Te Israel Tobolu Bidi Dabe 1:1-34

¹Te Josua isai madi tama te Israel dabego te tiwai po te Genuai Bidibolo hanalu wali, “Te mena hani polasa peyu, tama te Kenan dabe dali boi hwįgi pogowe?” wali.

²Tama Genuai Bidigo te po wei ponani, “Te Judago hani polasa paibao, magi baso meni, eno te tǫ augwalibolo mawai dao.”

³Tama Judago hanigo te Simeongo hanibolo wali, “Te hasia dage da dali aselama, tama da te augwaligo dabolo sa muani tǫba pinao,” wali, “tama dago te Kenan dabe dali hwįaibao. Nosali da Juda dabe dage dali te augwaligo dagebolo sa muani tǫba paibao.” Te po wai. Tama te Simeongo hani te Judago hani dali pali.

⁴Tama Judago hani te boi hwįgi painu polasa pali, tama Genuai Bidigo te Kenan hani me te Peres hani si te Judago hani dabe nogoba munama, tama augwaligo te bidi sese umabo bidi mu, te 10,000 bidi te Besekde ela silali.

⁵Tama te Juda dabego te tuni bidi Adoni Besek te aga hani dali gegelama, tama augwaligo augwali dali hwįani, tama augwali aiyaba elauali.

⁶Adoni Besek wi pali, tiali goli te Juda dabego aga pobeasa pelama, tama aga pageabi elama, tama te genuai a nogo si togwali, tama te a sągą si me togobadi yali.

⁷Tama Adoni Besekgo te po wali, “Polobadu eno te tuni bage bidi sese sela te gasa bidigo nogo si te 70 bidi te augwali eno te a nogo me, a sągą me togolama, tama augwaligo te nai kakali te eno tebol sai dologode sela tuyu yai. Megi Godigo te tiwai sę naga te enaba wei ponobao,” wali. Tama augwaligo te tuni bidi Adoni Besek te moni hanu Jerusalemba sela pelama, te Jerusalemde bidibadi tama aga isai dao.

⁸Te Juda dabego te Jerusalemde bidali bidi dabe dali boi hwįnama, tama augwaligo tǫ sali. Tama augwaligo te we bidi ela munama, tama augwaligo bulu dabe dali sia ulali.

⁹Nosali augwali pelama, te Kenan bidi dabe te bulu dude me bulu odogode bidalubo bidi dabe dali hwįgi pali, tama augwaligo te bulu nogi Negev teba pelama, me hwįgi pai.

¹⁰Tama nosali ma augwali pelama, te Hebronde bidibo Kenan bidi dabe dali hwįgi pali. Te bulu Hebron te polobadu augwaligo te hanu nogi Kiriat Arba nogi yai. Tama Juda dabego te Sesai bulu bidi me, te Ahiman bulu me, te Talmai bulu bidi, te augwali aiyaba elaluai dao.

¹¹Te Juda dabego te Hebron bidi dabe augwali aiyaba elaluama, tama augwali pelama, te Debir we bidi dabe dali hwįgi pali. Te bulu Debir polobadu augwaligo te hanu nogi Sefer nogi yali.

¹²Tama Kalepgo te po wali, “Te niwai bidi me deligo te Sefer hanu we bidi dali boi hwįnama, te augwali aiyaba elaluama, tama te hanu sobaso da, teda agai te eno wegi Aksa te somainu yaibao.” Kalepgo te po wali.

¹³Tama Otniel, te Kenasgo ogwa, te Kenas da te Kalepgo dwasianu amanu, agai te hanu sigi pali. Tama tibaso, Kalepgo aga wegi Aksa te Otniel menama, tama agai sali.

¹⁴Tama te Aksa sabalubode, Otnielgo agabolo po bomo elama weyu, te aga ayabolo te tǫ pedai me deli momainogo te po hanalu wao po wali. Tama Aksa te Kalepba pelama, tama aga te kibu donkide dualaluali te tagalama tǫba samonani, tama Kalepgo agabolo hanalu wali, “Nago magi nai sabo homu ebowe?”

¹⁵Tama Aksago po wei ponani, “Eno te nai me deli sabo homu ebao. Nago ena te ili meni yai wa pai tǫba muani, te tǫ nogi Negev, te megi nago ena te wę ulu meba mao,” wali. Tama Kalepgo te ulu wę ugwadu me aiyadu me elalubo tǫ me te agabolo mani.

¹⁶Te Mosesgo wąį monu te Kengo hani dao. Tialima, te ayago hani dali, te Judago hani dali, augwaligo te pam ni sili elalubo bulu taga peyu, tama augwali te Judago bulu te wa pai elalubo te Arat pedai te badu bidigi pali. Tama augwali te Amalek bidi dabe dali te bulude bidali.

