Mɑriki 4

1

2

3

4

5

6

7

8

9

10

11

12

13

14

15

16

¹Kɛ̀ Yesu wɛ̃tɛ kɛ́nnɑ́ɑ́ nKuyie nnɑ́ɑǹtì Kɑdidee kóo dɑ̀mɛ́ɛ̀rì nùù, kɛ̀ bɛnìtìbɛ̀ɛ tíínko o borɛ̀ kɛ́nsũ, kòo tɑ kɛ́nkɑri kudɑbɛkù dɑ̀mɛ́ɛ̀rì miɛkɛ, kɛ̀ ditĩ̀nnì kɑ̀ri dɑ̀mɛ́ɛ̀rì nùù.

²Kɛ̀ Yesu mbɛ̀ tiè nyitié mpɛ́u nɛ̀ yɛnɑ́ɑǹhɑ̃ntíyɛ̀ miɛkɛ, kɛ́ mbɛ̀ nɑ̀ɑ́ nkɛ tú:

³Onìtì mɔù weè do yɛ̀ kɛ bo yɑɑ́ o diitì.

⁴Ò yɑù dìì mɔ̀nnì kɛ̀ mɛdibii mmɑmɛ̀ɛ do kucɛ nùù kɛ̀ sinɔɔ kɔtɛní kɛ́ mɛ̀ di.

⁵Kɛ̀ mɛtɛ̃mɛ̀ɛ do fɛkũũfɛ ĩ́nkɛ̀ mutɑ̃́ɑ̃́ nyí sũ dɛ̀ kɛ́cɑ̃rikɛ kɛ́yɛ̀nní, kɛ yɛ̃́ mutɑ̃́ɑ̃́ nyí sũmɛ̀ dɛborɛ̀.

⁶Kɛ̀ diyiè tònkɛ̀ kɛ́ mɛ̀ tùɔ nkɛ̀ mɛ̀ɛ kpeí kɛ yɛ̃́ icĩɛ̃ nyí nɑmɛ̀ kɛ bo fííkú.

⁷Kɛ̀ mɛdibii ntɛ̃mɛ̀ɛ do tipotì miɛkɛ kɛ̀ tìi ítɛ́ní kɛ́ mɛ̀ ɛ̃̀ṹtɛ́ bɑ́ mɛ̀ í nnɑ kɛ́pɛitɛ́.

⁸Kɛ̀ mɛdibii ntɛ̃mɛ̀ɛ do kɛtenkɛ̀ wenni dɛ̀ kɛ́yɛ̀nní kɛ́nkótírí kɛ kpeńnì, kɛ̀ miɛ mpɛitɛ́ mɛbii nsipísìtɑ̃ɑ̃ti kɛ̀ mɛtɛ̃mɛ̀ɛ pɛitɛ́ mɛdibii sipísìkuɔ̀, kɛ̀ mɛtɛ̃mɛ̀ɛ pɛitɛ́ mɛdibii ntɛkɔ̀ùtɛ̀ (100).

⁹Koò dèè kɛ dɔ̀: Wèè mɔ̀kɛ yɛto kɛ bo keè, wèe keè!

¹⁰Yesu ìtɛ́ dìì mɔ̀nnì ditĩ̀nnì borɛ̀, o tɑncɔ́ùmbɛ̀ nɛ̀ bɛtɔbɛ̀ bɛ̀ɛ̀ ò bonɛ̀ kɛ̀ bɛ̀ɛ o bekɛ dɛ kó yɛnɑ́ɑǹhɑ̃ntíyɛ̀ tú mù.

