Tinata Valavalar 25:16-24

¹⁶Dave, u tar tikan tadav ra bulit na livur? Una en ra ngungu tana ba i topa u, Kan una manga maur me, ma una marue mule.

¹⁷Koko una ruk milat ra kuba i talaim, Kan na talanguan tam, ma na milmilikuane u.

¹⁸A tutana ba i varvarvai vavaongo ure talaina, I da ra ram, ma ra pakat na vinarubu, ma ra pu i lamia.

¹⁹A nurnur tadav ra tavir na tutana ta ra bung na purpuruan, I da ra pal a ngia i tabubur ma da ra keke i takari.

²⁰Da tikai i ule vue ra mal ta ra madoldol, ma da ra tava i pinpidian ta ra mata na manua, Damana nina i kakailai pire tikai i mamat ra balana.

²¹Ba kaum ebar i mulmulum, una tabar ia ma ra magit na nian; Ma ba i mar, una vamoma ma ra tava;

²²Tago damana u vuvunge muka ra lakit i io ta ra uluna, Ma ra Luluai na vabongon u.

²³A labur i kap vaarike ra bata, Damana ra varurai i vuna ta ra matana kankan.

²⁴I manga boina ba da kiki ta ra ul a pal ika, Ma pa i boina ba da kiki varurung ma ra vavina, a tena varngangar, ta ra ngala na pal.