Isɑ̃ɑ̃ 18

1

2

3

4

5

6

7

8

9

10

11

12

13

14

15

16

17

18

19

20

21

¹Yesu nɑ̀kɛ́ mɛmmɛ kɛ́deè, nɛ̀ o tɑncɔ́ùmbɛ̀ kɛ̀ bɛ̀ɛ ítɛ́ kɛ́kɔtɛ Setinɔɔ kó kukó, kɛ̀ kupúú mɑkù dɛ̀ bo, kɛ̀ bɛ̀ɛ tɑ ku miɛkɛ.

²Sudɑɑsi wèè yóó fítɛ́ Yesu ò do yɛ̃́mu dɛ kó kupúú, kɛ yɛ̃́ Yesu nɛ̀ o tɑncɔ́ùmbɛ̀ do kɔrimɛ̀ dɛborɛ̀ sɑ̃́ɑ̃̀.

³Ikuɔ́ nìùbɛ̀ kó bɛkótíbɛ̀ nɛ̀ Fɑdisĩɛ̃bɛ kɛ̀ bɛ̀ɛ tɔ̃nní bɛhɑ̃ɑ̃pɔ̀mbɛ̀ nɛ̀ ntihɑ̃ɑ̃pɔ̀ntì tìì bɑ̀ɑ̀ Kuyie ncĩ́ɛ̃̀tɛ̀ kɛ̀ Sudɑɑsii bɛ̀ niitɛ́ kɛ̀ bɛ̀ tɔ fitìi nɛ̀ dɛhɑ̃nnɛ kɛ tɔnɛ̀ tikpɑ̀rìnɛntì.

⁴Yesu mɛ nyɛ̃́mɛ̀ tìì yóó ò tùɔ̀kɛní, kòò tɔ́ɔ́nko bɛ borɛ̀ kɛ́ bɛ̀ bekɛ kɛ dɔ̀: Di wɑnti we?

⁵Kɛ̀ bɛ̀ɛ ò tɛ̃̀ńnɛ́ kɛ dɔ̀: Yesu Nɑnsɑrɛti kou. Kɛ̀ Yesu bɛ̀ nɑ̀kɛ́ kɛ dɔ̀: Mínwe! Kɛ̀ Sudɑɑsi wèè ò fìtɛ́ kòò bɛ̀ nɛínɛ̀.

⁶Ò bɛ̀ nɑ̀kɛ́ dìì mɔ̀nnì kɛ dɔ̀: Mínwe. Kɛ̀ bɛ̀ mbótírí kɛ duò.

⁷Kɛ̀ Yesu wɛ̃tɛ kɛ́ bɛ̀ bekɛ kɛ dɔ̀: Di wɑnti we? Kɛ̀ bɛ̀ dɔ̀: Yesu Nɑnsɑrɛti kou.

⁸Kòò dɔ̀: N di nɑ̀kɛ́mu kɛ tú mínwe, kɛ̀ di wɑnti mínwe, yóunɛ̀ bɛtɔbɛ̀ kɛ̀ bɛ̀ɛ ítɛ́.

⁹Mɛm̀mɛ kɛ̀ dɛ̀ɛ dɔɔ̀ kɛ́ndònnɛ̀ ò bɛ́i ntì kɛ tú: N cicɛ n yí fétinnɛ ɑ n duɔ́ mbɛ̀ kóò mɔù.

¹⁰Kɛ̀ Simɔɔ Piɛrii kpɑtɛ disiè kɛ́kɔ̃ṹ ikuɔ́ nìùtì diɛwè tɔ̃ntì toò youri. Dɛ kóò tɔ̃ntì yètìrì do tú Mɑdikuusi.

¹¹Kɛ̀ Yesu nɑ́kɛ́ Piɛri kɛ dɔ̀: Nɔnnɛ ɑ siè di nɔ̀rìkù, ɑ yɛ̀mmɛ̀ dò m bɑ́ɑ́ yɑ̃̀ fɛbòòfɛ̀ n cicɛ n duɔ́ nfɛ̀ɑ̀?

¹²Kɛ̀ bɛhɑ̃ɑ̃pɔ̀mbɛ̀ kóò kótìi duɔ́ ndinùù tihɑ̃ɑ̃pɔ̀ntì nɛ̀ tìì bɑ̀ɑ Kuyie ncĩ́ɛ̃̀tɛ̀ kɛ̀ bɛ̀ɛ pĩ́ nYesu kɛ́boú.

¹³Kɛ kétɛ́ kóò kɔ̀tɛnɛ̀ Anni, Kɑyifu cɔ̀kù cĩ́ɛ̃̀tɛ̀, weè do tú ikuɔ́ nìùtì diɛwè dɛ benni.

¹⁴Weè Kɑyifu do nɑ̀kɛ́ Sifubɛ kɛ dɔ̀: Dɛ̀ bo nwenni onìtì omɑ́ɑ̀ bo kúmɛ̀ kubotí kumɔu kpɛ́í.