¹¹Kɛ̀ Yesu bɛ̀ tɛ̃̀ńnɛ́ kɛ dɔ̀: Kuyie ndi bɛnkɛmu ku kpɑ̀ɑ̀tìyuu kó timɔ́mmɔnti tìì sɔ̀ri, bɛtɔbɛ̀ biɛ m bɛ̀ nɑ̀ɑ́nnɛ̀ yɛnɑ́ɑǹhɑ̃ntíyɛ̀ nyɛ,

¹²kɛ̀ bɛ̀ bo nwúó nkɛ bɑ́ɑ́ yɑ̀, kɛ́nyo kɛ bɑ́ɑ́ bɑntɛ́, bɛ̀ yɑ̀ɑ̀ bo ceetɛ kɛ̀ Kuyie mbɛ̀ cĩ̀ɛ̃́ mbɛ yɛi.

¹³Kɛ̀ Yesu yíɛ́ kɛ́ bɛ̀ nɑ̀kɛ́ kɛ dɔ̀: Kɛ̀ di í bɑntɛ́ dɛ kó dinɑ́ɑǹhɑ̃ntírì di nɛ́ bo yĩ́mɛ kɛ́bɑntɛ́ yɛnɑ́ɑǹhɑ̃ntíyɛ̀ tɛyɛ̀ yɛmɔu.

¹⁴Ntɛ dɛ kó dinɑ́ɑǹhɑ̃ntírì tu mù: Wèè yɑù mɛdibii nweè tu wèè nɑ̀ɑ́ Kuyie nnɑ́ɑǹtì.

¹⁵Mɛdibii mmɛ̀ɛ̀ do kucɛ nùù kɛ̀ mɛ̀ tu bɛnìtìbɛ̀ bɛ̀ nɑ̀kɛ́ bɛ̀ Kuyie nnɑ́ɑǹtì, kɛ̀ bɛ̀ tì kèè, dɛndɛ bɑ̀mbɑ̀ nkɛ̀ dibɔɔ̀ kɔ̀tɛní kɛ tì dɛ̀itɛ.

¹⁶Mɛdibii mmɛ̀ɛ̀ do fɛkũũfɛ ĩ́nkɛ̀, mɛ̀ tu bɛnìtìbɛ̀ mbɛ bɛ̀ɛ̀ ɔ̃ɔ̃ keè Kuyie nnɑ́ɑǹtì kɛ pɑ̃̀nkɛɛ tì cɔutɛ́ nɛ̀ kuyɛǹnɑɑtí.

¹⁷Bɛ̀ mɛ nyí nyóu kɛ̀ tì bo fííkú bɛ miɛkɛ, bɛ̀ í nwɛ̃́ɛ̃́rì kɛ̀ mɛyɛǹcɑɑ̀rìmɛ̀ tùɔkɛní dìì mɔ̀nnì yoo bɛ̀ bɛ̀ fɛ̃́ũ bɛ̀ nɑ̀ɑ́ mmɛ̀ɛ̀ kpɛ́í Kuyie nnɑ́ɑǹtì bɛ̀ pɑ̃̀nkɛɛ bútínnɛ́ Kuyie.

¹⁸Mɛdibii mmɛ̀ɛ̀ do tipotì miɛkɛ mɛ̀ tu bɛ̀ɛ̀ kèè bɛ̀mbɛ Kuyie nnɑ́ɑǹtì.

¹⁹Kɛ̀ kutenkù kó iyɛǹtotí nɛ̀ tikpɑ̀tì kó muwɑmmù kɛ̀ dɛ̀ɛ bɛ̀ soutɛ́ nɛ̀ dɛtɛrɛ̀ dɛtɛrɛ̀ kó mɛdɔ́kùmɛ̀ kɛ̀ dɛ̀ɛ tɑ bɛ yɛ̀mmɛ̀ miɛkɛ kɛ́hɛ̃́ṹtɛ́ Kuyie nnɑ́ɑǹtì bɑ́ tì í nnɑ kɛ́pɛitɛ́.

