2 Timɔntee 1

1

2

3

4

¹Mí mPɔɔri Yesu Kirisi kó ditɔ̃nnì, Kuyie nkuù n tɑ̃ɑ̃tɛ́ kɛ̀ m bo nɑ́kɛ́ bɛnìtìbɛ̀ tinɑ́ɑǹtì tìì duɔ̀ mmufòmmu kù do nɑ̀kɛ́ tìì kpɛ́í. Onìtì ɔ̃ɔ̃ tɑunnɛ̀ Yesu nwe kɛ́pɛ́tɛ́ dɛ kó mufòmmu.

²Míì dɑ wɑ̃̀ri di mpɑ́tíri, fɔ̃́ nTimɔntee n kóo dɑpɑ̀ɑ̀ n tɑ̃́ wè. Kuyie nti cicɛ nɛ̀ ti Yiɛ̀ nYesu Kirisi, bɛ̀ dɑ kuɔ́ mmɛsémmɛ̀ kɛ dɑ dɔɔ̀ mɛsɑ̀ɑ̀ nkɛ dɑ duɔ́ ndiwɛ̀ì!

³N sɑ̃ntímu Kuyie kunku n yɛmbɛ̀ do tũ nkù, m pĩ́ nkùù tɔ̃mmú bɑ́ n yɛ̀mmɛ̀ í m bekùnɛ̀. N kù bɑ̀ɑ́mmu kɛyènkɛ̀ nɛ̀ kuyie nhɑ kpɛ́í.

⁴Nh ɔ̃ɔ̃ dentɛnímu ti sòò yóó yɑtɛ dìì mɔ̀nnì kɑ̀ɑ kuɔ́ mmɛ̀ɛ̀ botí tinɔnniɛti, kɛ́ndɔ́ kɛ dɑ yɑ̀ kɛ̀ dɛ̀ n nɑrikɛ.

⁵N yɛ̃́mu ɑ tɑ̃́mɛ̀ Kuyie mmɛsɑ̀ɑ̀, ɑ yɔ̃ kótì Doyiisi nɛ̀ ɑ yɔ̃ Enniisi bɛ̀ do kù tɑ̃́ mɛ̀ɛ̀ botí.

⁶A bɑ́ɑ́ yɛ̃̀ n dɑ nɔ̀ɔ́ ndìì mɔ̀nnì sinɔu kɛ bɑ́ntɛ̀ Kuyie nkɛ̀ kù dɑ pɑ̃ dìì pɑ̃nnì kpɛ́í.

⁷Muyɑɑ́nsɑ̀ɑ̀mù í ti bónkùnko, mù ti duɔ̀ mmuwɛ̃rímú mmu, kɛ te kɛ̀ ti dɔ́ titɔbɛ̀, kɛ nɔ nkɛ pĩĩ ntimɑ́ɑ̀.

⁸Ifɛi bɑ́ ndɑ bonɛ̀ ɑ bo nɑ́kɛ́mɛ̀ ti Yiɛ̀ nYesu Kirisi kpɛ́í nnɛ̀ bɛ̀ n kpetímɛ̀ o kpɛ́í. N wɛ̃nnɛ́nɛ̀ kɛ́fɛ̃́ṹtɛ́ Tinɑ́ɑǹsɑ̀ɑ̀tì ɑ nɑ́ɑ́ ntì kpɛ́í nnɛ̀ Kuyie ndɑ duɔ́ mmùù wɛ̃rímú.

⁹Kuù ti yu kɛ ti dɛɛtɛ́, dɛ̀ í tú kù yɛ̃ nti dɔɔ̀rìmɛ̀ mɛɛ̀ wenni, kuù mɛ̀ dɔ́ nɛ̀ dimɔ̀nnì kɛ mu nyí dɔ̀ɔ̀ kutenkù, kɛ mɛ̀ dɔ̀ɔ̀ nɛ̀ Yesu Kirisi kpɛ́í.

¹⁰Bɑ̀mbɑ̀ nkɛ̀ ti yɑ̀ ku sɑ̀ɑ̀ nkù duɔnnímɛ̀ Yesu Kirisi kòò ti dɛɛtɛ́, kɛ nɑ mukṹṹ nkɛ mù dèè, kɛ ti nɑ̀kɛ́ Tinɑ́ɑǹsɑ̀ɑ̀tì kɛ̀ ti pɛ̀tɛ́ mufòmmu mùù bo sɑ̃́ɑ̃̀.

¹¹Kuyie nni ndɔ̀ɔ̀ ku kó ditɔ̃nnì kɛ̀ m bo nɑ́kɛ́ tiì nɑ́ɑǹsɑ̀ɑ̀tì bɛ̀ɛ̀ í tú Sifubɛ kɛ́ ti mbɛ̀ tié.

¹²Tiì nɑ́ɑǹsɑ̀ɑ̀tì te kɛ̀ n fɛ̃́ũ̀rì bɑ́ ifɛi í m bo, n yɛ̃́ mɛ̀ɛ̀ kpɛ́í n tɑ̃́ wè, kɛ yɛ̃́ kɛ dò nhò bo m bɑɑ ò n duɔ́ ndɛ̀ kɛ́tuɔkɛnɛ̀ tibeéntì yiè.

¹³A mpĩ́ nTinɑ́ɑǹsɑ̀ɑ̀tì n dɑ nɑ̀kɛ́ tì, kɛ dɔkɛ duɔ́ nhɑmɑ́ɑ̀ Kuyie, kɛ ndɔ́ bɛtɔbɛ̀ nɛ̀ muwɛ̃rímú ti mɔkɛ mù ti Yiɛ̀ nYesu kó mɛtɑummɛ̀ miɛkɛ.

¹⁴Mpĩ́ mmɛsɑ̀ɑ̀ mMuyɑɑ́nsɑ̀ɑ̀mù mùù bo ti miɛkɛ mù dɑ duɔ́ ndɛ̀.

¹⁵A yɛ̃́mu kɛ dò nhAsii kɔbɛ bɛ̀ɛ̀ do m bonɛ̀, Fisɛɛri nɛ̀ Edimɔsɛnni bɛ̀ n yóumu.

¹⁶Kuyie ndɔɔ̀ mɛsɑ̀ɑ̀ Onnɛsifɔɔ cĩ́ɛ̃̀tɛ̀ kɔbɛ, kɛ yɛ̃́ bɛ̀ n kpetímɛ̀ bɑ́ ifɛi í ò bo, kòò kɔ̀rìní kɛ n dɔu nkɛ yɑ́úkùnko n kɔ̃̀ntì.

¹⁷Ò tùɔ̀kɛní dìì mɔ̀nnì Odommu miɛkɛ kɛ́ n wɑmmú weti weti nwe kɛ́nɑ kɛ́ n yɑ̀.

¹⁸Ti Yiɛ̀ nYesu ò kuɔ́ mmɛsémmɛ̀, kòo pɛ́tɛ́ mɛsɑ̀ɑ̀ nKuyie mbeéntì yiè. A yɛ̃́mu wè n teennɛ̀ mɛ̀ɛ̀ botí Efɛɛsi.