Thuchihbu 8:1-31

¹Chihnan kho ahin sap teng jatei ding gon! Chule thil hetkhennan lhang asap teng amanu aw chungaiphan.

²Lampi pam le thinglhang vumgeiyin, amanu chu ading le’in ahi.

³Khopi lutna kot phung dung leh, kholen tinchang maija, chule kotlutna thei jousea; amanun lhangasam in ahi.

⁴“Nangma le mijouse kakouvin, mijouse kounaa aw sanga kapen ahi.

⁵Vo milham ho, lunggel them hinadin kihil un, chule mingol hon jonghetthemna kimu dohsah un.

⁶Ka thusei ngaiyun! Ajeh chu keiman thil phachom tah naseipeh uvinge, kasei jouse hi thudihjengbou ahi,

⁷keiman thudih bou kaseiji ahin, adihlou sei kiti hi kajahda ahi.

⁸Ka thumop jouse adih jeng ahin, akikal le ache khel ding ima um louahi.

⁹Kathu hil hekhen theipa chunadih akisan ding, hetthemna neipadinga chu adih bou ahi.

¹⁰Sumlepai sang in kathu hilkilhen un, Sana thengsel sanga jonghetna naki lhen joh diu ahi.

¹¹Ajeh chu sana kijem pah sangachihna hi thupi ahin, na lungdeichan toh kitekah thei ahipoi.

¹²Chihna hi keima kahin chingtheitah’a um kahi, hetna le thil hetkhenthemna nei kahi.

¹³Pakai ginna chun thilse ahotbolin, hijeh chun keiman kiletsahna lehoithona, thil aphalou, ahilou louvathu kisei chan chu kathet ahi.

¹⁴Keima’a kon hin, chihna giltahle phachom tah’a kihilna aum in, asung thua hetna le thahat chu keijabou um ahi.

¹⁵Keijal’a lenghon vai-apoh ahin, keijal’a bou vaihom ten adih’a thutanna anei ahi.

¹⁶Keijal’a alen alal ten vai ahopjiu, chule keijal’a bou alal ten vaiapoh theiyu ahi.

¹⁷Keima eingailu ho kangailun, giltah’a eihol ten eimu tei jiuvinahi.

¹⁸Keima haona le jabolna jouseneijui in, phattheina le haona chun eidalha jipoi.

¹⁹Ka thilpeh hohi sana sangaphachom ahin, sana thengsel sangajong hoijoa, chule kanatoh jongsum le pai sanga phajo ahi.

²⁰Keima thudih tah’a lamlha jingkahin, thutanna adih lam jeng chukaho-ji ahi.

²¹Keima eingailu hon gou alo diukasem peh in, agou kholnau jousekasuh dimpeh-jin ahi.

²²Pakaiyin atil abulla athilsemapat ei-umsah ahin, khanglui apatathilsem masapen kahitai.

²³Atil-a leiset kisem masang, kumasang sang masanga pat keimatundohsa chu kahi tai.

²⁴Kapen na chun twikhanglenjong ana um pon, twi putna jousejong khatcha ana um poi.

²⁵Mol le lhang kigol toh masang, chule thinglhang jouse kisemtohmasanga pat ana um kahitai.

²⁶Pathen in leiset le tollhang asemmasang, vannoija leigum kisemdohmasanga pat um kahi.

²⁷Pathen in vanho atundohmasanga um kahin, twikhanglenkuol khum vanthamjol alhundohmasanga jong um kahitai.

²⁸Pathen in chunglam’a vanthamjolho atundoh ahin, leinoija pat twiaput dohsah masanga jong um kahin,

²⁹Twikhanglen gei ho jong aletlhahlou dinga asem toh, twipi jeng injong athu angaina dinga asem toh, leiset khompi jouse jong aki tundohmasanga pat um kahi.

³⁰Keima tah jong akom-cha’a khut them bang um kahin, nitin le phat tin in akom-a kapansan kipatah in kaum jing in ahi.

³¹Pathen in mihemte chenna dia leiset atundoh ahin, keima jong kipah tah-in kaum in, mihemte lah’a thanopnan kadim e. Chihna Hi Hinkho Pepa Ahi