Tinata Valavalar 10:1-26

¹A umana tinata valavalar kai Solomon. Ba ra bul i kabinana tamana i gugu tana, Ma ba ra bul i lunga nana i ngarao tana.

²A tabarikik ba di ga long ia pa i vadongone ta tikai, Ma ga ra mangamangana takodo i varvalaun kan ra minat.

³A Luluai pa na nur vue ra bala i ra tena takodo upi na mulmulum, Ma i vung vue ke ra mamainga kai ra tena varpiam.

⁴Nina i biluane ra papalum, na luveana, Ma ga nina i ongaongor ta ra varvakai, na uviana.

⁵A bul nina i varurue magit ta ra e na keake i kabinana, Ma ga ra bul i va mat ta ra e na varuruai i vuna ta ra niruva.

⁶A varvadoan i ki ta ra ulu i ra tena takodo, Ma ra vakavakaina i ki ivai ta ra ngie i ra tena varpiam.

⁷Di matamatane upi ra tena takodo, ma di pite pa ia, Ma ga ra iang i ra tena varpiam na mareng ika.

⁸Nina i kapa ra nuknukina i kapupi ra umana vartuluai, Ma nina i tatike ra tinata na papaua na virua.

⁹Nina i dovot kana mangamangana vanavana bulu, Ma ga nina i vabilak kana mangamangana, da kapa boko ure.

¹⁰Nina i pitu mata i vuna ta ra varngangar, Ma nina i tatike ra tinata na papaua na virua.

¹¹Ra ngie i ra tena takodo i da ra mata na nilaun, Ma ra vakavakaina i ki ivai ta ra ngie i ra tena varpiam.

¹²A milmilikuan i vuna ta ra lavur varngangar, Ma ga ra varmari i tuba ra labur varpiam par.

¹³Di na tadav ra kabinana ta ra ngie i nina i kapa ra nuknukina, Ma ga ra virit i topa ra tamuru i ra papaua.

¹⁴A umana tena kabinana dia vung vake ra minatoto, Ma ra ngie i ra umana papaua i da ra vinirua i maravai.

¹⁵A tabarikik kai ra uviana kana dekdek na pia na pal, Ma ra umana luveana dia virua ta kadia kini na niiba.

¹⁶Ra varvakai kai ra tena takodo i papait na vatavua ra nilaun, Ma ra vuai ra papalum kai ra tena varpiam i papait na vatavua ra varvakaina.

¹⁷Nina i nuk pa ra varvateten i vanavana ta ra nga na nilaun, Ma ga nina i pue vue ra varpit i vana rara.

¹⁸A tena vavagu i ive ra milmilikuan, Ma nina ba i vatang ra tinata na varurai i lunga.

¹⁹Ba da vangala ra tinata da rara bula tana, Ma ga nina ba i kure bat ra ngiene i kabinana.

²⁰A karamea i ra tena takodo i da ra ngatngat na silva; Ma ra bala i ra umana tena varpiam pa i manga topa ta magit.

²¹Ra ngie i ra tena takodo i tabar mangoro, Ma ga ra umana lunga dia mat ma ra papaua.

²²A varvadoan kai ra Luluai i vuna ta ra kini na uviana, Ma ra niongor pa i vanot ia.

²³A lunga i libur ma ra kaina mangamangana, Ma nina i kapa ra nuknukina i gugu ta ra kabinana.

²⁴Nina ra magit ba ra tena varpiam i burutue na tadav ia muka, Ma da tul tar ra magit ta ra tena takodo, nina i mainge.

²⁵Ba ra kalivuvur i bolo, ra tena varpiam i panie tana, Ma ra tena takodo i da ra vunapaina i tur okot tukum.

²⁶Da ra tava mapak ta ra pal a ngie i dat, ma da ra mi ta ra kiau na mata i dat, Damana ra tabauma pire diat dia tultulue.