Thothueng 11:13-39

¹³Vaa khuiah he rhoek tah tuei uh, caak ham moenih. atha khaw, langta khaw, thamuk khaw konawhnah ni.

¹⁴murhung neh maisi hui khaw,

¹⁵vangak neh anih hui boeih,

¹⁶Tuirhuk khaw, kirhoeng, khangkhoe, mutlo neh anih hui boeih,

¹⁷thathawt, tuiliim, saelbu,

¹⁸abuu, khosoek saelbu, tamcu,

¹⁹bungrho, kaikoi neh anih hui, thongpanai neh pumphak.

²⁰Vaa bangla om tih a kho pali neh aka yuel rhulcai boeih khaw nangmih ham konawhnah ni.

²¹Tedae vaa bangla om tih a kho pali neh yuel cakhaw diklai dongah cungpet nah ham a kho phoeiah a kho aka khueh rhulcai boeih tah ca uh.

²²Kaisih neh a hui, tangboeng neh a hui khaw, tungrhit neh a hui khaw, tangku neh anih hui khaw ca uh.

²³Tedae vaa bangla om tih a kho pali aka khueh rhulcai boeih tah nangmih ham konawhnah ni.

²⁴A rhok aka ben boeih tah, te nen te na poeih uh ni. Amih te kholaeh duela a poeih ni.

²⁵A rhok aka phuei boeih long khaw a himbai te til saeh. Anih te kholaeh duela poeih uh ni.

²⁶Rhamsa boeih khaw a khomae rhak tih a khorhaek aka thal pawt neh caknaih aka naih pawt tah nangmih ham rhalawt. Te te aka ben boeih tah poeih uh ni.

²⁷A kho pali neh aka yuel mulhing boeih khuiah a kut neh aka yuel boeih khaw nangmih ham rhalawt. A rhok aka ben boeih tah kholaeh duela a poeih ni.

²⁸A rhok aka phuei long tah a himbai te til saeh. Hlaem duela te poeih uh vaengah tah amih te nangmih ham rhalawt.

²⁹Diklai kah aka luem rhulcai khuiah saham, su, imrhai neh anih hui boeih,

³⁰tawkke, tangkong, cangdawl, lainaat, hambo he khaw nangmih ham rhalawt.

³¹Rhulcai boeih khuiah nangmih ham aka rhalawt rhoek te a duek vaengah aka ben boeih khaw kholaeh duela poeih uh ni.

³²A duek vaengah anih soah aka cungku boeih tah poeih uh ni. Te dongah thing hnopai boeih neh himbai khaw, maehpho mai khaw, tolkhui mai khaw, te rhoek neh bitat la a saii hnopai boeih te tah tui dongah duung saeh. Hlaem due aka poeih uh saeh lamtah caihcil saeh.

³³Tedae amih khuikah te lai umam khat khat khuila a tlak atah a khui neh a khui kah boeih khaw a poeih dongah rhek dae uh laeh.

³⁴Caak ham cakok khat khat te tekah am tui loh a pha thil atah a poeih coeng. Te dongah umam khat khat khui lamkah ok ham koi tui khaw boeih a poeih coeng.

³⁵Amih rhok loh a cuhu thil boeih tah tapkhuel khaw, lungthu khaw a poeih coeng. Te rhoek rhalawt rhoek te tah palet saeh. Nangmih ham khaw rhalawt la om.

³⁶Tedae tuisih neh tangrhom tui tungnah a tlak thil atah tuicil la om mai cakhaw a rhok aka ben te a poeih.

³⁷Tedae te cangti ballung boeih tah a rhok loh tlak thil cakhaw cuem ngawn dongah tue ngawn saeh.

³⁸Tedae cangti te tui dongah a khueh vaengah a rhok loh a cuhu thil atah nangmih ham rhalawt.

³⁹Na caak ham koi rhamsa a duek vaengah khaw a rhok aka ben tah hlaem duela poeih uh ni.