Te Israel me Juda Hani Sigo Tuni Bidigo Po Elalubo Buku Deli 22:27-49

²⁷Tama nago eno te po augwali siba mao, ‘Eno homugo dage sigo te bidi kalabusiba ma mumainu homu ebao. Te aga dwasianu tubo nai bret me wę naga mao, tama te boi hwįbo silama, ena ma asobo siba usu nao,’ te po wao,” wali.

²⁸Tama Mikaiago Ahapba te tiwai po ma wali, “Nage te dolobo sęgo gegesiąma, te nage asobaso da, teda Genuai Bidigo enabolo te po mabe da homu yagameo,” wali. Tama Mikaiago te tama po ma wali, “Dage tigidali hani we bidigo te po bugagia odao,” wali.

²⁹Tialima, nosali Ahap, te Israel king, me Jehosafat, te Juda king, sigo te ami bidi dabe selama, te Siria dabe dali te taun Ramot, te Gileat bulu tǫ pedaiba boi hwįgi palio.

³⁰Te boi hwįsąbadi yaide, Ahapgo Jehosafatba te tiwai po wali, “Te dago boi hwįgi pabo sogo, te eno kingo gudubo ugwa hasegelama, te gasa ugwa mueibao, te boi bidi dabego ena king da te konea pidali weyu, te tiwai yaibao. Tialima, nago da, te kingo ugwa au elama muao,” wali. Tibaso, king Ahapgo te gasa ugwa gudama, te augwa si boi hwįgi peyu palio.

³¹Te sogo naga tama, te Siria kingo te 32 kepten bidi dabe i wali, te ami augwali te karisde dolalu hwįbo bidi dabe augwaliba te tama po wali, “Dagego te Israel kingba naga boi hwįąo, te dagego gasa bidi dabeba me hwįnamo dao,” wali.

³²Te augwali boi hwįani sogo, te kepten dabego te king Jehosafat sulama, augwaligo Israel king Ahap mu dao, te homu yai. Te augwaligo aga dali boi hwįgi painu yali, tialima Jehosafatgo bomonama i obaso,

³³tama augwaligo te tiwai koneai, aga te Israel king meni da homu yai. Tama augwaligo aga dali hwįbo tagalalio.

³⁴Te ami bidi dabe augwa hwįbo sę idubadi, te Siria ami bidi me deligo te ene te enesigi balibiba nanama, te enesigi kegelama, te Israel dabe bidibo pedaiba enanio. Te enego te Ahap dolali, te aga tigi te hwįbo nai olo mesegelisąwai elaluali badu dolalio. Tama Ahapgo aga karis guni tolasa pabo bidibolo te tama po walali, “Ena dolalio. Te karis polo begelama, te hwįbo pesage tagalao,” wali.

³⁵Tialima, te Siria ami bidi dabe me Israel ami bidi augwa te boi hwįbo bomo mu ebaso, Ahapgo te hwįbo pesage taga soabo usu ebeo. Aga te karisde naga bididuai, te aga ami bidi dabego aga tonalubo sę yai. Tama agai Siria dabeba tonaludualio. Tama Ahapgo kaneme duludu, te aga karis sawali ni nami mesegelali. Aga te tiwai bididubadi, te be pio muba usu nigi pelama, te aga isai dao.

³⁶Te giliga iba degasa dulubo pąde igi pabo si da, teda te Israel ami bidi dabe, me Juda ami bidi dabego te tiwai i walio, “Da tigidali te dena bulu tǫ pedai kantriba, me te dena bulu dabeba pela silinao,” walio.

³⁷King Ahap isai baso da, teda augwaligo aga tigi te Samariaba sela pelama, te augwaligo gų pageba pubulalio.

³⁸Tama augwaligo aga karis te Samaria dwasianu sigi ąįba sela pelama, wę telagi pai. Te węde te penani ebo we dabe augwa te ąį paubo da. Te yowi dabe asu, agai kaneme tuagasali, tama te tama tiali sęgo te Genuai Bidigo pusali poba mu usu nai dao.

³⁹Te king Ahapgo gasa sę dabe tigidali yali po, te tiwai nogi wabo bukude te po elalubo, Te Israel King Dabego Yali Sę Po Buku Dao. Te bukude te wiegi yai genuai be agai sęnama, te elefan hasa kelego au ilali po wali, te me agai te taun dabe obo masigi banis dąų walobo sę me yali po wai dao.

⁴⁰Ahap isai baso da, teda augwaligo aga tigi pubulama da, te aga ogwa Ahasiago te aga ayago pesage selama, te king pedelalio.

⁴¹Te kibu be me si me si Ahap te Israel king bidali side, Jehosafat, te Asago ogwa, te Juda king pedelai dao.

⁴²Jehosafatgo kibu be te 35 kibu be elalubadi, te sogo aga king pedelali, tama aga te Jerusalemde king bidibadi, te kibu be bidi sese deli olama, a naga bidai. Jehosafatgo ida, te Asuba, te Silhigo wai dao.

⁴³Jehosafatgo te aga aya Asago yali kolesaga tigidali bugagia wali pali, te agai wiegi yai doloba pai kolesaga Genuai Bidigo gedude yali. Tialima, agai isąwani sę me deli te tiwai, agai te tibo godiba lotu wabo pesage dolobeo. Tibaso, te we bidi augwaligo te ofa ebo sę me, te wiegi yai denami hano ilibo pauda me, te pesage ulubo sę iduai dao.

⁴⁴Te Jehosafat king bidali sogo, te tǫ kantri Israel de Juda tǫ kantri si te munu me boi hwįbeo. Menio. Jehosafatgo te Israel king dali nogo menama, te augwali bugagia hodobo bidai.

⁴⁵Te king Jehosafatgo te gasa sę tigidali yali po, te tiwai nogi wabo bukude elalubao, Te Juda Kingo Yali Sę Po Buku Dao. Te bukude wali po te tigidali bomai sę agai yali po wali, te agai gasa tǫ kantri dabeba boi hwįgi pali po dabe wali dao.

⁴⁶Polobadu Asa, te Jehosafatgo ayago te tibo godiba lotu wabo pesagede te penani kolesaga ebo sę bidi dabe ela gudulali. Tiali goli, te meba me elalubaso, te Jehosafatgo augwali tigidali mu dola silai dao.

⁴⁷Te sogo te tǫ kantri pedai Idom te king elalubeo. Te Juda kingo naga te bidi dąį ilama, te Idom dabe tonalumainu yalio.

⁴⁸King Jehosafatgo po obaso, te sę bidi dabego genuai sip te tǫ kantri Ofirba gol sigi pabo sip dabe nigali. Tiali goli, augwali pabeo, magi baso meni, te sip dabe te saut badu tamu ąį nambisde elaluali taun Esiongeberde dolali.

⁴⁹Te nosali, Ahasia, te Israel kingo, te Jehosafatgo sip dolali po te tiwai odama, tama agai Jehosafatba te tama po wali, “Te nago sip dabe ma tagala palabo homu ebaso da, teda eno boskru bidi dabe te nago boskru bidi dabe dali pomainu yaibao,” wali. Tialima, Jehosafatgo hagela homu yai dao.