Tinata Valavalar 30:2-28

²A dovotina iau ra ngala na koloata ta ra tarai par, Ma pa iau minana da ra tarai.

³Ma pa iau ga vartovo ta ra kabinana, Ma pa iau matoto ta ra Lia Kakit.

⁴To ia i ga tutua urama ra bala na bakut ma i ga kuba mulai? To ia i ga vatur vake ra vuvu ma ra limana? To ia i ga pulu ra lavur polo ma kana mal? To ia i ga vung vapadikat ra umana ngu na rakarakan a gunagunan? To ia ra iangina, ma to ia ra iang i natuna, a tutana? Kan u nunure?

⁵A tinata par kai God i gomgom; I da ra bakbakit pire diat dia nurnur tana.

⁶Koko una vot kana tinata, Kan na pit u, ma na tapala ba u a tena vaongo.

⁷A ura magit iau tar lul ia piram; Koko una muie dir tagu ba iau laun boko:

⁸Una tak vue ra mangamangana vakuku kan iau ma ra lavur vaongo; Koko una tul tar ra kini na luveana tagu ba ra kini na uviana; Una tabar iau ma ra magit na nian ba i topa iau,

⁹Kan ina ga maur tuna, ma ina pue vue u, ma ina ga biti: To ia ra Luluai? Ba kan ina iba, ma ina loalong, ma ina kaba ra iang i kaugu God.

¹⁰Koko una takun vavaongo ra tultul pire kana luluai, Kan na bor vakaina u, ma da takun u.

¹¹Tika na taun tarai dia tata vabilak tama i diat, ma ra tutana, Ma pa dia tata vadoane na i diat.

¹²Tika na taun tarai dia malamala tena gomgom, Ma a dovotina, pa di ga dalu vue kadia dur.

¹³Tika na taun tarai, ea, dia matana luluai! Ma ra pilpil na mata i diat i tur arama iat.

¹⁴Tika na taun tarai a umana pal a ngie i diat dia da ra umana pakat na vinarubu, ma kadia umana gabar dia da ra umana banam, Upi diat a konom vue ra umana luveana kan ra rakarakan a gunagunan, ma diat dia ki na niiba kan ra tarai.

¹⁵Ra domol a ura natuna; dir vala biti, Una vartabar, una vartabar. A utul a magit nina pa dital maur tika na bung, A ivat ba pa dia biti, I tar topa ia:

¹⁶A ruarua na tulungen, a vavina i biu, A pia ba pa i bilim ma ra tava, Ma ra iap ba pa i biti, I tar topa ia.

¹⁷A mata i nina ba i vul tamana ma i pidimuane ra tinorom tadav nana, A umana kotkot ta ra male diat a tolok vue, Ma ra umana nat na luar diat a en ia.

¹⁸A utul a magit dital pidik piragu, A ivat pa iau nunure diat:

¹⁹Ra nga kai ra taragau ta ra maup, Ra nga kai ra vui ta ra ul a vat ki, Ra nga kai ra parau ta ra ul a ta, Ma ra nga kai ra tutana tadav ra inip na vavina.

²⁰Ra mangamangana kai ra vavina, a tena nipo, i dari: I ian, ma i u ra ngiene, Ma i biti, Pa iau ga pait ta kaina magit.

²¹Ure a utul a magit a gunan i guria, A ivat pa i ki vamadudur vue diat:

²²A tultul ba i ki na king, A lunga ba i maur ma ra magit,

²³A milmilikuan na vavina ba dir taulai ma ra tutana, Ma ra tultul na vavina ba i kia vue kana tadar vavina.

²⁴A ivat na magit dia ikilik ta ra rakarakan a gunagunan, Ma dia kabinana tuna:

²⁵A umana rumi vakir dia dekdek, Ma ga dia varurue ra adia magit ta ra kilala na keake;

²⁶A umana mang dia bilua ka, Ma ga dia pait ra kubakuba i diat ta ra lavur vat;

²⁷A umana kubau pa kadia ta king, Ma ga dia vana rikai da ra umana loko na tarai na vinarubu;

²⁸Ra kupkup pa i dekdek upi una vatur vake, Ma ga i kiki ta ra kuba i ra umana king.