MƐBORIMƐ WÉÌTÌ 10

1

2

3

4

5

6

7

8

9

10

11

12

¹Kɛ̀ fɛsĩɛ̃̀fɛ̀ fɛ̀mɑ́ɑ̀ do tùdɑ̀ɑ̀rí miɛkɛ kɛ kú, fɛ̀ ɔ̃ɔ̃ ò cɑ̀kɛmu. Kɛ̀ dɛyɛìnkpɛrɛ mɑ̀ sɑ́m̀pɔ́, dɛɛ̀ ɔ̃ɔ̃ nɑ dɛ̀ɛ̀ tu mɛciì nkpɛrɛ, disɑ̃nni kpɛrɛ.

²Mɛciì nyiɛ̀ nhɔ̃ nkérí kuyoú nku kɛ̀ kuyɛìnkù kèrí kucɑ̃̀nku.

³Kuyɛìnkù ɔ̃ nkérí kɛ̀ mɛyɛ̀mmɛ̀ mɛɛ̀ kù dòńtɛ́ kɛ̀ bɛnìtìbɛ̀ bɛmɔu ntú ò yɛimmu.

⁴Wèè dɑ bɑkɛ́ mutɔ̃mmú kòo miɛkɛ dɑ pɛikɛ ɑ bɑ́ɑ́ yóu mutɔ̃mmú. A bo bónkùnnɛmɛ̀ ɑ miɛkɛ dɛ pɑ̀ɑnko mɛyɛi mmɛ pɛ́u.

⁵N yɑ̀ mɛborimɛ tɛ̃mɛ̀ mɑmɛ̀ mmɛ mɛ̀ɛ̀ tu mɛyɛimɛ kɛtenkɛ̀ ĩ́nkɛ̀. Dɛ̀ bo kpɛtɛ́nɛ̀mɛ̀ wèè ni koò kɑnnɛ tiyɛìntì mutɔ̃mmú kó yɛkɑ̀rɛ̀ diɛyɛ̀, kɛ́kɑnnɛ bɛdiɛbɛ̀ mutɔ̃mmú kó yɛkɑ̀rɛ̀ sɑ́m̀pɔ́yɛ̀.

⁷Tidɑɑtì bo ndekɛ dɛ̀ sisɛ̃ĩ́ kɛ̀ bɛkpɑ̀ɑ̀tìbɛ̀ cèntì bɛ nɑɑ̀cɛ̀i tidɑɑtì tɛ̃mɛ̀.

⁸Wèè keù difɔ̃̀tìrì weè duò dì miɛkɛ, wèè pùɔ̀ ndidombìrì fɛwɑ̀ɑ̀fɛ̀ we ndɔmmù.

⁹Wèè kpɛ́inko yɛtɑ̃́rɛ̀ yɛ̀ we nkɔùrì. Wèè yɑú idɛí ì we nhɛ̃́ũ̀rì.

¹⁰Kɛ̀ tɛpĩɛ̃tɛ̀ nɑtimɛ̀ kú, kɑ̀ɑ í tɛ̀ sũ̀ɔ̃́tɛ́ ɑ dò nkɛ́yíɛ́ muwɛ̃rímú mmu, kɑ̀ɑ pĩ́ nnɛ̀ mɛciì mmutɔ̃mmú ɑ cɔ̃ntɛmu.

¹¹Kɛ̀ fɛwɑ̀ɑ̀fɛ̀ diɛ́ nkɛ dɑ dɔntɛ́ kɛ deè ɑ tɛ̃́nkɛ nɛ́ fɛ̀ dìɛ mbɑ nkpɛ́í.

¹²Mɛciì nyiɛ̀ nnɑ́ɑǹtì ɔ̃ nte kɛ̀ bɛnìtìbɛ̀ nhò dému kɛ̀ kuyɛìnkù kpɛti kù fétìnko.

¹³Kù ɔ̃ɔ̃ ketɛ́nɛ̀ tiyɛinnɑ́ɑǹtì nti kɛ́dentɛnɛ̀ tinɑ́ɑǹyɛiti.

¹⁴Kuyɛìnkù nɑ́ɑǹtì tiì ɔ̃ nsũ, onìtì mɛ nyí yɛ̃́ ò yóó dentɛnɛ̀ tì. We mbo ò nɑ̀kɛ́ tìì yóó ò tùɔ̀kɛní o kṹṹ nkó difɔ̃nkúò?

¹⁵Kuyɛìnkù tɔ̃mmú tú tihɔ̀ùtì nti ku kpɛ́í dɛtetìrɛ̀. Kù ketɛ́ kɛ í yɛ̃́ kucɛ kùù kɔ̀rìnɛ̀ dihɛì kù bo kɛ̀ɛ̀ bíɛ́kɛ̀.

¹⁶Dɛ̀ bo nyóùnɛ̀ dihɛì dìì kóo kpɑ̀ɑ̀tì tu dɛbirɛ kɛ̀ di kó bɛkótíbɛ̀ dɑ̀kɛnɛ̀ bɛ pitɛ mɑ́ɑ̀ sɑ̃́ɑ̃̀.

¹⁷Dihɛì dìì kóo kpɑ̀ɑ̀tì tu tɛkpɑ̀ɑ̀tìbitɛ, kɛ̀ di kó bɛkótíbɛ̀ ɔ̃ɔ̃ di bɛ̀ dò nkɛ́di dìì mɔ̀nnì kɛ bo pɛ́tɛ́ muwɛ̃rímú, bɛ̀ɛ̀ í yɔ̃̀ nkɛ muɔ̀, dɛ kó dihɛì yɛmbɛ̀ bo diwɛ̀ì miɛkɛ nkɛ.

¹⁸Wèè mɛí o nɔu, o cĩ́ɛ̃̀tɛ̀ mundɔú kuù ɔ̃ɔ̃ kéétɛ́, tidɑ̀ɑ̀tì dòńtɛ́ wè, weè ɔ̃ nduɔ́ kɛ̀ dɛ̀ ò nuu.

¹⁹Tidiitì borɛ̀ tiyɑ̃nkùtì dɛ mbo, mɛnɑɑ̀ mborɛ̀, mɛyɛǹcɑ́tímɛ̀ dɛ mbo, idíítí borɛ̀, dɛmɔu dɛ̀ dɛ mbo.

²⁰Bɑ́ɑ́ sɑ̃́ɑ̃́ nhokpɑ̀ɑ̀tì ɑ yɛ̀mmɛ̀ miɛkɛ, bɑ́ɑ́ sɑ̃́ɑ̃́ nwèè mɔ̀kɛ o kpɛrɛ ɑ dieku miɛkɛ kufɑ̃́ɑ̃́. Tɛnɔ̀tɛ̀ yɑ̀ɑ̀ bo túótɛ́ ɑ tɑmmɛ̀, ifìɛ̀ti yiɛ̀ nyɑ̀ɑ̀ bo mɛ̀ ìtɛ́nɛ̀.