Tinata Valavalar 21:7-25

⁷A vinarubu kai ra umana tena varpiam na pakate vue diat, Tago dia ole vue ra mangamangana takodo.

⁸Ba tikai i puak pa ra mamat na kaina mangamangana, i gegagege tuna kana nga; Ma nina i gomgom, i takodo kana papalum.

⁹I manga boina ba da kiki ta ra ul a pal ika, Ma pa i boina ba da kiki varurung ma ra vavina, a tena varngangar, ta ra ngala na pal.

¹⁰A bala i ra tena varpiam i bala upi ra varpiam, Ma pa i mari talaina.

¹¹Ba di kure ra tena varkulumai, ra tutana i tuptup na kabinana tana; Me ba di vateten ra tena kabinana, i vatur vake ra minatoto tana.

¹²A tena takodo i nuk pa ra kuba i ra tena varpiam; Tago di vue pukue vue ra umana tena varpiam, ma dia virua.

¹³Nina i ang bat ra talingana ba ra luveana i kakail, Na kakail bula boko ma pa da valongore.

¹⁴A vartabar ivai i pun vue ra kankan, Ma ra kul varbat ba tikai i ive ta ra bongobongono i vango ra ngala na kulot.

¹⁵A magit na gugu pire ra tena takodo upi na pait ra takodo na varkurai, Ma ra vinirua na tadav ra tena pait ra kaina.

¹⁶Ba tikai i rara kan ra nga na minatoto, Na ki ka muka ta ra kivung kadiat dia ga mat.

¹⁷Nina ba a tena nilibur na ki na luveana boko; Ma ra lup mome vain ma ra lup vartap pa na uviana.

¹⁸Da varkul ma ra tena varpiam ure ra tena takodo, Ma ra tena vavagu na kia vue ra dovot na tutana.

¹⁹A kini ta ra bil i boina, Ma pa i boina tuna ra kini varurung ma ra vavina, a tena varngangar ma ra tena varvakankan.

²⁰A ngatngat na tabarikik ma ra dangi dir ki ta ra kuba i ra tena kabinana, Ma ra lunga i vole dir par.

²¹Nina i mur ra mangamangana takodo ma ra varmari, Na tikan tadav ra nilaun ma ra variru.

²²A tena kabinana i ko rikai ta ra pia na pal kai ra umana lebe, Ma i vue pukue vue ra dekdekina nina di nurnur tana.

²³Nina i tur bat ra ngiene ma ra karameana, I balaure bat kana nilaun kan ra kini na malari.

²⁴Nina ba i kolakolo ra nuknukina ma i malamala luluai, di vatang ia ba ra tena varkulumai, I papalum ma ra ngala na nuknukina ure mule, ma pa i ruva.

²⁵A tabauma i mat ma ra mamainga upi ta magit. Tago ra limana i ole ra papalum.