²⁰Mɛdibii mmɛ̀ɛ̀ do kɛtenkɛ̀ wenni dɛ̀, mɛ̀ tu bɛnìtìbɛ̀ bɛ̀ɛ̀ ɔ̃ɔ̃ keè bɛ̀mbɛ Kuyie nnɑ́ɑǹtì kɛ́ tì cɔutɛ́ kɛ́kɔtɛ kɛ́wɑɑ́ mbɛtɔbɛ̀, yie sipísìtɑ̃ɑ̃ti, otɔù sipísìkuɔ̀, otɔù tɛkɔ̀ùtɛ̀ (100).

²¹Kɛ̀ Yesu yíɛ́ kɛ́bɛ́i nkɛ dɔ̀: Bɛ̀ ɔ̃ɔ̃ í ncɔ́u nfìtírɛ̀ kɛ́ dɛ̀ tɑ̀ɑ ntɛcètɛ̀ miɛkɛ yoo bɛ̀ɛ dɛ̀ ĩ̀ńnɛ́ mutɛ̃ĩ̀ fũ̀ɔ̃̀, bɛ̀ ɔ̃ɔ̃ dɛ̀ cɔ̃nnɛ́ fɛcùùfɛ̀ nfɛ.

²²Kɛ yɛ̃́ dɛ̀mɑrɛ̀ í bomɛ̀ dɛ̀ɛ̀ sɔ̀ri kɛ í yóó feitɛ́. Dɛ̀ɛ̀ sɔ̀ri dɛ̀ yóó yɛ̀nnímu kuwenniku.

²³Wèè mɔ̀kɛ yɛto kɛ bo keè wèe keè!

²⁴Kɛ̀ Yesu yíɛ́ kɛ́bɛ́i nkɛ dɔ̀: Dɑɑtɛnɛ̀ mɛsɑ̀ɑ̀ ndi yo tìì nɑ́ɑǹtì kpɛ́í, bɛ̀ bo di bennɛ́ nɛ̀ tɛbietɛ̀ di beú nɛ̀ tɛ̀ bɛtɔbɛ̀, kɛ́deè kɛ yíɛ́ dɛ ĩ́nkɛ̀.

²⁵Wèè mɔ̀kɛ bɛ̀ yóó ò yìɛ́mu, kɛ̀ wèè kpɑ bɛ̀ɛ dɛitoo dɛsɑ́m̀pɔ́rɛ̀ ò mɔ̀kɛ dɛ̀.

²⁶Kɛ̀ Yesu yíɛ́ kɛ́bɛ́i nkɛ dɔ̀: Kuyie nkpɑ̀ɑ̀tìyuu dònnɛ̀ onìtì wèè buɔtí wènwe mɛdibii nho pɑku miɛkɛ.

²⁷Kòo yɛ̃̀ nkɛ duɔ́ yoo ò wùó, tidiitì nkótírí nɛ̀ timɑ́ɑ̀ kɛyènkɛ̀ nɛ̀ kuyie mbɑ́ ò í yɛ̃́ ti kótírí mɛ̀ɛ̀ botí.

²⁸Kɛtenkɛ̀ kɛɛ̀ ɔ̃ mpĩ́ mmutɔ̃mmú nɛ̀ kɛmɑ́ɑ̀ kɛ̀ tidiitì kòtírí kɛ́ketɛ́ kɛ́ɑ̃nnɛ́ difènnì kɛ́deè kɛ̀ mɛbii nnɛ́ ɑ̃nnɛ́ kɛ́píɛ.

²⁹Tì bi dìì mɔ̀nnì kòo tì dɛ̀itɛ kɛ yɛ̃́ mudidɛ̀ì tùɔ̀kɛmɛ̀.

³⁰Kɛ̀ Yesu yíɛ́ kɛ́bɛ́i nkɛ dɔ̀: Ti bo donnɛnɛ̀ bɑ Kuyie nkpɑ̀ɑ̀tìyuu? Ti bo yĩ́ dì dònnɛ̀ bɑ?

