Tillɑɑ Tǝmlɛ 7:32-60

³²Mɑɣɑlɛ nyɑ́ cɑɑnɑɑ cɑɑnɑɑ Ɩsɔ, Apǝlɑhɑm nɑ Ɩsɑɑkɑ nɑ Yɑkɔpʋ pɑ Ɩsɔ. Tǝnɑɣɑ sɔɣɔntʋ kpɑ Moisi kɛ sɔsɔm nɑ ɩ́ seliɣi, hɑlǝnɑ ɩ́ kpisi nyǝnʋɣʋ.

³³Ɩlɛnɑ Tɑcɑɑ tɔ Moisi sɩ: Wɔɣɔsɩ nyɑ́ ntɑŋkpɑlɑ, timpi tɑɑ n sǝŋɑ mpʋ tɔ pǝ kɛ́ tɛtʋ kɑtɛ nyǝntʋ kɛ́.

³⁴Mɑ nɑwɑ mɑ yǝlɑɑ mpɑ pɑ wɛ Icipiti tɔ pɑ wɑhɑlɑ, mɑ nɩɩ pɑ wulɑ. Ɩlɛnɑ mɑ́ tii sɩ mɑ yɑkɩ-wɛ. Tɔʋ, kʋlɩ, mɑ tiliɣi-ŋ Icipiti.

³⁵Moisi wei ɩnɩ ɩ tɔm Ɩsɛɣɛlɩ nyǝ́mɑ kɑ kisɑɑ tǝkpɑtɑkpɑtɑ nɑ pɑ́ tɔmɩ-ɩ sɩ: Tǝ nɑ-ŋ, tɑ́ wulɑʋ nɑ tɑ́ tɔm hʋʋlʋ tɔ, kʋlʋm ɩnǝɣɩ Ɩsɔ tɑɣɑnɑ kʋsʋɣʋ nɑ ɩ́ tili pɑ kiŋ, sɩ ɩ́ lɑ pɑ wulɑʋ nɑ ɩ́ wɑɑsɩ-wɛ nɑ ɩsɔtɑɑ tillu wei ɩ kɑ lɩɩ ɩ tɔɔ kɛ́ hotiyɑ kiŋ tɔ ɩ toŋ tɑɑ.

³⁶Ɩnɩ ɩ lɑpǝnɑ piti tǝmɑ nɑ Ɩsɔ kɔkɔlɔ nyǝm nɑ ɩ́ lǝsɩ-wɛɣɛ Icipiti tɛtʋ tɑɑ. Ɩ lɑpɑ mpʋ tɔtɔɣɔ sǝsǝncɑɑsɩ teŋku tɑɑ nɑ wʋlɑɣɑ tɛtʋ tɑɑ, hɑlɩ pɩɩsɩ nɩɩlɛ.

³⁷Moisi ɩnɩ ɩ heelinɑ Ɩsɛɣɛlɩ nyǝ́mɑ sɩ: Ɩsɔ kɑ́ kɔnɑ-mɛɣɛ Ɩsɔ kʋyɔɣɔtʋtʋ tɛlǝsʋlʋ nɔɣɔlʋ wei ɩ wɛ ɩsɩɩ mɑ́, nɑ ɩ kɑ́ wɛɛ mǝ mɑɣɑmɑɣɑ mǝ piitim tʋ tɔ.

³⁸Kʋlʋm ɩnɩ ɩ kɑ wɛnnɑ Ɩsɛɣɛlɩ nyǝ́mɑ mpɑ pɑɑ kotɑ wʋlɑɣɑ tɛtʋ tɑɑ tɔ pɑ kiŋ. Ɩ́ nɑ ɩsɔtɑɑ tillu wei ɩ kɑ yɔɣɔtǝnɑ-ɩ pʋɣʋ Sinɑyi tɔɔ tɔ pɑ wɛnnɑ tɑ́ cɑɑnɑɑ cɑɑnɑɑ kiŋ kɛ tǝnɛ ɩnɩ. Moisi ɩnɩ ɩ mʋnɑ Ɩsɔ Tɔm nti tǝ lɑkɩ tǝmlɛ kɛ sɔsɔm tɔ sɩ ɩ tɛlǝsǝɣɩ-tʋ.

³⁹Amɑ tɑ́ cɑɑnɑɑ cɑɑnɑɑ tɑ nɩɩnɑ-ɩ. Pɑ kisɑ-ɩ nɑ pɑ́ kpɑɣɑ pɑ lɑɑkɑlǝnɑɑ nɑ pɑ́ mǝŋnɑ Icipiti.

⁴⁰Hɑlǝnɑ pɑ́ yɔɣɔtɩ Alɔŋ sɩ: Lu-tʋɣʋ tʋɣʋ nɑ tǝ́ nyǝnǝɣɩ-kʋ. Pǝ tɑɣɑ pʋlʋ, tǝ tɑ nyɩ mpi tɑ́ Icipiti tɑɑ lǝsǝlʋ Moisi tɛmnɑɑ tɔ.

