Tinata Valavalar 14:1-30

¹A vaden ba dia kabinana dia pait mal ra kubakuba i diat, Ma ra papaua i re vue ma ra limana iat.

²Nina ba i dovot kana vinavana i ru ra Luluai, Ma ga nina ba i gegagege kana mangamangana i pidimuane.

³A virit i ki ta ra ngie i ra lunga ure kana mangamangana luluai, Ma ga ra ngie i ra umana tena kabinana na vaale bat diat.

⁴Ona pa ta bulumakau, pa di vung ana ta kon; A tabarikik i tavua ta ra dekdek i ra bulumakau.

⁵A dovot na tena varvai pa na vaongo, Ma ga ra kaina tena varvai i vartuam uka.

⁶A tena varkulumai i tikan upi ra kabinana, ma pa i na tadav ia, Ma ra kabinana pa i dekdek tadav nina i kapa ra nuknukina.

⁷Una vana kan ra luaina mata i ra lunga, Tago pa una matote ta tinata na kabinana tana.

⁸A matotono i nunure kana nga, kana kabinana nam; Ma ra umana lunga dia papaua ma ra vartuam.

⁹A umana lunga dia varkulumai ure ra vuai ra kaina mangamangana, Ma ra varmari i ki livuan ta ra umana tena takodo.

¹⁰A nuknuk i dat i matoto ta kana niligur iat, Ma ra vaira pa i kairane maravut ia ta kana gugu.

¹¹A kuba i ra tena varpiam na tarip, Ma ga ra pal na mal kai ra dovot na tutana na tur bulu.

¹²Tika na nga a tarai dia biti ba i takodo, Ma ra tukuna i tadav ra minat.

¹³Ba ra tarai dia nonganongon, ra bala i diat i ligur uka; Ma ra mutuai ra gugu a tinabun uka.

¹⁴Nina ba ra balana i vana rara na milamila ta kana mangamangana iat, Ma ra bo na tutana na ti maur ma kana papalum iat.

¹⁵A tutana i tuptup i kapupi ra lavur tinata, Ma ra matotono i nuk bulu pa kana vinavana.

¹⁶A tena kabinana i burut, ma i vana kan ra varpiam; Ma ra lunga i ngangangal ma ra kulot, ma pa i burut.

¹⁷A lup kankan na pait ra magit na papaua, Ma di milikuane ra tutana ba i varpit ure ra varpiam.

¹⁸A umana tuptup dia vatur vake ra papaua, Ma ga ra umana tena kabinana dia toke ra kabinana.

¹⁹A umana tena varpiam dia va timtibum ta ra luaina mata i ra umana boina, Ma ra umana bilak ta ra mataniolo kai ra tena takodo.

²⁰A luveana, talaina bula i milikuane, Ma mangoro dia talaina ma ra uviana.

²¹Nina i pidimuane talaina i varpiam, Ma ga nina i mari ra umana luveana i ti doan nam.

²²Dave, diat dia nuk upi ra varpiam pa dia vana rara vang? Diat dia nuk upi ra boina diat a vatur vake ra varmari ma ra dovotina.

²³A lavur papalum par dia vuna ta ra vabongon, Ma ra kinanang na pirpir ika i valuveana dat.

²⁴A kere kai ra umana tena kabinana, kadia kabinana; Ma ra kere kai ra umana lunga, kadia papaua ka.

²⁵A dovot na tena varvai i valangalanga ra tarai, Ma nina ba i vatang ra vaongo a tena vartuam nam.

²⁶Nina i ru ra Luluai pa i burut tuna, Ma ra umana natuna kadiat ra pal na bakbakit.

²⁷A variru tadav ra Luluai ia ra mata na nilaun, Upi da laun tana kan ra lavur palai na minat.

²⁸A king i mamar ta ra ngala na kor na tarai, Ma ba ra luluai i iba upi ra tarai. na virua ka.

²⁹Nina i vavabing ma ra kankan i ngala kana kabinana, Ma ra tena nirut i vangala pa ra papaua.

³⁰Ba ra bala i dat i ngo, ra pal a paka i dat i laun bulu; Ma ra varpin i vamaroto ra uru i dat.