FƐCANYƐ̀NFƐ̀ 3

1

2

3

4

5

6

7

8

¹N duɔ́mu kɛyènkɛ̀ n dɔ́ù kɛ wɑnti n yɛ̀mmɛ̀ dɔ́ wè, kɛ mɛ̀nkɛ ò wɑmmú m mɛ nyí ò yɑ̀,

²kɛ mɛ ǹyìtɛ́ kɛ cè ndihɛì, kɛ tũ̀nnɛ icɛ, kɛ cè yɛcɛ̃kɑrɛ̀, kɛ wɑnti n yɛ̀mmɛ̀ dɔ́ wè, kɛ mɛ̀nkɛ ò wɑmmú bɑ́ n yí ò kɔ̃ṹ fɛnɔ̀nfɛ̀.

³Kɛ mɑutinɛ̀ bɛhɛikɛ̀mbɑ̀rìbɛ̀ bɛ̀ɛ̀ pɑkɛ́ dihɛì, kɛ bɛ̀ bekútɛ kɛ̀ n tú di yɑ̀ n yɛ̀mmɛ̀ dɔ́ wèɑ̀?

⁴Kɛ̀ nní mbo kɛ yóó bɛ̀ pɛ̃ɛ̃tóo kɛ́yɑ̀ n yɛ̀mmɛ̀ dɔ́ wè, kóò pĩ mbɑ́ ò tɛ̃́nkɛ í nfìtɛ́ n nɔ̀ùtɛ̀ miɛkɛ, kɛ̀ nh ò tɑnnɛ́ n yɔ̃ cĩ́ɛ̃̀tɛ̀ miɛkɛ, kudieku n yɔ̃ do m pùó nkùù miɛkɛ.

⁵N di bɑ́ɑ́mmu díndi Sedisɑdɛmmu ɛì kó isɑpùmbí, kɛ̀ n tú nɛ̀ iwɑurìi kó diyètìrì, nɛ̀ siweí sìì bo dikpɑ́ɑ̀ si kó diyètìrì, di bɑ́ɑ́ entɛ n dɔ́kùmɛ̀ di bɑ́ɑ́ mɛ̀ dɑ̀ńtɛ́ kɛ̀ mɛ mɔ̀nnì mu nyí tùɔ̀kɛ.

⁶We nkèríní dikpɑ́ɑ̀ bíɛ́kɛ̀, kɛ fĩ nkɛ dò nkuyukú, kɛ fɔ̃ɔ̃ńnì kɛ dò ntùdɑ̀ɑ̀rí bɛ̀ tu wè míírì nɛ̀ ɑ̃̀nsɑ̃́ɑ̃̀, kòo fɔ̃ɔ̃ku dònnɛ̀ tùdɑ̀ɑ̀rí kɔku.

⁷Ntɛ okpɑ̀ɑ̀tì Sɑdomɔɔ kó kumìɛ̀kù, kɛ̀ yɛkɔ̃m̀bɔ̀ yɛmbɛ̀ sipísìkuɔ̀ kù cɛ̃̀ɛ̃̀tɛ, Isidɑyɛɛribɛ kó yɛkɔ̃m̀bɔ̀ yɛmbɛ̀ mbɛ.

⁸Bɛmɔu kɛ̀ bɛ̀ pikú tikpɑ̀rìseuti kɛ wɑ̃kɛ́ mudoò kpɛ́í, bɑ́ wè kòò yi o kpɑ̀rìsiè kɛ bo mbɑɑnɛ̀ omɑ́ɑ̀ kɛyènkɛ̀.

⁹Okpɑ̀ɑ̀tì Sɑdomɔɔ duɔ́ nkɛ̀ bɛ̀ ò dɔ̀ɔ̀ didɔ́ù, nɛ̀ Dimɑ́ɑ̀ tùúkù kó dɛtekperɛ̀ kó tidɑbɛɛtì ntì.

¹⁰Kɛ̀ di tɑ̀ɑ̀kɛ tú timɑ́tì pɛ́ítì, kòo bɑɑ̀ nyó nyĩkú dɛ̀ tu mɛsɔɔ, kòò yóó nkɑrì dɛ̀ tu tiyɑɑ̀kpetì, kɛ̀ Sedisɑdɛmmu ɛì kó bɛsɑpɑ̀mbɛ̀ dì sɑ̃̀rinɛ̀ mɛdɔ́kùmɛ̀.

¹¹Sedisɑdɛmmu ɛì kó bɛsɑpɑ̀mbɛ̀, kɔtɛnɛ̀ní kɛ́yɑ̀ okpɑ̀ɑ̀tì Sɑdomɔɔ, ò ìrí mupotúòmù kó fɛítòòdɑ́fɛ̀ nfɛ, o yɔ̃ ò duɔ́ nfɛ̀ ò cɛ̃nnɛ́ dìì yiè. O wɛ̀ì kó diyiè.