¹⁷Tama te Juda me, te Simeon me, te hani si augwali pelama, tama te Sefat hanude bidibo Kenan bidi dabe aiyaba elaluali. Tama augwaligo te hanu tigidali dola silali. Tama augwaligo te hanu nogi gesi poali, te Horma nogi yai.

¹⁸Tiali goli te Juda dabe augwaligo te bulu Gasa me Askelon si te sabeo, tama Ekron te tǫ pedai dabe dali te sisąwai.

¹⁹Genuai Bidigo te Juda dabe tau sobaso tama augwaligo bulu du elalubo tǫ dabe sali. Tiali goli, augwaligo te wę sanide bidalubo bidi dabe sela sąyabo te usu meni yai, magi basowe, te bidi dabe augwaligo te hwįbo nai dabe karis ain elaluali.

²⁰Tama augwaligo te bulu Hebron te Kalep mani, te tiwai te polobadu Mosesgo po wali gilama. Tama Kalepgo te Anakgo ogwa sela te augwali Hebronde bidali te sela sąwani.

²¹Tiali goli, te Benjamin hanigo te Jebus dabe te Jerusalemde bidibo te me sela sąbeo. Tama te Jebus dabe te Benjamin hani dali bidaluama, tama megi e po asęani sogoba usu nagasali.

²²Tama tialima, te Josepgo hani pelama, te Betel hanude bidali we bidi dali boi hwįgi pali. Polobadu augwaligo te hanu nogi te tiwai nogi poali, te Lus wai. Tama Genuai Bidigo augwali tau sabo sę yali. Tialima, augwaligo te bidi meba tagala palama, te hanuba sa pali.

²⁴Tama te sa pali bidi dabego te bidi me deli te hanu tagalama buluba soabo suali. Tialima, augwaligo agabolo te po wali, “Te nago dabolo te hanu tomoba pabo sunumi ola mobaso da, teda dago nage dali dwai sę me iligobeo,” te po wali.

²⁵Tama agai augwalibolo te hanu tomoba pabo sunumi ola mani. Tama augwali te hanu tomoba pelama, tama te hanude bidali we bidi tigidali ela silali. Tiali goli, augwaligo te bidi deli te aga hani dali te augwali me elibeo.

²⁶Tama te bidi aga te Hit dabego tǫba pelama, tama agai te hanu me deli nigali, tama agai te hanu nogi te Lus nogi poali. Tama te nogi me elalubo dao.

²⁷Te Manasego hanigo te bulu Betsan, me Tanak, me Dor, me Ipleam, me Megido, te bulu dabe pąde elaluali dwasianu bulu dabede te bidali bidi dabe te augwali te augwaligo me sela sąbeo. Magi baso meni, te Kenan dabego homu bomonama eyu, tama tede me bidalu dali.

²⁸Tama te Israel dabe augwaligo bomo pedalubo sogo, augwaligo te Kenan we bidi augwali kalabus ilibo sę yali. Tiali goli, te Israel dabego te augwali mu tigidali sela sąyu me ebeo.

²⁹Tama Efraimgo hanigo te Kenan we bidi te Geser hanude bidali te augwali me ela gudulisiąwai. Tama te Kenan we bidi augwali dali tede me bidaluai.

³⁰Tama Sebulungo hanigo te hanu Kitron me Nahalal te hanu side bidali we bidi te augwaligo ela gudulube. Tama te Kenan we bidi te augwali dali hodobo bidaluai. Tama te Sebulun hanigo te Kenan dabe augwali kalabus ebo sę ilali.

³¹Tama Asergo hanigo te Ako me Saidon, me Alap, me Aksip, me Helba, me Afek, me Rehop, te tama hanude bidali we bidi te augwaligo me sela sąsiąwai.

³²Tama te Aser dabe te Kenan dabe dali bidali, magi baso meni, te augwaligo augwali te bidi me sela sąsiąwai.

³³Tama Naptaligo hanigo te hanu Betsemes me Betanat te hanu side bidali we bidi augwali te me sela sąbeo. Tama augwali te Kenan dabe dali bidaluali. Tama Naptaligo hanigo te Kenan dabe augwali kalabus ilibo sę yali.

³⁴Tiali goli, te Amor dabego bomo eyu, tama te Dango hani dabego augwali te odogo tǫde ela gudulubo usu meni yai. Tama tibaso te Dango hani dabe meba bulu duba holama bidali. Tama te Amor dabego te augwali te tǫ maluba dulumainu me ebeo.