Tillɑɑ Tǝmlɛ 4:6-27

⁶Pǝ kpɑɣɑʋ ɩsɩɩ kɔtʋlʋ sɔsɔ Anɑ, nɑ Kɑyifi, nɑ Yohɑɑnɩ, nɑ Alɛkǝsɑntǝlɩ-wɛɣɛ mpʋ nɑ kɔtʋlʋ sɔsɔ lʋlʋɣʋ nyǝ́mɑ tǝnɑ.

⁷Ɩlɛnɑ pɑ́ lǝsɩ tillɑɑ sɔsɑɑ nɑ pɑ́ kɔnɑ-wɛɣɛ pɑ hɛkʋ tɑɑ, nɑ pɑ́ pɔɔsɩ-wɛ sɩ: Mpi ɩnɩ ɩ́ lɑpɑ ɩsǝntɔ tɔ, ɑwe heelɑ-mɛ sɩ ɩ́ lɑ mpʋ? Nɑ ɑwe toŋ tɑɑ kɛ́ ɩ tɩɩ lɑpǝnɑ mpʋ?

⁸Tǝnɑɣɑ Feesuɣu Nɑŋŋtʋ toŋ kʋlǝnɑ Piyɛɛ nɑ ɩ́ tɔ-wɛ sɩ: Tɔʋ, tɛtʋ sɔsɑɑ nɑ nyʋɣʋ nyǝ́mɑ mɛ,

⁹sɑŋɑ pɑ pɔɔsǝɣɩ-tʋɣʋ kʋpɑntʋ nti tǝ lɑpɑ kɑɑkɑlɑɣɑ tɔ tǝ tɔm, nɑ ɩsǝnɑ tǝ lɑpɑ nɑ kɑ́ kʋlɩ tɔ.

¹⁰Ɩlɛ pǝ wɛɛ sɩ ɩ́ nyɩ tɔm ntǝɣɩ mǝ tǝnɑ. Ɩsɛɣɛlɩ yǝlɑɑ tǝnɑ ɩ́ nyɩ-tɩ tɔtɔ sɩ, Nɑsɑlɛtɩ Yesu Kilisiti wei ɩ́ kɑmɑ sǝm tesikɑ tɔɔ nɑ Ɩsɔ feesi-ɩ tɔ, ɩ toŋ tɑɑ kɛ́ yʋlʋ ɩnɛ ɩ hikɑ ɩ tɩ nɑ ɩ́ nɑɑ-ɩ mǝ hɛkʋ tɑɑ kɛ́ ɩsǝntɔ.

¹¹Nɑ Yesu ɩnɩ ɩ tɔm kɛ pɑ ŋmɑɑwɑ Ɩsɔ Tɔm tɑɑ sɩ: Nmɑlɑɑ mɛ, ɩ́ kɑ lɔwɑ pǝlɛ nte tɔ, ńtɛ́ tǝ pǝsǝnɑ ntɛɣɛ kite tɛɛ pǝlɛ sɔsɔɔlɛ.

¹²Ɩ tike tǝkoŋ ɩ yɑkǝnɑ yǝlɑɑ nyɔɔŋ. Pǝ tɑɣɑ pʋlʋ, hǝtɛ tǝnɛ tǝ pɑɑsi, lɛntɛ fɛɩ ɑntulinyɑ tǝnɑ tɑɑ nte Ɩsɔ hʋlɑ yǝlɑɑ sɩ tǝ́ yɑɑ-tɛ nɑ pǝ́ yɑ tɑ́ nyɔɔŋ tɔ.

¹³Ḿpʋ́ɣʋ́ kotuɣu sɔsɑɑ mpɛ pɑ nɑwɑ ɩsǝnɑ Piyɛɛ nɑ Yohɑɑnɩ pɑ yɔɣɔtǝnɑ ɑpɑlʋtʋ tɔ, ɩlɛnɑ piti kpɑ-wɛɣɛ sɔsɔm. Pǝ tɑɣɑ pʋlʋ, pɑ mɑɣɑmɑɣɑ pɑ nyǝmɑ́ sɩ Piyɛɛ nɑ Yohɑɑnɩ pɑ kɛ́ yǝlɑɑ kɛ yem kɛ́, pɑ tɑ lɑ ceu nɔɣɔlʋ. Ɩlɛnɑ pɑ́ tɔɔsɩ sɩ pɑɑ kɛ́ Yesu tǝŋlɑɑ.

¹⁴Pǝ́cɔ́ yʋlʋ wei ɩ kɑ hikɑ ɩ tɩ tɔ, ɩ sǝŋɑ pɑ ɩsɛntɑɑ tǝnɑ. Ɩlɛ pɑ tɑ nyɩ nti pɑɑ yɔɣɔtɩ tɔ.

¹⁵Ɩlɛnɑ kotuɣu sɔsɑɑ tɔ Piyɛɛ nɑ Yohɑɑnɩ sɩ pɑ́ lɩɩ tǝhʋʋlɛ tɑɑ. Pǝ kɑɑsɑ mpɛ ɩlɛnɑ pɑ niki tǝ sɑɑwɑlɑ.

¹⁶Sɩ: Ɩsǝnɑɣɑ tii lɑnɑ yǝlɑɑ pɑnɛ ɩnɩ? Pǝ tɑɣɑ pʋlʋ, Yosɑlɛm yǝlɑɑ tǝnɑ tɛmɑ nyǝm sɩ mpɛ pɑ lɑpǝnɑ piti tǝmlɛ sɔsɔɔlɛ tǝnɛ, pǝ́cɔ́ pǝ fɛɩ tɩɩ kpɛɛsɩ.

