Tinata Valavalar 1:7-21

⁷A variru tadav ra Luluai ia ra vunapai ra kabinana; Ma ra umana papaua dia nuk piapiam vue ra kabinana ma ra varvateten.

⁸Natugu, una valongore ra varvateten kai tamam, Ma koko una piam vue ra umana vartovo kai tinam;

⁹Tago dia da ra mari na vipuar ta ra ulum, Ma ra kurkurua ta ra inoam.

¹⁰Natugu, ba ra umana tena varpiam dia lam rap pa u, Koko una mulaot.

¹¹Ba dia biti, U dat, dat a vana, dat a kiki uai upi ra vardodoko, Dat a paraparau vakuku upi diat dia tuptup;

¹²Dat a konom pa diat ba dia laun boko da ra ruarua na tulungen, Ma ba dia ongor boko, da diat dia kuba ta ra tung;

¹³Dat a tikan tadav ra lavur ngatngat na tabarikik, Dat a vangan vabuka ra kuba i dat ma ra vurvur magit da ra pa ia;

¹⁴Boina ba dat a varbete, Ma dat par na kopono ko kada vuvuvung na mani.

¹⁵Natugu, koko ava varagur ma diat ta ra nga, Una tigal bat ra kaum ba koko na tur ta kadia pal a nga;

¹⁶Tago ra kau i diat i vutvut upi ra kaina, Ma dia pampam upi ra vardodoko.

¹⁷A magit vakuku ra ubene, Ona di pala ia ta ra mata i ra beo;

¹⁸Ma dia kobot upi ra gapu i diat iat, Dia paraparau upi ra vinirua ba na tadav diat iat.

¹⁹Damana ra mangamangana kadiat dia vakavakaina upi diat a vangala kadia tabarikik, Nina ba i vole vue ra nilaun kadiat dia vung ia.

²⁰A kabinana i manga oro ta ra nga; I varvarvai ta ra umana tavul;

²¹I oraoro ta ra ngala na tavul a bung; Ta ra mataniolo ta ra pia na pal i vatang kana tinata dari: