Tillɑɑ Tǝmlɛ 1:3-21

³Yesu sǝm wɑɑlɩ ɩ lɩɩkɑɣɑ ɩ tillɑɑ tɔɔ, nɑ ɩ́ hʋ́lǝ́ɣǝ́nɑ-wɛɣɛ yɑɑsinɑɑ pɑɣɑlɛ tɑɑ sɩ ɩ femɑ. Hɑlɩ kʋyɛɛŋ nɩɩlɛ tɑɑ tǝcu kɛ́ Yesu lɩɩkɑɣɑ ɩ tillɑɑ tɔɔ nɑ ɩ́ lɑkɩ-wɛɣɛ Ɩsɔ Kɑwulɑɣɑ wɑɑsʋ.

⁴Ḿpʋ́ɣʋ́ kʋyɑkʋ nɑkʋlɩ Yesu nɑ ɩ tillɑɑ pɑ cɑɣɑɑ nɑ pɑ́ tɔŋnɑ tɔɣɔʋ. Tǝnɑɣɑ ɩ heelɑ-wɛ sɩ: Ɩ́ tɑɑ hɑtǝlǝnɑ Yosɑlɛm. Amɑ ɩ́ keŋnɑ mpi Tɑcɑɑ kɑ tɔmɑ sɩ ɩ kɑ́ hɑ tɔ, kʋcɔɔʋ ŋku kʋ tɔm mɑɑ heelɑ-mɛ tɔ.

⁵Mpi pǝ tɔɔ tɔ, lʋm mɑɣɑmɑɣɑ kɛ Yohɑɑnɩ nɑɑ sɔnɑ yǝlɑɑ kɛ Ɩsɔ lʋm. Amɑ ye mɛ ɩlɛ, pɩɩ lɑ wɛɛ nɑɑlɛ tɔ Feesuɣu Nɑŋŋtʋ mɑɣɑmɑɣɑ kɛ pɑɑ kɛlɩ nɑ pɑ́ sɔ-mɛ.

⁶Ḿpʋ́ɣʋ́ Yesu nɑ mpɑ pɑɑ kotɑ mpʋ tɔ pɑ pɔɔsɑ-ɩ sɩ: Tɑcɑɑ, ye mpʋ pǝnɛɣɛlɛ n kɑ́ tɑɣɑnɩ Ɩsɛɣɛlɩ kɑwulɑɣɑ ŋkɛɣɛ kʋsʋɣʋ nɑ?

⁷Tǝnɑɣɑ Yesu cɔ ɩ nɑ mpɑ pɑɑ kotɑ mpʋ tɔ sɩ: Pǝ tɑɣɑ sɩ mɩɩ nyǝnɑ kʋyɛɛŋ yɑɑ wɑɑtʋnɑɑ mpɑ Tɑcɑɑ mɑɣɑmɑɣɑ sɩɩnɑ ɩ toŋ tɔ se.

⁸Amɑ kʋyɑŋku Ɩsɔ Feesuɣu Nɑŋŋtʋ kɑ tii mǝ tɔɔ tɔ, ɩ́ kɑ́ hiki tomɑ nɑ ɩ́ hʋ́lɩ́ pǝ tǝnɑ mpi ɩ́ nɑnɑ mǝ ɩsǝpee tɔ pǝ tɑmpɑnɑ kɛ Yosɑlɛm, nɑ Yutɑ, nɑ Sɑmɑlii pǝ tɛtʋnɑɑ tǝnɑ tɑɑ. Hɑlǝnɑ pǝ́ polo pǝ tɑlɑ ɑntulinyɑ tǝnɑsɩ tǝnɑ tǝpɑɩ.

⁹Yesu tɛmɑ ḿpʋ́ɣʋ́ yɔɣɔtʋɣʋ, ɩlɛnɑ pǝ́ kpɑɑsɩ-ɩ ɩsɔ nɑ pɑ́ nyǝnǝɣɩ-ɩ mpʋ. Hɑlǝnɑ pʋlʋpʋ ɩsɩɩ ŋmʋntʋɣʋ kɔɔ pǝ tɑkɩ ɩ tɔɔ, pɑ tɑ tɑsɑ-ɩ nɑʋ.

¹⁰Yesu kpɑ ɩsɔ nɑ ɩ tillɑɑ wɛɛ nɑ pɑ́ tɔŋnɑ nyǝnʋɣʋ tǝpiŋŋ kɛ mpʋ, ɩlɛ pɑ tutɑ ɑpɑlɑɑ nɑɑlɛɣɛ pɑ cɔlɔɣɔlɛ nɑ pɑ́ suu wontu kʋhʋlʋmtʋ.

¹¹Nɑ ɑpɑlɑɑ mpɛ pɑ́ pɔɔsɩ tillɑɑ sɩ: Kɑlilee nyǝ́mɑ mɛ, pepe tɔɔ kɛ́ ɩ́ sǝŋɑɑ nɑ ɩ́ nyǝnǝɣɩ ɩsɔ kɛ́ mpʋ? Yesu wei pǝ lǝsɑ mǝ hɛkʋ nɑ pǝ́ kpɑɑsɩ-ɩ ɩsɔ kɛ́ ɩsǝntɔ tɔ, ɩ kɑ́ tɛ nɑ ɩ́ mǝlɩ ḿpʋ́ɣʋ́ teitei ɩsɩɩ ɩ́ nɑ-ɩ nɑ ɩ́ kpɑɑkɩ ɩsǝntɔ tɔ.

¹²Ḿpʋ́ɣʋ́ tillɑɑ kʋlɑ tɩɩŋ wei pɑ yɑɑ sɩ Olifinɑɑ tɔ ɩ pʋɣʋ ŋku kʋ kiŋ pɑɑ wɛɛ tɔ nɑ pɑ́ mǝlɩ Yosɑlɛm. Pʋɣʋ ŋkʋ nɑ Yosɑlɛm pǝ fɛɩ pooluŋ. Pǝ tɑ kǝlɩ kilomɛɛtǝlɩ kʋlʋm.

¹³Pɑ tɑlɑɑ, ɩlɛnɑ pɑ́ kpɑ pɑ ɩsɔtɑɑ kutuluɣu ŋku kʋ tɑɑ pɑɑ sʋʋkɑɣɑ tɔ. Mpɑ pɑ sʋʋkɑɣɑ tǝnɑ tɔɣɔlɛ Piyɛɛ, nɑ Yohɑɑnɩ, nɑ Sɑɑkɩ, nɑ Antǝlɩɩ, nɑ Filipʋ, nɑ Tomɑɑ, nɑ Pɑɑtelemii, nɑ Mɑtiyee, nɑ Alǝfe pǝyɑlʋ Sɑɑkɩ, nɑ Simɔŋ wei ɩ kɛ́ mpɑ pɑ lʋkɑɣɑ sɩ pɑ mʋɣɩ pɑ tɛtʋ tɔ pɑ tɑɑ lɛlʋ tɔ, nɑ Sɑɑkɩ pǝyɑlʋ Yuti.

¹⁴Pɑ tǝnɑ pɑ kotɑɣɑ tǝntǝmlɛ kɛ tɑm nɑ pɑ́ sǝlǝmǝɣɩ Ɩsɔ. Pɑ tɑɑ kɑ wɛ ɑlɑɑ nɑpǝlɩ, nɑ Yesu too, nɑ Yesu newɑɑ.

¹⁵Kʋyɛɛŋ ɩnɩ ɩ tɑɑ, kʋyɑkʋ nɑkʋlɩ yǝlɑɑ kotɑɑ, hɑlɩ pɑ tɑlɑ ɩsɩɩ yʋlʋnyɔɔŋ nɩɩnʋwɑ nɑ hiu (120). Ɩlɛnɑ Piyɛɛ kʋlɩ nɑ ɩ́ sǝŋ ɩ tɑɑpɑlɑɑ mpɛ pɑ hɛkʋ nɑ ɩ́ tɔ sɩ:

¹⁶Mɑ tɑɑpɑlɑɑ mɛ, tɔm nti Ɩsɔ Feesuɣu Nɑŋŋtʋ kɑ tʋ Tɑfiiti nɔɣɔ tɑɑ nɑ ɩ́ yɔtɔtɩ, nɑ tǝ́ wɛ Ɩsɔ Tɔm tɑkǝlɑɣɑ tɑɑ kɛ́ Yutɑɑsɩ wei ɩ tɛɛ Yesu kpɑlɑɑ kɛ nɔɣɔ tɔ ɩ tɔm tɔ, pǝ wɛɛ kɛ́ sɩ tɩɩ lɑ.

¹⁷Yutɑɑsɩ ɩnɩ ɩ kɑ kɛ́ tɑ tɑɑ lɛlʋ, nɑ tɑ́ nɑ-ɩ tɩɩ kpɛntɑ tǝmlɛ tǝnɛ tǝ tɑɑ.

¹⁸Apɑlʋ ɩnɩ, wɑɑtʋ wei ɩ tɛmɑ tɛtʋ yɑpʋ nɑ ɩ tulum liɣitee ɑnɩ tɔ, ɩ polɑɑ nɑ ɩ́ hoti tǝ tɑɑ kɛ́ ɩ nɔɣɔ tɔɔ, nɑ ɩ lotu tʋlɩ, nɑ ɩ tɑɑ lotu yɑ nɑ tǝ́ ŋmɑɑ.

¹⁹Tɔm tǝnɛ tǝ yɛkɑ Yosɑlɛm nyǝ́mɑ tǝnɑ kiŋ, hɑlǝnɑ pɑ́ hɑ tɛtʋ ntǝɣɩ hǝtɛ nɑ pɑ tɛ tɑɑ sɩ: Akeletɑmɑ. Cɑlǝm tɛtʋ kɛ pɑ yɑɑ mpʋ nɑ pɑ tɛ tɑɑ.

²⁰Pɑ ŋmɑɑ Yontu tɑkǝlɑɣɑ tɑɑ sɩ: Ɩ tǝyɑɣɑ ɩ́ tǝkɩ kɑɑʋ. Nɔɣɔlʋ ɩ́ tɑɑ kʋsɩ-kɛ. Nɑ lɛntɩ tɔtɔ sɩ: Nɔɣɔlʋ ɩ́ lɛɛtɩ ɩ lonte.

²¹Ye mpʋ pǝ wɛɛ sɩ mpɑ pɑ tǝŋɑɣɑ-tʋɣʋ wɑɑtʋ wei tɑ́ nɑ Tɑcɑɑ Yesu tǝ cɔɔkɑɣɑ tɛtʋnɑɑ tɔ, pɑ tɑɑ nɔɣɔlʋ ɩ́ sɔɔsɩ tɑ́ tɔɔ, nɑ tɑ́ nɑ-ɩ tǝ́ hʋ́lɩ́ Tɑcɑɑ Yesu sǝpʋ nɑ ɩ́ fe tɔ pǝ tɑmpɑnɑ. Pʋntʋ ɩnɩ ɩ kɑ́ wɛɛ wei kʋyɛɛŋ tǝnɑ ɩ kɑ wɛ tɑ́ wɑɑlɩ kɛ́ pǝ kpɑɣɑʋ Yohɑɑnɩ sɔʋ Yesu kɛ Ɩsɔ lʋm tɔ, hɑlǝnɑ kʋyɑŋku pǝ lǝsɑ-ɩ tɑ́ hɛkʋ nɑ pǝ́ kpɑɑsɩ-ɩ ɩsɔ tɔ.