u vanavana pa ta magit na tur bat ra kakim, Ma ba u vutvut pa una tutukai.

¹³Una vatur vadekdek vake ra varvateten; koko ana vung vue; Una balaure vake, tago una lalaun tana.

¹⁴Koko una mur ra nga kai ra bilak na tarai, Ma koko una vanavana ta ra nga kai ra umana tena varpiam.

¹⁵Una tur irai kan ia, koko una vana tana; Una tur ar, ma una vana pakit ia.

¹⁶Tago pa dia va mat, ona pa dia ga pait value ra varpiam; Ma ra nidiop pa i tadav diat, ona pa dia ga vabura value ta tikai.

¹⁷Tago dia en ra magit di ga long ia, Ma dia mome ra polo na vain ba dia ga ra pa ia.

¹⁸Ma ga ra nga kai ra tena takodo i da ra kapa i pupua, Ma i manga kapa vanavana upi na keake tuna boko.

¹⁹A nga kai ra umana tena varpiam i da ra bingnimuna; Pa dia nunure ra magit dia tutukai tana.

²⁰Natugu, una nuk pa kaugu tinata; A talingam na valongore kaugu lavur varvai.

²¹Koko una lingan kan diat; Una kodop vake diat ta ra balam iat.

²²Tago diat dia tikan tadav diat dia laun tana, Ma ra paka i diat par i lagar tana.

²³Una mono bat tuna ra balam; Tago ra nilaun i arikai tana.

²⁴Koko una vatang ra tinata i vaongo, Ma koko una pukue vagege ra varvai.

²⁵A matam na gigira uro na lua ka, Ma ra pilpil na matam na gigira takodo ko.

²⁶Una nuk bulu pa ra nga ure ra kaum, Ma una kure mal kaum lavur nga.

²⁷Koko una tapgaga ta ra papar a lima tuna ba ta ra papar a maira; Una tak vakari vue ra kaum kan ra varpiam.