¹⁵Simɔɔ Piɛri nɛ̀ Yesu tɑncɔ́ùntì tɔù mɔù, kɛ̀ bɛ̀ ńtũ nYesu. Ikuɔ́ nìùtì diɛwè nɛ́ mɛ nyɛ̃́mɛ̀ Yesu tɑncɔ́ùntì tɔù, kɛ̀ wenwee tɑ.

¹⁶Kɛ̀ Piɛri nkpɑɑ́ ditowɑɑ̀ kɛ kɑri dibòrì kɛ̀ Yesu tɑncɔ́ùntì, ikuɔ́ nìùtì diɛwè yɛ̃́ wèe yɛ̀nní kɛ́nɑ́kɛ́ osɑpɑ̀ɑ̀ nwèè bɑ̀ɑ dibòrì kɛ̀ Piɛri bo tɑ.

¹⁷Kɛ̀ dɛ kóo sɑpɑ̀ɑ̀ mbekɛ Piɛri kɛ dɔ̀: A múnkɛ í tú we ǹnìtì kóò tɑncɔ́ùntì nweɑ̀? Kɛ̀ Piɛri dɔ̀: Ɔ́ɔ̀! N yí ò tú!

¹⁸Kɛ sɔ̃́ mmuséé mbo kɛ̀ bɛhɑ̃ɑ̃pɔ̀mbɛ̀ nɛ̀ bɛtɔ̃mbɛ̀ kɛ̀ bɛ̀ tɔ̀tinnɛ muhɑ̃ɑ̃́ nkɛ iiri, kɛ̀ Piɛri ncómmú dɛborɛ̀ kɛ iiri.

¹⁹Kɛ̀ ikuɔ́ nìùtì diɛwèe bekɛ Yesu o tɑncɔ́ùmbɛ̀ kpɛti nɛ̀ o tié nkpɛti.

²⁰Kɛ̀ Yesu ò tɛ̃̀ńnɛ́ kɛ dɔ̀: N yí nɑ̀kɛ́ tìmɑtì disɔ̀rì, nh ɔ̃ɔ̃ ntiè ntitííntouti nɛ̀ Kuyie ncĩ́ɛ̃̀tɛ̀ diɛtɛ̀ miɛkɛ nkɛ Sifubɛ bɛmɔu ɔ̃ɔ̃ tíí ndɛ̀.

²¹Dɛ̀ dòmmɛ kɑ̀ɑ m bèkú? Bekɛ nh ɔ̃ nnɑ́ɑ́ nkɛ̀ bɛ̀ɛ̀ bo, bɛ̀ yɛ̃́mu n nɑ̀kɛ́ tì.

²²Yesu bɛ́i mɛmmɛ kɛ̀ kuhɑ̃ɑ̃pɔ̀nkù kùù ò tɔ̀kɛ́nɛ̀ kɛ̀ kùu ò bèntɛ kɛ dɔ̀: Ikuɔ́ nìùtì diɛwè nwe ɑ nɑ́ɑ́mmɛ̀ mɛmmɑɑ̀?

²³Kɛ̀ Yesu dɔ̀: Kɛ̀ m bɛ́i tiyɛiti nti bɛnkɛ tìì tu tiyɛiti? Kɛ̀ m mɛ bɛ́i tisɑ̀ɑ̀tì nti bɑ nte kɑ̀ɑ m potɛ́?

²⁴Mɛm̀mɛ kɛ̀ Anni yóu kòo nkpɑɑ́ boú kòo ò duɔ́nko ikuɔ́ nìùtì diɛwè Kɑyifu.

²⁵Kɛ̀ Simɔɔ Piɛri ńdɛ̀ kpɑɑ́ kɛ iiri, kòò mɔùu wɛ̃tɛ kóò bekɛ kɛ dɔ̀: A í tú we ǹnìtì kóo tɑncɔ́ùntì ǹweɑ̀? Kɛ̀ Piɛrii ò nɛ̀nni kɛ dɔ̀: N yí ò tú.

²⁶Kɛ̀ ikuɔ́ nìùtì diɛwè kóo tɔ̃ntì, Piɛri dɑ̀tɛ wèè toò cĩ́ɛ̃̀tɛ̀ kouu bɛ́i nkɛ dɔ̀: N do dɑ yɑ̀mu kɑ̀ɑ ò nɛínɛ̀ kupúú miɛkɛ.

²⁷Kɛ̀ Piɛrii wɛ̃tɛ kóò nɛ̀nni kɛ dɔ̀: N yí ò yɛ̃́. Dɛ mɔ̀nnì kɛ̀ tɛkotɛɛ kuɔ́.

