SOSUWEE 16

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Bɛ̀ do tɑ̃ɑ̃́ tɛ́tɛ́ kɛ́duɔ́ nkɛ̀ɛ̀ tenkɛ̀ Sosɛfu yɑɑ̀bí kɛ mɑ̀nku do tú: Suditɛ̃ɛ̃ kubɑkù cɑ̃̀nku diyiè yìɛ̀ní kɛ̀ɛ̀ bíɛ́kɛ̀ Sedikoo tɑkɛ́ mɛniɛ nyiɛ̀ní dɛ̀ kɛ tɑɑ̀ dihɛì kɛ̀ kumɑ̀nkuu pɛ̃ɛ̃tɛ́ Sedikoo kɛ́tɑ dikpɑ́ɑ̀ Betɛɛdi tɑ̃rì tempɛ̃,

²kɛ́pɛ̃ɛ̃tɛ́ kɛ́nwetí Duusi, kɛ́yɛ̀nnɛ̀ Atɑdoti, Adikiibɛ ciɛ,

³kɛ́pɛ̃ɛ̃tɛ́ kɛ́cútɛ́ dɛ ììkɛ̀ Yɑfedetiibɛ ciɛ, kɛ́sĩ́nnɛ́ Bɛti-Onɔɔ nɛ̀ Kesɛɛ, kɛ́kɑ̃́ɑ̃́ mMɛditedɑndee.

⁴Sosɛfu yɑɑ̀bí Mɑnɑnsee nɛ̀ Efɑdɑimmu bɛ kó kɛtenkɛ̀ nkɛ.

⁵Efɑdɑimmu botí kɔbɛ tenkɛ̀ mɑ̀nku tú: Atɑdoti-Adɑɑ kubɑkù cɑ̃̀nku diyiè yìɛ̀ní kɛ̀ɛ̀ bíɛ́kɛ̀, kɛ́tuɔkɛ Bɛti-Onɔɔ yuu.

⁶Kuù pɛ̃ɛ̃tɛ́ kɛ tùɔ̀kɛ Mɛditedɑndee kubɑkù yoú bíɛ́kɛ̀, kɛ yɛ̀ Mikimbetɑɑ tɑkɛ́ diyiè yìɛ̀ní kɛ̀ɛ̀ bíɛ́kɛ̀, kɛ wetínnɛ́ Tɑɑnɑti-Sidoo kɛ pɛ̃ɛ̃tɛ́ kɛ kɔ̀tɛ Yɑnɑndoɑ,

⁷Kɛ pɛ̃ɛ̃tɛ́ kɛ kɔ̀tɛ Atɑdoti nɛ̀ Nɑɑdɑ, kɛ yɛ̀ Sedikoo kɛ tùɔ̀kɛ Suditɛ̃ɛ̃.

⁸Kuù ìtɛ́ Mikimbetɑɑ ììkɛ̀ Tɑpuɑ, kɛ tùɔ̀kɛ Kɑnɑ kó kukó nkɛ tɑ Mɛditedɑndee. Efɑdɑimmu botí kɔbɛ tenkɛ̀ nkɛ.

⁹Kɛ̀ bɛ̀ɛ bɛ̀ yìɛ́ yɛhɛkɛ̀ nɛ̀ sihɛkɛsí sìì bo Mɑnɑnsee botí kɔbɛ tenkɛ̀ miɛkɛ. Yɛ mɑ̀nku do dìtɛ́ kukó nku kɛ̀ kumɑ̀nku tɛkù ntú dɑ̀mɛ́ɛ̀rì Mɛditedɑndee kou.

¹⁰Bɛ̀ í mbɛ̀ti Kɑnnɑhɑ̃ɑ̃ kɔbɛ bɛ̀ɛ̀ bo Kesɛɛ, Efɑdɑimmu botí kɔbɛ cuokɛ̀ kɛ̀ bɛ̀ kpɑɑ́ bo nɛ̀ yíenní, kɛ pĩ́ muhɛikɛ̀ntɔ̃mmú.