³¹Ti bo yĩ́ dì dònnɛ̀ fɛyoǹfɛ̀ dòmmɛ̀ mmɛ kɛ kɛ̃ńnì.

³²Kɛ̀ bɛ̀ fɛ̀ buɔtí fɛ̀ɛ yɛ̀nní kɛ́kótɛ́ kɛ́nɑɑ́ mmutie diɛmù nɛ̀ ibɑkɛ, kɛ̀ sinɔɔ yĩɛ̃ nyi ĩ́nkɛ̀.

³³Nɛ̀ yɛnɑ́ɑǹhɑ̃ntíyɛ̀ miɛkɛ nkɛ pɛ́u ò do bɛ̀ nɑ̀ɑ́nnɛ̀mɛ̀ Kuyie nnɑ́ɑǹtì, kɛ bɛ̀ nɑ̀ɑ́nnɛ̀ bɛ̀ bo nɑ kɛ́keè mɛ̀ɛ̀ botí.

³⁴Yesu do ɔ̃ nɑ́ɑ́nnɛ̀ yɛnɑ́ɑǹhɑ̃ntíyɛ̀ nyɛ sɑ̃́ɑ̃̀, kɛ̀ bɛ̀ nɛ́ bo dìì mɔ̀nnì bɛmɑ́ɑ̀ borɛ̀ nɛ̀ o tɑncɔ́ùmbɛ̀ wèe tì mbɛ̀ wénkùnnɛ timɔu pɑ́íí.

³⁵Dɛ kó diyiè dimɑ́ɑ̀ kuyuoku mɔ̀nnì, kɛ̀ Yesu nɑ́kɛ́ o tɑncɔ́ùmbɛ̀ kɛ dɔ̀: Tí séntɛ́ mɛniɛ nyɑ́ɑ̀ tɛrì.

³⁶Bɛ̀ cíɛ ndìì mɔ̀nnì bɛnìtìbɛ̀ kɛ́deè, kɛ ítɛ́nɛ̀ kudɑbɛkù Yesu do bo kùù miɛkɛ, kɛ̀ tidɑbɛɛtì tɛtìi ò nɛinɛ̀.

³⁷Kɛ̀ kuyɑɑkù kperíkù mɑkùu ítɛ́ní kɛ́nfuuti, kɛ̀ mɛniɛ ntɑɑ̀ kudɑbɛkù miɛkɛ kɛ mmɔ́ nkɛ piɛku.

³⁸Kɛ̀ Yesu yie yɛ̃̀ nkɛ duɔ́ kudɑbɛkù miɛkɛ kɛ cekɛ́ diyuceénnì o yuu. Kòo tɑncɔ́ùmbɛ̀ɛ ò èntɛ kɛ dɔ̀: Okótì kɛ̀ ti ku ɑ kpɛti í boɑ̀?

³⁹Kɛ̀ Yesu ítɛ́ kɛ́pɛ́i nkuyɑɑkù kɛ dɔ̀: Cómmú! Kɛ́bɛ́innɛ̀ mɛniɛ nkɛ dɔ̀: Yĩ́ só! Dɛndɛ bɑ̀mbɑ̀ nkɛ̀ kuyɑɑkùu cómmú kɛ̀ mɛniɛ ndɔ̀ bɛ́u.

⁴⁰Kòo bɛ̀ bekɛ kɛ dɔ̀: Dɛ̀ dòmmɛ kɛ̀ kufɔ̃wɑɑ́ ndi ɑutɛ́ mɛmmɛ? Dɛ̀ dòmmɛ kɛ̀ di í n tɑ̃́?

⁴¹Kɛ̀ kufɔ̃wɑɑ́ mbɛ̀ ɑutɛ́ kɛ̀ bɛ̀ mbékú bɛtɔbɛ̀ kɛ tú: Wenninwe yie, kuyɑɑkù nɛ̀ mɛniɛ nkɛ̀ dɛ̀ yíé nhò yɛ̃ mmù?