²⁸Kɛ̀ bɛ̀ɛ ítɛ́nɛ̀ Yesu Kɑyifu cĩ́ɛ̃̀tɛ̀, kóò sɔɔ́nnɛ̀ kùmɑ̀ndɑ́ɑ̀ cĩ́ɛ̃̀tɛ̀ kɛ̀ dɛ̀ kpɑɑ́ uu, kɛ̀ Sifubɛɛ yetɛ mutɑrimù bɛ̀ yɑ̀ɑ̀ bo sɑ̃ũ mɛ̀ɛ̀ kpɛ́í mbɛmɑ́ɑ̀ kɛ́pɑɑ̀ ndiyentɛ́bɑnni kó mudiì.

²⁹Kɛ̀ Pidɑtii yɛ̀nní kɛ́ bɛ̀ bekɛ kɛ dɔ̀: Di yɛ̃ nhonìtì yie ǹcɑ̀kɛ bɑ?

³⁰Kɛ̀ bɛ̀ɛ ò tɛ̃̀ńnɛ́ kɛ dɔ̀: Kòò do í cɑ̀kɛ dɛ̀mɑrɛ̀, ti nɑ bɑ́ nhò kɔ̀tɛnní ɑ borɛ̀.

³¹Kɛ̀ Pidɑtii bɛ̀ nɑ̀kɛ́ kɛ dɔ̀: Túótɛ́nɛ̀ we, kóò bekɛ́nɛ̀ di mɔ́mmɔmbɛ di kuɔ́ dòmmɛ̀. Kɛ̀ bɛ̀ dɔ̀: Ti kó ikuɔ́ í yie nti kuɔmɛ̀ òmɔù.

³²Kɛ̀ dɛ̀ bo yie nkɛ̀ dɛ̀ɛ dɔɔ̀ Yesu do yɛ̃ nhò yóó kú mùù kṹṹ.

³³Kɛ̀ Pidɑtii tɑ kudieku kɛ́yú Yesu kóò bekɛ kɛ dɔ̀: Fɔ̃́ɔ̃̀ tu Sifubɛ kóò kpɑ̀ɑ̀tɑ̀ɑ̀?

³⁴Kɛ̀ Yesu ò tɛ̃̀ńnɛ́ kɛ dɔ̀: A m békú nɛ̀ ɑmɑ́ɑ̀ ndɑɑ̀? Kɛ̀ bɛtɔbɛ̀ bɛɛ̀ yɛ̃ nhɑ m bekɛ?

³⁵Kɛ̀ Pidɑtii ò tɛ̃̀ńnɛ́ kɛ dɔ̀: N túmu Sifuɑ? A botí kɔbɛ nɛ̀ ikuɔ́ nìùbɛ̀ kó bɛkótíbɛ̀ bɛɛ̀ dɑ kɔ̀tɛnní m borɛ̀. A cɑ̀kɛ bɑ?

³⁶Kɛ̀ Yesu ò tɛ̃̀ńnɛ́ kɛ dɔ̀: N kó tikpɑ̀tì í tú kutenkù kuu nkpɛti, kɛ̀ tì do nti ntú, n kɔbɛ nɑ m̀bɑ̀ɑomu bɑ́ Sifubɛ bɑ́ m pĩ́. N kó tikpɑ̀tì mɛ nyí tú kutenkù kuu nkpɛti.

³⁷Kɛ̀ Pidɑtii ò bekɛ kɛ dɔ̀: A tú okpɑ̀ɑ̀tì nwe yɑ́ɑ́ bɑ? Kɛ̀ Yesu ò tɛ̃̀ńnɛ́ kɛ dɔ̀: A ti mbɛ́i, n tú okpɑ̀ɑ̀tì nwe kɛ kɔ̀tɛní kutenkù, kɛ̀ bɛ̀ m pɛitɛ́ kɛ̀ m bo nɑ́kɛ́ timɔ́mmɔnti. Bɛ̀ɛ̀ dɔ́ timɔ́mmɔnti bɛɛ̀ kemmu n nɑ́ɑǹtì.

³⁸Kɛ̀ Pidɑti dɔ̀: Bɑ ntú timɔ́mmɔnti? Ò bɛ́i mmɛmmɛ kɛ́yɛ̀ kɛ́kɔtɛ Sifubɛ borɛ̀ kɛ́ bɛ̀ nɑ̀kɛ́ kɛ dɔ̀: N yí yɑ̀ onìtì yie n cɑ̀kɛmu kɛ dò nti ò kùɔ.

³⁹Kɛ́ndònnɛ̀ di kó ikuɔ́ miɛkɛ di ɔ̃ɔ̃ duɔ́mmɛ̀ kɛ̀ n fĩ́ĩ nkukpetínkù mɑkù diyentɛ́bɑnni yiè, di dɔ́ n fĩ́ĩ nSifubɛ kóo kpɑ̀ɑ̀tɑ̀ɑ̀?

⁴⁰Kɛ̀ bɛ̀ɛ wekíí kɛ dɔ̀: Ti í dɔ́ ɑ fĩ́ĩ nyie, ti dɔ́ ɑ fĩ́ĩ mBɑrɑbɑɑsi nwe! Bɑrɑbɑɑsi mɛ ndo tú onitikɔ̀ùtì nwe.