Te Israel me Juda Hani Sigo Tuni Bidigo Po Elalubo Buku Deli 6:18-23

¹⁸Augwaligo te bǫ ni nami dabe selama, tama te be tomode te daga tigidali haluama, tama te bidi dabego masigigo bagulali daga suabo usu meni yai. Tama augwaligo te ni nami daide te bobigo wiegi yai piksa noma me, te ni dabego te plaua dabe me asęyu, togoyu yali.

¹⁹Te Tedali Gasagi Yai Mu Be Habu augwaligo te be tomode mu nigali, te Genuai Bidigo Dąų Wali Bomai Po Munalubo Halobage muabo digi nigali.

²⁰Te Tedali Gasagi Yai Mu Be Habu tigidali te deli tigi poai naga nigali. Te aga bobage usu, te 9 mita, tama aga genuai da, te 9 mita, tama te dąį ugwadu me, te 9 mita. Augwa te wiegi yai gol selama, tama te be haluali daga ni nami dabe haluali. Te be habu sunumi pąde augwaligo te ni bǫgo nigali alta me deli elaluali, tama augwaligo te alta me te golgo haluali.

²¹Tama augwaligo te wiegi yai gol selama, tama te tempel be tomo bagulali madi te tigidali daga haluali. Tama augwa te sen gol meba nigilama, tama te Tedali Gasagi Yai Mu Be Habu sunumi tede walali. Augwaligo te be habu togwali madi te golgo haluali,

²²tama tialima, te Genuai Bidigo be pedai tigidali tomo badu me, te Tedali Gasagi Yai Mu Be Habude elalubo alta me, augwaligo te tigidali golgo mesegelali.

²³Augwaligo te ni oliv selama, tama te ensel mobo bidi si noma nigali, te ensel si te Tedali Gasagi Yai Mu Be Habu tomoba muainu yai. Te ensel mobo bidi noma sigo bobage usu nama te 4 me hap mita, te tama usu nigali. Te ensel si te deli tigi poai si mu nigai. Augwa si bogo te dolo si diliga palama elaluali. Tama te deli deli bogo usu sali, te 2 mita me 25 sentimita teba usu nani. Tama te ensel me deligo bogo si bobage, te 4 me hap mita dao.