Te Israel Tobolu Bidi Dabe 5:3-18

³“Odao, dage gavman tuni bidi dabeo! Olo bugagia munama, dage tobolu bidi dabe dao! Te eno tęąbi me deli weyu, tama musik gagali te Genuai Bidiba waibao, te Israel dabe dago God dao!”

⁴“Genuai Bidi, nago te Seir bulu du dabe taga solama, te Idomgo bulu taga soyu, tama aiyaba dulai, tialima te tǫ mali eyu, tama te tulubage tulali. Mu tama tiali, te wę dagaludu dulalio.

⁵Te bulu du dabe Godigo gedude te mali yali, te Sainai bulu dugo Genuai Bidi, te Godigo gedude, te da Israel dabego Genuai Bidi dao.”

⁶“Te Samgar, te Anatgo ogwa bidali sogo me, tama te Jael bidali sogo te bisnis sę ebo bidi dabe te genuai sunumidu me bilibeo. Te iba soyu, obaba soyu ebo bidi dabe, augwali te dwasianu sunumidu naga bilaluali.

⁷Debora, te Israel dabego augwa hanu tagalama, tama te hanu olo elaludubadi, te nage pedalubo sogoba usu nagasali. Tama nage te augwali tonalubo ida tiwai yali.

⁸Tama te Israel dabego te gesi god wali pabo sogo, te augwaliba boi hwįbo sę pedelali. Te Israel dabego boi hwįbo ami bidi dabe te bidi sese hauwa mu te 40,000 bidi dabe, tiali goli me deligo te boi hwįabo sabele me sesemone me me sela pabeo.

⁹Te eno homu kolesaga te Israel dabego ofisago ami bidi dabede elaluali, tama te boi hwįainogo ebo bidi dabe dali elalu yali. Te Genuai Bidigo nogi ugwaba sao!”

¹⁰“Dage te tedela yai donki te sadelde duabo genuai bidi dabe, tama dage te sągągo bilibo olo bidi dabe, dagego te nai po page pusao.

¹¹Odiąo! Te wę uluba sisinama, te po hauwa miani we bidi hani augwaligo te Genuai Bidigo nogi ugwanu sali po pusao, augwaligo te Israel bidi dabego ugaba ela holali po pusao wali! Tama te Genuai Bidigo we bidi augwaligo te hanu tagalama, tama augwali aiyaba dulai.

¹²‘Nage poligi pao, Debora, nage poligi pao! Nage poligi pao! Nago tęąbi po me deli wao! Tama nage poligi pao! Barak te Abinoamgo ogwa, nage hogodama pao! Nago te naga aiyaba elaluali kalabus bidi dabe sela pao!’”

¹³“Tama te boi hwįani wiegi yai bidi dabe augwali te augwa genuai bidi bidibo madiba sisinagasali. Te Genuai Bidigo bidi dabe agaba aselama, tama augwali te boi hwįabo sisi elama bidali.

¹⁴Te Efraim dabe aiyaba dulama, tama te tǫ maluba pali. Augwaligo te Benjamin hani bidi dabe wali pali. Te Makir bidi sibi tobolu bidi dabe te buluba dulali. Tama te Sebulungo hanide ofisa dabe te buluba dulali.

¹⁵Te Isakargo genuai tobolu bidi dabe te Debora dali asali. Megi da, te Isakar me, Barak me asobao wai. Augwaligo te augwali wali peyu, te malu tǫba pali. Tiali goli, te Rubengo hani bidi augwaligo homu si elalu, tama augwali asabo homu me ebeo.

¹⁶Magi baso dage te sipsip dabe dali bidibawe? Te sipsip tonalubo bidi dabego te sipsip hani dabe i wabo odainogo ebawe? Mu tama, te Rubengo bidi hani te si pedali, tama augwali asabo homu me ebeo.

¹⁷Te Gatgo hani bidi te wę Jordan te giliga pedalubo pedai badu bidali. Tiali goli, magi baso te Dango hani te moni geba sipde sę yaliwe? Te Asergo hani te tamu ąį sanede bidai. Augwali te olo tama te augwa te wę sanede bidaluai.

¹⁸Tiali goli, te Sebulungo bidi me, te Naptaligo bidi me te pąde augwali te boi hwįbo pesagede dolainu yali.”