Tillɑɑ Tǝmlɛ 5:8-27

⁸Ḿpʋ́ɣʋ́ Piyɛɛ pɔɔsɑ-ɩ sɩ: Ɩ́ pɛɛtɑ mǝ tɛtʋ ntɩ tɔ tǝ liɣitee tǝnɑɣɑlɔ? Heeli-m. Ɩlɛnɑ Anɑniyɑsɩ ɑlʋ cɔ sɩ: Anǝɣǝlɛ mpʋ.

⁹Tǝnɑɣɑ Piyɛɛ yɔɣɔtɑ-ɩ sɩ: Ɩsǝnɑɣɑ mǝ lɑpɑ nɑ ɩ́ kpɛntɩ nɑ ɩ́ pɑɑsɩ nɑ ɩ́ hʋʋ sɩ ɩ́ mɑɣɑsǝɣɩ Tɑcɑɑ Feesuɣu Nɑŋŋtʋ sɩ ɩ́ nɑɑ ɩ wɑɑlɩ? Nyǝnɩ, mpɑ pɑ pimɑ nyɑ́ pɑɑlʋ tɔ pɑ tɛmɑ kɔntɛ, mpɛɣɛlɛ nɔnɔɣɔ tɛɛ. Pɑɑ tɛɛsɩ nyɑɣɑ tɛɛnɑʋ.

¹⁰Tǝnɑɣɑ Anɑniyɑsɩ ɑlʋ ɩnɩ ɩ hotɑ Piyɛɛ nɔɔhɛɛ tɛɛ kɛ́ kpɑkpɑɑ nɑ ɩ́ sɩ́. Ɩfepiyɑ sʋʋwɑ, ɩlɛnɑ pɑ́ mɑɣɑnɑ ɩ sǝpɑ. Ɩlɛnɑ pɛlɛ pɑ́ kpɑɣɑ-ɩ nɑ pɑ́ polo pɑ́ pimi-ɩ ɩ pɑɑlʋ kɔŋkɔŋ tɑɑ.

¹¹Ḿpʋ́ɣʋ́ tɔm ntɩ tǝ lɑpɑ Yesu sɛɛlɑɑ kpekǝle tǝnɑ nɑ mpɑ pɑ nɩɩ-tɩ tɔ pɑ tǝnɑɣɑ keniŋɑ nɑkǝlɩ pǝ fɛɩnɑ.

¹²Tillɑɑ lɑpɑ Ɩsɔ kɔkɔlɔ nyǝm, nɑ piti tǝmɑ pɑɣɑlɛ kɛ yǝlɑɑ hɛkʋ tɑɑ. Ɩsɔ sɛɛlɑɑ tǝnɑ kotɑɣɑ Sɑlʋmɔŋ sɑkɑɣɑ sɔsɑɣɑ tɛɛ.

¹³Sɑmɑɑ pʋɣʋlɑɣɑ-wɛɣɛ pǝ tɩɩ fɛɩ, pɑɑ nɑ mpʋ yʋlʋ kpɑɩ tʋ kɛ yem nyɑŋɑɣɑnɑ pɑ tɑɑ sʋʋʋ.

¹⁴Amɑ ɑpɑlɑɑ nɑ ɑlɑɑ sɑmɑɑ mpɑ pɑ mʋkɑɣɑ Tɑcɑɑ tɔm nɑ pɑ́ sɔɔsǝɣɩ ɩsɔ sɛɛlɑɑ kpekǝle tɔɔ tɔ, pɑ nyɔɔŋ tɔŋnɑ hukuɣu kɛ sɔsɔm.

¹⁵Ɩlɛnɑ yǝlɑɑ nɑ́ɑ́ sʋʋ kʋtɔntʋnɑɑ kɛ lɩɩnɑʋ, nɑ pɑ́ hɩɩsɩ-wɛɣɛ kɑtonɑɑ nɑ nyɑɑlǝŋ tɔɔ kɛ́ hɑpɛɛ nɔɔsɩ, sɩ ye Piyɛɛ tɛɛkǝnɑ tǝnɑ, ɩ ɩlɛɛmʋɣʋ mɑɣɑmɑɣɑ tɩɩ tokinɑ kʋtʋkinɑʋ kɛ pɑ tɑɑ lɛlɑɑ.

¹⁶Yǝlɑɑ sɑmɑɑ lɩɩkɑɣɑnɑ Yosɑlɛm cɔlɔ ɑcɑlɛɛ tɑɑ nɑ pɑ́ kɔŋnɑ kʋtɔntʋnɑɑ nɑ mpɑ ɑlɔɣɑɑ cɔɔsɑɣɑ tɔ, nɑ pɑ tǝnɑ pɑ hikiɣi ɑlɑɑfǝyɑ.

¹⁷Tǝnɑɣɑ ɩsǝsɛɛmlɛ kpɑ kɔtʋlʋ sɔsɔ kɛ sɔsɔm kɛ tillɑɑ tɔɔ, nɑ ɩ kiŋ cɑɣɑlɑɑ tǝnɑ mpɑ pɑ kɛ́ Sɑtusee kpekǝle nyǝ́mɑ tɔ. Hɑlǝnɑ pɑ́ hʋʋ sɩ pɑɑ kʋlɩ pɑ tɔɔ.