¹⁷Ɩlɛ tii kisinɑ-wɛɣɛ tǝpʋlʋpʋlʋ sɩ ye pɑ tɑsɑ nɔɣɔlʋɣʋ Yesu hǝtɛ tǝnɛ tǝ tɔm heeluɣu pɑɑ nɑ. Pǝ tɑɑ kɔɔ nɑ tǝ tɔm sɔɔsɩ yɑʋ kɛ yǝlɑɑ tɑɑ.

¹⁸Ḿpʋ́ɣʋ́ kotuɣu sɔsɑɑ yɑɑ Piyɛɛ-wɛ, nɑ pɑ́ kisinɑ-wɛ tǝpʋlʋpʋlʋ sɩ pɑ́ tɑɑ tɑsɑ Yesu hǝtɛ ńtɛ́ tǝ tɔm yɔɣɔtʋɣʋ yɑɑ sɛɣɛsʋɣʋ kɛ pɑɑ fǝŋ mɑɣɑmɑɣɑ.

¹⁹Ḿpʋ́ɣʋ́ Piyɛɛ nɑ Yohɑɑnɩ pɑ cɔ kotuɣu sɔsɑɑ mpɛ sɩ: Mǝ mɑɣɑmɑɣɑ ɩ́ mɑɣɑsɩ-tǝɣɩ mǝ tɑɑ nɑ ɩ́ nɑ. Pepe kǝlɑ teu kɛ Ɩsɔ ɩsɛntɑɑ? Mɛɣɛ tǝ se yɑɑ Ɩsɔ?

²⁰Amɑ nti nti tɑ́ nɩɩwɑ nɑ tǝ nɑnɑ tɑ ɩsɛ tɔ, tɑ kɑɑ pǝsɩ nɑ tǝ́ su tǝ yɔɣɔtʋɣʋ.

²¹Ḿpʋ́ɣʋ́ Kotuɣu sɔsɑɑ mpɛ pɑ tɑ nyɩ ɩsǝnɑ mpi pɑɑ lɑ Piyɛɛ-wɛ tɔ. Ɩlɛnɑ pɑ́ tɑsɑ-wɛɣɛ kpɑɑlʋɣʋ kɛ teu nɑ pɑ́ yele-wɛ. Pɑ tɑ hiki mpi pǝ tɔɔ pɑɑ hɔ pɑ ŋkpɑŋʋɣʋ tɔ. Mpi pǝ tɔɔ tɔ, yǝlɑɑ tǝnɑ sɑŋɑɣɑ Ɩsɔ kɛ́ pǝ tǝnɑ mpi pǝ lɑpɑ mpʋ tɔ pǝ tɔɔ kɛ́.

²²Apɑlʋ wei ɩnɩ piti tǝmlɛ lɑpɑ nɑ ɩ́ hiki ɑlɑɑfǝyɑ kɛ mpʋ tɔ, ɩ lʋlʋɣʋ pɩɩsɩ kɑ kǝlɑ nɩɩlɛ.

²³Kotuɣu sɔsɑɑ yelɑ Piyɛɛ nɑ Yohɑɑnɩ ɩlɛnɑ pɑ́ tɛɛ kpɑkpɑɑ kɛ pɑ tɑɑpɑlɑɑ kiŋ, nɑ pɑ́ kɛɛsɩ-wɛɣɛ tǝ tǝnɑ nti kɔtǝlɑɑ sɔsɑɑ nɑ nyʋɣʋ nyǝ́mɑ pɑ yɔɣɔtɑɑ tɔ.

²⁴Pɛlɛ pɑ nɩɩ-tǝɣɩ mpʋ, ɩlɛnɑ pɑ tǝnɑ pɑ́ sǝlǝmɩ Ɩsɔ sɩ: Hɑɩ, Tɑcɑɑ, nyɑ́ lɑpǝnɑ ɩsɔtɑɑ nɑ ɑtɛ nɑ teŋku nɑ pǝ tǝnɑ mpi pǝ wɛ pǝ tɑɑ tɔ.

²⁵Nyɑ́ yelinɑ nɑ Feesuɣu Nɑŋŋtʋ tʋ nyɑ́ tǝmlɛ tʋ tɑ lɔŋcɛ Tɑfiiti nɔɣɔ tɑɑ kɛ́ tɔm nɑ ɩ́ yɔɣɔtɩ sɩ: Pepe tɔɔ kɛ́ piitimnɑɑ cʋkɑ pǝ tɑɑ nɑ kɑlɑmpɑɑnɩ kɛ́ mpʋ? Pepe tɔɔ kɛ́ yǝlɑɑ nɑ́ pɑɑsǝnɑ nɔɔhɛɛ tɛɛ kuuu kɛ yem kɛ́ mpʋ?

²⁶Atɛ ɑwulɑɑ sɔsɑɑ kɛlɑ tɔɔŋ. Tɛtʋ tɔkǝlɑɑ nɑ́ pɛɛlɑ nɔɣɔ nɑ pɑ́ kʋlɩ Tɑcɑɑ nɑ ɩ Mesii pɑ tɔɔ.

²⁷Tɑmpɑnɑ tɔɔ, Helɔtɩ, nɑ Pɔŋsɩ Pilɑtɩ, nɑ mʋʋlɑɑ, nɑ Ɩsɛɣɛlɩ piitim nyǝ́mɑ pɑ pɛɛlɑ nɔɣɔ kɛ nyɑ́ tǝmlɛ tʋ nɑŋŋ tʋ, wei n lǝsɑɑ sɩ ɩ́ lɑ Mesii tɔ, ɩ tɔɔ kɛ́ ɩcɑtɛ tǝnɛ tǝ tɑɑ.