⁴¹Ḿpʋ́ɣʋ́ pɑ lupɑ nɑule nɑ pɑ́ pǝsɩ-tɛɣɛ pɑ tʋɣʋ nɑ pɑ́ lɑɑ-tɛ. Hɑlǝnɑ pɑ́ yɔɔlǝnɑ pɑ niŋ kʋlupum mpǝɣɩ teu.

⁴²Ḿpʋ́ɣʋ́ Ɩsɔ lɑpɑ-wɛɣɛ ɑwusɑ nɑ ɩ́ yele-wɛ sɩ pɑ́ nyǝnǝɣɩ ɩsɔtʋlʋŋɑsɩ kɛ pɑ tɩɩŋ, ɩsɩɩ pɑɑ ŋmɑɑʋ Ɩsɔ kʋyɔɣɔtʋtʋ tɛlǝsǝlɑɑ tɑkǝlɑsɩ tɑɑ tɔ sɩ: Ɩsɛɣɛlɩ nyǝ́mɑ mɛ, mɑɣɑ ɩ́ lɑpɑ kɔtɑsɩ nɑ ɩ́ fɛɛnɩ wʋlɑɣɑ tɛtʋ tɑɑ kɛ́ pɩɩsɩ nɩɩlɛ tɑɑ?

⁴³Aɑɩ, tʋɣʋ Molɔkɩ cokǝle nɑ mǝ tʋɣʋ Lefɑŋ ɩsɔtʋlʋŋɑ lɛɛsʋɣʋ kɛ ɩ́ kpɑɣɑɑ nɑ ɩ́ pɑɑsǝɣǝnɑ. Ɩ tǝnɑɣɑ mpʋ, pǝ tɑɣɑ wei ɩ́ lupɑ sɩ ɩ́ tǝŋǝɣɩ tɔɣɔlɛ? Pǝ tɔɔ kɛ́ mɑɑ yele nɑ pɑ́ ponɑ-mɛɣɛ Pɑpiloni, hɑlǝnɑ ɩ́ tɛɛ pǝ wɑɑlɩ.

⁴⁴Wʋlɑɣɑ tɛtʋ tɑɑ tǝnɛ ɩnɩ tɑ́ cɑɑnɑɑ cɑɑnɑɑ kɑ wɛnɑ cokǝle, nɑ tǝ tɑɑ nɑ seliyɑ kpɑɑtɑnɑɑ. Pɑɑ sikɑ-tɛɣɛ teitei kɛ́ ɩsɩɩ Ɩsɔ kɑ heeluɣu Moisi tɔ. Teitei ɩsɩɩ nte tǝ tɑkɑ Moisi kɑ nɑwɑ tɔ.

⁴⁵Tɑ́ cɑɑnɑɑ cɑɑnɑɑ cɛlɑ-tɛɣɛ pɛlɛ pɑ wɑɑlɩ nyǝ́mɑ. Ɩlɛnɑ pɛlɛ pɑ́ kpɛnnɑ-tɛɣɛ timpi Yosuwee tɛɛ-wɛɣɛ nɔɣɔ nɑ Ɩsɔ yɑsɩ piitimnɑɑ kɛ pɑ ɩsɛntɑɑ nɑ pɑ́ tɔɣɔ tɛtʋ tɔ. Nɑ tǝ́ wɛɛ tǝnɑɣɑ mpʋ, hɑlǝnɑ Tɑfiiti wɑɑtʋ.

⁴⁶Ɩsɔ lɑŋlɛ hɛɛnɑ-ɩ teu, ɩlɛnɑ Tɑfiiti nɑ́ɑ́ sǝlǝmɩ-ɩ nɔɣɔ, sɩ ɩ lɑkɩ ɩnɩ wei ɩ kɛ́ Yɑkɔpʋ Ɩsɔ tɔɣɔ tǝcɑɣɑlɛ.

⁴⁷Pǝ nɑ pǝ mpʋ tɔ, Sɑlʋmɔŋ ŋmɑnɑ-ɩ kutuluɣu ŋkʋ.

⁴⁸Amɑ pǝ tɑɣɑ ɩsɔtɑɑ Ɩsɔ Sɔsɔ ɩnɩ ɩ cɑkɩ kutuluŋ wei yǝlɑɑ niŋ ŋmɑwɑ tɔ ɩ tɑɑ se. Hɑlɩ Ɩsɔ kʋyɔɣɔtʋtʋ tɛlǝsʋlʋ mɑɣɑmɑɣɑ yɔɣɔtɑ mpʋ sɩ:

⁴⁹Tɑcɑɑ yɔɣɔtɑɑ sɩ: Ɩsɔtɔnʋɣʋ ntɛ́ mɑ kumte. Atɛɣɛlɛ mɑ nɔɔhɛɛ tǝsɩɩlɛ. Ɩlɛ kutuluɣu ŋku kʋ tɑkɑ kɛ́ ɩ́ pǝsǝɣɩ nɑ ɩ́ ŋmɑ-m? Nɑ leɣelɛ mɑ tǝhɛɛsǝlɛ?