¹⁸Ḿpʋ́ɣʋ́ pɑ kpɑ tillɑɑ nɑ pɑ́ tǝkɩ-wɛɣɛ timpi pɑ tǝkǝɣɩ sɑmɑɑ tǝnɑ tɔ.

¹⁹Amɑ Tɑcɑɑ ɩsɔtɑɑ tillu nɔɣɔlʋ kɔmɑ ɑhoo tɑɑ nɑ ɩ́ tʋlɩ sɑlǝkɑ nɔnɔɔsɩ, nɑ ɩ́ lǝsɩ tillɑɑ. Ɩlɛnɑ ɩ́ heeli-wɛ sɩ:

²⁰Ɩ́ polo Ɩsɔ tǝsɛɛlɛ tɑɑ tǝkɑɑ nɑ ɩ́ kɛɛsɩ sɑmɑɑ kɛ lɑɣɑsʋɣʋ mpɑɑʋ kʋnɛ kʋ tɔm.

²¹Ḿpʋ́ɣʋ́ tillɑɑ lɑpɑ nti ɩsɔtɑɑ tillu heelɑ-wɛ tɔ. Pɑ kʋlɑ tɑnɑŋ ɑhulɑ tɛɛ nɑ pɑ́ polo Ɩsɔ tǝsɛɛlɛ tɑɑ nɑ pɑ́ niki wɑɑsʋ lɑpʋ. Tǝnɑɣɑ kɔtʋlʋ sɔsɔ nɑ ɩ kiŋ cɑɣɑlɑɑ tǝnɑ pɑ kotɑ Yutɑ Kotuɣu sɔsɔɔʋ nyǝ́mɑ. Ɩlɛnɑ pɑ́ tili sɩ pɑ́ lǝsɩ tillɑɑ kɛ sɑlǝkɑ tɑɑ nɑ pɑ́ kɔnɑ.

²²Wɑɑtʋ wei filisinɑɑ nɑ́ tɑlɑ sɑlǝkɑ tɑɑ tɔ, pɑ tɑ mɑɣɑnɑ-wɛ. Ɩlɛnɑ pɛlɛ pɑ mǝlɩ kpɑkpɑɑ nɑ pɑ́ heeli hʋʋlɛ sɔsɑɑ mpɛ sɩ:

²³Tǝ tɑlɑɑ nɑ tǝ́ mɑɣɑnɑ sɑlǝkɑ nɔnɔɔsɩ kɑlǝsɑ mpʋ tǝkeŋkeŋ, nɑ tɑŋlɑɑ nɑ́ɑ́ sǝŋɑ pɑ tǝsǝŋlɛnɑɑ kɛ nɔnɔɔsɩ tǝnɑ. Amɑ tǝ tʋlɑ nɔnɔɔsɩ, ɩlɛ nɔɣɔlʋ fɛɩ pǝ tɑɑ.

²⁴Ɩsɔ tǝsɛɛlɛ tɑŋlɑɑ nyʋɣʋ tʋ nɑ kɔtǝlɑɑ sɔsɑɑ pɑ nɩɩ mpʋ, ɩlɛnɑ tillɑɑ mʋkʋɣʋ mpɩ pǝ tʋ-wɛɣɛ piti kɛ teu. Hɑlǝnɑ pɑ tɑ nyɩ mpi tɔm tǝnɛ tii tɛnɑ tɔ.

²⁵Tǝnɑɣɑ nɔɣɔlʋ nɑ́ lɩɩ yem nɑ ɩ́ heeli-wɛ sɩ: Ɩ́ nɑwɑɑ, mpɑ ɩnɩ ɩ́ kɑ tʋ sɑlǝkɑ tɔ, pɑ wɛnnɑ ntɛɣɛ Ɩsɔ tǝsɛɛlɛ sɔsɔɔlɛ tɑɑ nɑ pɑ́ lɑkɩ yǝlɑɑ kɛ wɑɑsʋ.

²⁶Ḿpʋ́ɣʋ́ tɑŋlɑɑ nyʋɣʋ tʋ ɩnɩ nɑ ɩ yǝlɑɑ pɑ polɑɑ nɑ pɑ́ kɔnɑ tillɑɑ tǝhɛɛ. Pǝ tɑɣɑ pʋlʋ tɔɔ, pɑɑ wɛnɑ yǝlɑɑ sɔɣɔntʋ sɩ pɑ́ tɑɑ kɔɔ pɑ́ yoo mpɛɣɛ pɛɛ.

²⁷Tɑŋlɑɑ nyʋɣʋ tʋ tɑnɑ tillɑɑ, ɩlɛnɑ pɑ́ sǝŋsɩ-wɛɣɛ tǝhʋʋlɛ tɑɑ, nɑ kɔtʋlʋ sɔsɔ sʋʋ-wɛɣɛ tɔm pɔɔsʋɣʋ.