Tinata Valavalar 11:6-26

⁶A mangamangana takodo kadiat dia dovot na valaun diat, Ma ra umana tena vavagu diat a virua ta kadia kaina mamainga iat.

⁷Ba ra tena varpiam i mat, pa i ki pa mule ta magit, Ma ra nurnur kai ra bilak na tutana i panie.

⁸Di valaun ra tena takodo kan ra magit na varmonong, Ma ra tena varpiam i kia vue.

⁹A tutana vakuku i vakaina talaina ma ra ngiene, Ma ra umana tena takodo dia langalanga ure ra minatoto.

¹⁰Ba ra umana tena takodo dia ki bulbulu, diat par ta ra pia na pal dia gugu; Ma ba ra umana tena varpiam dia virua, di kukula na gugu.

¹¹A pia na pal i tavua ta ra varvadoan kai ra dovot na tarai, Ma di vue pukue vue ta ra ngie i ra umana tena varpiam.

¹²Nina i pidimuane talaina i papaua ka, Ma nam ba i kapa ra nuknukina i ki mut uka.

¹³A tena varurai i vanavana vurvurbit ma i vaarike ra magit i pidik, Ma ra dovot na tutana pa i rarada.

¹⁴Ona pa ta bo na varvateten, ra tarai dia bura; ma ba i peal ra umana tena varvateten, dia ki bulbulu.

¹⁵Nina i tur kia ra vaira ure kana nilala na kaina tana, Ma nina i milikuane ra vavalima na kiki bulu.

¹⁶A bo na vavina i vatur vake ra variru, Ma ra umana tena ra varpa dia vatur vake ra tabarikik.

¹⁷A tena varmari i vadongone mule ia iat, Ma ra tena varvakadik i vakaina ra pal a pakana iat.

¹⁸A tena varpiam i vatur vake ra vabongon i vaongo, Ma ga nina i vaume ra mangamangana takodo i vatur vake ra dovot na vapuak.

¹⁹Nina i tur padikat ta ra mangamangana takodo na vatur vake ra nilaun, Ma nina i murmur ra kaina na mat i tana.

²⁰A Luluai i milikuane diat i gegagege ra nuknuk i diat, Ma ga diat i ko kakit kadia mangamangana i manga gugu ta diat.

²¹A dovotina muka, a varkurai na tadav ra tena varpiam, Ma ga ra umana tena takodo da valaun diat.

²²Da ra boroi i mong ma ra mamar bibilau na goled, Damana ra metek na vavina ba pa i kapa ra nuknukina.

²³A mamainga kai ra tena takodo i boina ka, Ma ra tena varpiam i ki pa ka ra ngala na kankan.

²⁴Ta tikai i vartabar ma i uviana ka tana; Ma ta ra tikai i muie ra magit i takodo, ma i iba vanavana tana.

²⁵A tena vartabar na ti maur boko, Ma nina ba i tabar vamomo ra tarai da kabila tabar vamoma.

²⁶A tarai diat a tata vabilak nina i muie vake ra kon, Ma ra varvadoan na ki ta ra ulu i nina ba i ivure.