⁵⁰Pǝ tɑɣɑ mɑ́ lɑpǝnɑ pǝ tǝnɑɣɑ mpʋ nɑ mɑ niŋ?

⁵¹Tɔʋ, yǝlɑɑ mpɑ mɛ ɩ́ tɛmɑ keeluɣu tɔ, mǝ lɑŋɑ lɑpɑ kpɩɩsǝŋ nɑ mǝ ŋkpɑŋŋ tɛɛlɩ nɑ ɩ́ kisi Ɩsɔ Tɔm. Ɩ́ kpɛɛsǝɣǝnɑ Feesuɣu Nɑŋŋtʋ kɛ tɑm, mǝ cɑɑnɑɑ kɑtɛ kɛ ɩ́ kpɑɣɑɑ.

⁵²Mǝ cɑɑnɑɑ nɑɑsɑ Ɩsɔ kʋyɔɣɔtʋtʋ tɛlǝsǝlɑɑ mpɛ pɑ tǝnɑ nɑ pɑ́ sɔɔ kʋlʋm kɛ? Pɑ kʋ mpɑ pɑ heelɑɣɑ sɩ tɑmpɑnɑ tǝŋlʋ ɩnɩ ɩ kɑ́ kɔɔ tɔ. Kʋlʋm ɩnǝɣǝlɛ mǝ lɑpɑ kɔlɔmɔtɔ kɛ nɔɔnɔɔ nɑ ɩ́ kʋ.

⁵³Hɑlɩ mɛɣɛ ɩsɔtɑɑ tillɑɑ tɛlǝsɑ Ɩsɔ kʋsǝsɩɩtʋ. Pǝyele ɩɩ cɑɑkɩ tǝ tɔkʋɣʋ.

⁵⁴Yutɑ nyǝ́mɑ nɩɩ mpʋ, ɩlɛnɑ pɑ́ɑ́nɑ́ huu pɑ tɑɑ, nɑ pɑ́ sɑlɑ pɑ niŋ kɛ Ɩtiyɛɛnɩ tɔɔ nɑ pɑ́ tɑŋɑɑ.

⁵⁵Ḿpʋ́ɣʋ́ Feesuɣu Nɑŋŋtʋ tomɑ kʋlǝnɑ Ɩtiyɛɛnɩ kɛ teu. Ɩlɛnɑ ɩ́ teki ɩ ɩsɛ nɑ ɩsɔ nɑ ɩ́ nɑ Ɩsɔ teu sɔsɔɔm nɑ Yesu sǝŋɑ ɩ ntɔɣɔŋ tɔɔ.

⁵⁶Tǝnɑɣɑ ɩ tɔmɑ sɩ: Ɩɩ nɑɑ, ɩsɔtɔnʋɣʋ tʋlɑɑ, nɑ mɑ́ nɑɑ Yʋlʋ Pǝyɑɣɑ nɑ kɑ́ sǝŋɑ Ɩsɔ ntɔɣɔŋ tɔɔ.

⁵⁷Ḿpʋ́ɣʋ́ Yutɑ nyǝ́mɑ mɑpɑ kɑpusi kɛ teu, nɑ pɑ́ tǝkɩ pɑ ŋkpɑŋŋ nɑ pɑ́ huli Ɩtiyɛɛnɩ.

⁵⁸Nɑ pɑ́ tuli-ɩ nɑ pɑ́ lɩɩnɑ ɩcɑtɛ wɑɑlɩ, nɑ pɑ́ sʋʋ-ɩ pɛɛ yɑɣɑʋ sɩ pɑ́ kʋ-ɩ. Mpɑ pɑɑ kɛ́ pǝ ɑseetɑ nyǝ́mɑ tɔ, pɛlɛ pɑ sɩɩnɑ ɩfepu wei pɑ yɑɑ sɩ Sɔɔlɩ tɔɣɔ pɑ wontu.

⁵⁹Pɑ tɔŋnɑ Ɩtiyɛɛnɩ kɛ pɛɛ yɑɣɑʋ, ɩlɛnɑ ɩ́ sǝlǝmɩ sɩ: Tɑcɑɑ Yesu kɛlɩ-m.

⁶⁰Ɩlɛnɑ ɩ́ luŋ ɑkulɑ nɑ ɩ́ yɔɣɔtǝnɑ nɔɣɔ sɔsɔɔŋkɑ sɩ: Tɑcɑɑ, tɑɑ nyǝnɩ pɑ ɩsɑɣɑtʋ tǝnɛ. Ɩtiyɛɛnɩ yɔɣɔtɑ mpʋ, ɩlɛnɑ ɩ́ hɛɛ.